ନୂଆଦିଲ୍ଲୀ: ରାଜସ୍ଥାନ ଓ ମଧ୍ୟପ୍ରଦେଶରେ ହାଇଆଲର୍ଟ । ବିଭିନ୍ନ ରେଳ ଷ୍ଟେସନ୍ ଏବଂ ଧର୍ମାନୁଷ୍ଠାନଗୁଡ଼ିକୁ ବୋମାରେ ଉଡ଼ାଇ ଦେବାକୁ ଧମକ ମିଳିବା ପରେ ସେସବୁ ସ୍ଥାନରେ ସୁରକ୍ଷା ବ୍ୟବସ୍ଥା ବଢ଼ାଇ ଦିଆଯାଇଛି । ହନୁମାନଗଡ଼ ରେଳ ଷ୍ଟେସନ୍ରେ ଏକ ଧମକପୂର୍ଣ୍ଣ ପତ୍ର ମିଳିବା ପରେ ସବୁଠି ହଇଚଇ ସୃଷ୍ଟି ହୋଇଛି ।
ଉତ୍ତର ପଶ୍ଚିମ ରେଳବାଇର ସିପିଆରଓ କ୍ୟାପ୍ଟେନ ଶଶି କିରଣ କହିଛନ୍ତି, ‘ଗତକାଲି ବୋମା ବିସ୍ଫୋରଣ ନେଇ ଧମକପୂର୍ଣ୍ଣ ପତ୍ର ହନୁମାନଗଡ଼ ଷ୍ଟେସନ୍ର ସୁପରିଟେଣ୍ଡେଣ୍ଟଙ୍କ ହସ୍ତଗତ ହୋଇଥିଲା । ପୋଲିସ ଷ୍ଟେସନ୍ର ବିଭିନ୍ନ ସ୍ଥାନରେ ବହୁ ଖୋଜାଖୋଜି କରିଥିଲେ ହେଁ ସେଭଳି କୌଣସି ବସ୍ଫୋରକ ସାମଗ୍ରୀ ପାଇନଥିଲା । ପୋଲିସ ଅଜ୍ଞତ ଅଭିଯୁକ୍ତଙ୍କ ବିରୋଧରେ ମାମଲା ରୁଜୁ କରି ଛାନଭିନ୍ କରୁଛି ।’
ହନୁମାନଗଡ଼ର ଅତିରିକ୍ତ ଏସପି ପ୍ୟାରେଲାଲ ମୀନା କହିଛନ୍ତି, ପାକିସ୍ତାନରୁ ପରିଚାଳିତ ଆତଙ୍କବାଦୀ ସଂଗଠନ ଜୈଶ-ଏ ମହମ୍ମଦ ନାଁରେ ଏହି ଧମକଭରା ପତ୍ର ମିଳିଥିଲା । ପତ୍ରରେ ଗଙ୍ଗାନଗର, ହନୁମାନଗଡ଼, ଯୋଦ୍ଧପୁର, ବିକାନେର, କୋଟା, ବୁଣ୍ଡି, ଉଦୟପୁର, ଜୟପୁର ଷ୍ଟେସନ୍କୁ ବୋମାରେ ଉଡ଼ାଇ ଦିଆଯିବ ବୋଲି ଧମକ ଦିଆଯାଇଥିଲା । ଏହା ସହ ନଭେମ୍ବର ୨ରେ ରାଜସ୍ଥାନ ଏବଂ ମଧ୍ୟପ୍ରଦେଶର ବିଭିନ୍ନ ଧାର୍ମିକ ସ୍ଥଳଗୁଡ଼ିକ ଉପରେ ଆକ୍ରମଣ ହେବ ବୋଲି ପତ୍ର ଜରିଆରେ ଧମକ ମିଳିଥିଲା । ସ୍ଥାନୀୟ ପୋଲିସ ସମେତ ରେଲଓ୍ବେ ପୋଲିସ ଏବଂ ବିଏସଏଫ ମାମଲାର ତଦନ୍ତ କରୁଛନ୍ତି । ଚିଠି କେଉଁଠୁ ଆସିଛି ଏବଂ କିଏ ପଠାଇଛି ସେନେଇ ଛାନଭିନ୍ ଚାଲିଛି ।
