ଭୁବନେଶ୍ୱର,୦୧/୧୧: ଆଜି ଓଡ଼ିଶା ଆସିବେ ରେଳ ତଥା ଆଇଟି ମନ୍ତ୍ରୀ ଅଶ୍ୱିନୀ ବୈଷ୍ଣବ । ଅଶ୍ୱିନୀଙ୍କ ଏହି ଦିନିକିଆ ଗସ୍ତ ବେଳେ ଇନଫୋ ଭ୍ୟାଲିରେ ସେମିକଣ୍ଡକ୍ଟର୍ ଫାବ୍ରିକେସନ୍ ୟୁନିଟ୍ (ସିକସେମ୍) ଭୂମିପୂଜନ ସମାରୋହରେ ଯୋଗ ଦେବେ । କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଉପସ୍ଥିତ ରହିବେ।
ରେଳମନ୍ତ୍ରୀ ସକାଳ ୯ଟା ୨୦ରେ ଭୁବନେଶ୍ୱର ବିମାନବନ୍ଦରରେ ପହଞ୍ଚିବା ପରେ ସଡ଼କ ପଥରେ ଇନଫୋ ଭ୍ୟାଲି ଗସ୍ତ କରିବେ । ସିକ୍ସେମ୍ର ଅର୍ଦ୍ଧପରିବାହୀ ନିର୍ମାଣ ୟୁନିଟ୍ର ଭୂମିପୂଜନ ସମାରୋହରେ ଯୋଗ ଦେବେ । ମେକ୍ ଇନ୍ ଇଣ୍ଡିଆ ଓ ଡିଜିଟାଲ୍ ଇଣ୍ଡିଆ ଦୃଷ୍ଟିକୋଣରେ ତିଆରି ହେଉଥିବା ଏହି ପ୍ରକଳ୍ପ ଭାରତର ଅର୍ଦ୍ଧପରିବାହୀ ଉତ୍ପାଦନ ଇକୋସିଷ୍ଟମକୁ ସୁଦୃଢ଼ କରିବ । ଏ ବାବଦରେ ଇଡ଼କୋ ୨୩ ଏକର ଜମି ଯୋଗାଇ ଦେଇଥିବା ବେଳେ ସିକସେମ୍ ୨୦୬୭ କୋଟି ଟଙ୍କା ବିନିଯୋଗ କରିବ । ଫଳରେ ପ୍ରତ୍ୟକ୍ଷ ଭାବେ ହଜାରେରୁ ଅଧିକ ଲୋକ ନିଯୁକ୍ତି ପାଇବା ସହିତ ପରୋକ୍ଷରେ ବହୁ ଲୋକଙ୍କୁ ନିଯୁକ୍ତି ମିଳିପାରିବ । ସେହିପରି ରେଳମନ୍ତ୍ରୀଙ୍କ ଗସ୍ତ ବେଳେ ରାଜ୍ୟରେ ହେବାକୁ ଥିବା ବିଭିନ୍ନ ନୂଆ ରେଳ ପ୍ରକଳ୍ପ ବାବଦରେ ବୁଝାମଣାପତ୍ର(ଏମଓୟୁ) ସ୍ୱାକ୍ଷର ହେବ ।
ଗୁରୁବାର ରେଳ ମନ୍ତ୍ରୀ ଘୋଷଣା କରିଥିବା ଓଡ଼ିଶାରେ ୯୨ଟି ନୂଆ ରେଳ ଓଭରବ୍ରିଜ୍ର ସମ୍ପୂର୍ଣ୍ଣ ଖର୍ଚ୍ଚ କେନ୍ଦ୍ର ସରକାର ବହନ କରିବେ । ପୂର୍ବରୁ ଉଭୟ ରେଳ ମନ୍ତ୍ରଣାଳୟ ଓ ରାଜ୍ୟ ସରକାର ଏହି ରେଳ ଓଭରବ୍ରିଜ୍ଗୁଡ଼ିକ ପାଇଁ ୫୦-୫୦ ଅନୁପାତରେ ଖର୍ଚ୍ଚ କରିବେ ବୋଲି ସ୍ଥିର ହୋଇଥିଲା । ଏହି ସମସ୍ତ କାର୍ଯ୍ୟକ୍ରମ ଲୋକସେବା ଭବନରେ ମଧ୍ୟାହ୍ନ ୧୨ଟା ୧୦ରୁ ସାଢ଼େ ୧୨ଟା ମଧ୍ୟରେ ସରିବ । ୧୨ଟା ୪୦ରୁ ଗୋଟାଏ ତିରିଶ ମିନିଟ ପର୍ଯ୍ୟନ୍ତ ଭୁବନେଶ୍ୱର ରେଳ ଷ୍ଟେସନରେ ଚାଲିଥିବା ନିର୍ମାଣ କାମର କରିବେ ସମୀକ୍ଷା । ଅମୃତ ଭାରତ ଷ୍ଟେସନ ଯୋଜନାରେ ଚାଲିଥିବା ଭୁବନେଶ୍ୱର ରେଳ ଷ୍ଟେସନର ଏହି ପୁନଃବିକାଶ ଏବଂ ଆଧୁନିକୀକରଣ କାର୍ଯ୍ୟକୁ ତ୍ୱରାନ୍ୱିତ କରିବା ନେଇ ରେଳମନ୍ତ୍ରୀ ବିଭାଗୀୟ ଅଧିକାରୀଙ୍କ ସହ ଆଲୋଚନା କରିବେ । ଯଦି କୌଣସି ଅସୁବିଧା ପାଇଁ କାମ ଅଟକିଛି, ତାହା ବୁଝି ସମାଧାନର ବାଟ ବାହାର କରିବେ ବୋଲି ରେଳ ଅଧିକାରୀମାନେ ସୂଚନା ଦେଇଛନ୍ତି ।
