କଟକ, ୨୦/୦୧: ସମ୍ପତ୍ତି ପାଇଁ ସମ୍ପର୍କ ନେଲା ଜୀବନ । ଲୋଭ ସାମ୍ନାରେ ତୁଚ୍ଛ ହେଲା ଭାତୃଭାବ । ଭାଇକୁ ମାରିବାକୁ ପଛେଇଲାନି ଭାଇ । କଟକ ବକ୍ସିବଜାର ଅଶୋକ ବାରିକ୍ ହତ୍ୟା ମାମଲାରେ ତିନି ଅଭିଯୁକ୍ତଙ୍କୁ ଗିରଫ କରିଛି ସ୍ପେଶାଲ୍ ସ୍କ୍ୱଡ୍ ଓ କ୍ୟାଣ୍ଟନ ଥାନା ପୁଲିସ । ସମ୍ପତ୍ତି ଓ ପାରିବାରିକ ବିବାଦକୁ ନେଇ ହତ୍ୟାକାଣ୍ଡ ଘଟିଥିଲା ଡିସିପି କହିଛନ୍ତି । ଏହି ଘଟଣାରେ ଜଣେ ଅଭିଯୁକ୍ତ ଏବେବି ଫେରାର୍ ରହିଛି । ତାକୁ ଗିରଫ କରିବାକୁ ବିଭିନ୍ନ ସ୍ଥାନରେ ପୁଲିସ୍ ଚଢ଼ାଉ ଜାରି ରଖିଛି ବୋଲି କହିଛନ୍ତି ଡିସିପି ରିଷିକେଶ ଖିଲାରୀ ।
ସମ୍ପତ୍ତି ଆଉ କିଛି ଟଙ୍କା ପାଇଁ ଭାଇ ବୋହୂ, ଭାଇ ଓ ପୁତୁରା ମିଳିତ ଭାବେ ଜଘନ୍ୟ କାଣ୍ଡ ଭିଆଇଥିଲେ । ଏହି ହତ୍ୟା ମାମଲାରେ ଅଶୋକ ବାରିକଙ୍କ ଭାଇ, ଭାଇ ବୋହୂ ଓ ପୁତୁରାଙ୍କୁ ଗିରଫ କରିଛି ସ୍ପେଶାଲ୍ ସ୍କ୍ୱାଡ୍ ଓ କ୍ୟାଣ୍ଟନ ମେଣ୍ଟ ଥାନା ପୁଲିସ୍ । ଗତ ମଙ୍ଗଳବାର ବକ୍ସିବଜାର ଅଞ୍ଚଳରେ ଏହି ଘଟଣା ଘଟିଛି । ଅଶୋକ ବାରିକ୍ କଟକ ବକ୍ସିବଜାର ସିଡିଏ ମାର୍କେଟରେ ଶୋଇଥିବା ବେଳେ ତାଙ୍କ ଦୁଇ ଭାଇ, ଭାଇ ବୋହୂ ଓ ପୁତୁରା ପହଞ୍ଚି ଛୁରୀରେ ପ୍ରଥମେ ବେକକୁ କାଟିବା ସହ କଟୁରୀରେ ହାଣି ହତ୍ୟା କରିଥିଲେ। ସମସ୍ତ ଅଭିଯୁକ୍ତ ଦୁଇଟି ବାଇକରେ ପହଞ୍ଚିବାପରେ ଅଭିଯୁକ୍ତ ମାନେ ମୁହଁରେ ରୁମାଲ ଘୋଡ଼ାଇ ମଶାରୀ ଭିତରେ ପଶି କଟୁରୀରେ ହାଣି ଥିବା ପୁଲିସ ହାତରେ ପ୍ରମାଣ ଲାଗିଛି ।
ହତ୍ୟାକାଣ୍ଡ ପାଇଁ ପୂର୍ବରୁ ସମସ୍ତେ ଯୋଜନା ପ୍ରସ୍ତୁତ ହୋଇଥିଲା । ଗତ ମଙ୍ଗଳବାର ରାତିରେ ଏହି କାଣ୍ଡ ଘଟାଇଥିଲେ। ମୃତ ଅଶୋକଙ୍କ କଟକ ଗୋପାଳପୁର ନିକଟରେ ଥିବା ସମ୍ପତ୍ତି କିଛି ବର୍ଷ ତଳେ ବିକ୍ରି ହୋଇଥିଲା । ସେଥିରୁ ମିଳିଥିବା ଭାଗ ଟଙ୍କା ଏବଂ ଶଙ୍କରପୁର ଅଞ୍ଚଳ ଥିବା ସମ୍ପତ୍ତିକୁ ଅନ୍ୟ ଭାଇମାନେ ମାଗିଥିଲେ । ଯାହାକୁ ନେଇ ଭାଇ-ଭାଇଙ୍କ ମଧ୍ୟରେ ବିବାଦ ଉପୁଜି ଥିଲା । ତେଣୁ ଅଶୋକ ଦଶ ବର୍ଷ ହେଲା ଘର ଛାଡ଼ି ବକ୍ସିବଜାର ଅଞ୍ଚଳରେ ରହୁଥିଲେ । ସେହି ସମ୍ପତ୍ତିକୁ ହାତେଇବା ପାଇଁ ଅଶୋକଙ୍କୁ ଭାଇ, ଭାଇ ବୋହୂ ଓ ପୁତୁରା ହତ୍ୟା କରିଛନ୍ତି ବୋଲି ଡିସିପି ରିଷିକେଶ ଖିଲାରୀ କହିଛନ୍ତି । ଅଭିଯୁକ୍ତଙ୍କୁ ଧରିବା ପାଇଁ ସ୍ପେଶାଲ ସ୍କ୍ୱାଡ୍, ଡଗ୍ ସ୍କ୍ବଡ୍ ଟିମ୍ ଏବଂ ସାଇଣ୍ଟିଫିକ୍ ଟିମକୁ ନେଇ ଗଠିତ ତଦନ୍ତକାରୀ ଦଳ ବିଭିନ୍ନ ସ୍ଥାନରେ ଚଢ଼ାଉ କରି ଘଟଣାରେ ସମ୍ପୃକ୍ତ ତିନି ଅଭିଯୁକ୍ତଙ୍କୁ ଗିରଫ କରିଛି ।
