କଟକ,୦୫/୦୭: ଆଗାମୀ ଦଶହରାରେ ପୂଜା ପେଣ୍ଡାଲ ନିର୍ମାଣ ପୂର୍ବରୁ ଏନ୍ଓସି (ନୋ ଅବ୍ଜେକ୍ସନ୍ ସାର୍ଟିଫିକେଟ୍) ବା ଲାଇସେନ୍ସ ପାଇଁ ସମସ୍ତ ପୂଜା କମିଟି ପ୍ରଶାସନ ନିକଟରେ ଆବେଦନ କରିବ । ଆଜିଠୁ ୭ ତାରିଖ ପର୍ଯ୍ୟନ୍ତ ତିନି ଧରି ଆବେଦନ କରାଯିବ । ଏଥିପାଇଁ ବାରବାଟୀ ପ୍ୟାଲେସ୍ରେ ସିଙ୍ଗଲ୍ ୱିଣ୍ଡୋ ବ୍ୟବସ୍ଥା କରାଯାଇଛି । ସେଠାରେ ଅଗ୍ନିଶମ, ପୂର୍ତ୍ତ, ବିଦ୍ୟୁତ୍, ସ୍ୱାସ୍ଥ୍ୟ ଓ କମିସନ୍ରେଟ୍ ପୁଲିସର କର୍ମଚାରୀମାନେ ଉପସ୍ଥିତ ରହିବେ ।
ପ୍ରଥମେ ପେଣ୍ଡାଲ୍ ନିର୍ମାଣ ପାଇଁ ପୁଲିସ୍ ପୂଜା କମିଟିକୁ ପ୍ରୋଭିଜିନାଲ୍ ଏନ୍ଓସି ପ୍ରଦାନ କରିବ । ୧୨ ତାରିଖ ଭିତରେ ସମସ୍ତଙ୍କୁ ପ୍ରୋଭିଜିନାଲ ଏନ୍ଓସି ଦିଆଯିବ ବୋଲି କଟକ ଜିଲ୍ଲାପାଳ ବୁଧବାର ହାଇକୋର୍ଟଙ୍କୁ ଅବଗତ କରିଥିଲେ । ହାଇକୋର୍ଟର ବିଚାରପତି ଜଷ୍ଟିସ୍ ସଙ୍ଗମ କୁମାର ସାହୁ ଏବଂ ବିଚାରପତି ଜଷ୍ଟିସ୍ ଭି. ନରସିଂହଙ୍କୁ ନେଇ ଗଠିତ ଖଣ୍ଡପୀଠ ଏହି ଜବାବକୁ ରେକର୍ଡ କରିବା ସହ ମାମଲାର ପରବର୍ତ୍ତୀ ଶୁଣାଣି ଆସନ୍ତା ୨୫ ତାରିଖକୁ ଧାର୍ଯ୍ୟ କରିଛନ୍ତି ।
ଚଳିତ ବର୍ଷ ଦୁର୍ଗା ପୂଜା କିପରି ଶାନ୍ତିଶୃଙ୍ଖଳାର ସହ ପାଳନ କରାଯିବ ତାହା ଉପରେ ହାଇକୋର୍ଟ ପ୍ରଥମରୁ ଗୁରୁତ୍ୱାରୋପ କରି ଆସୁଛନ୍ତି । ଏହି ପରିପ୍ରେକ୍ଷୀରେ ହାଇକୋର୍ଟ କଟକ ଜିଲ୍ଲାପାଳଙ୍କୁ ଦଶହରା ପେଣ୍ଡାଲ ତଥା ଅନ୍ୟାନ୍ୟ କାର୍ଯ୍ୟ ସଂପର୍କରେ ଜବାବ ରଖିବା ଲାଗି ନିର୍ଦ୍ଦେଶ ଦେଇଥିଲେ । କଟକ ଜିଲ୍ଲାପାଳ ଦତ୍ତାତ୍ରେୟ ଭାଉସାହେବ୍ ଶିନ୍ଦେ ସତ୍ୟପାଠ ଦାଖଲ କରି କଟକ ଦଶହରା କିପରି ଶୃଙ୍ଖଳିତ ଢଙ୍ଗରେ ପାଳନ କରାଯିବ ତାହା ଉପରେ ବିସ୍ତୃତ ସୂଚନା ରଖିଛନ୍ତି ।
ସେ ଦର୍ଶାଇଛନ୍ତି ଯେ, ସମସ୍ତ କମିଟି ପେଣ୍ଡାଲ୍ ନିର୍ମାଣ କାମ ଆସନ୍ତା ୨୨ ତାରିଖ ପୂର୍ବରୁ ଶେଷ କରିବେ । ପରେ ଏକ ମିଳିତ ଟିମ୍ ପୂଜା ପେଣ୍ଡାଲ ପରିଦର୍ଶନ କରି ସମସ୍ତ ନିମୟ ପାଳନ ହୋଇଥିଲେ ସଂପୃକ୍ତ କମିଟିକୁ ଏନ୍ଓସି ପ୍ରଦାନ କରିବେ । ଏନ୍ଓସି ଦିଆଯିବା ପରେ ଯାଇ ଲାଇସେନ୍ସ ସହ ବିଦ୍ୟୁତ୍ ସେଫ୍ଟି ସାର୍ଟିଫିକେଟ୍ ପ୍ରଦାନ କରାଯିବ ।
ଯେହେତୁ ପ୍ରଥମ ଥର ପାଇଁ ସିଙ୍ଗଲ୍ ୱିଣ୍ଡୋ ବ୍ୟବସ୍ଥା ଆରମ୍ଭ ହୋଇଛି ସେଥିପାଇଁ ପ୍ରଶାସନ ପକ୍ଷରୁ ପ୍ରତି ୬ଟି ପୂଜା ମଣ୍ଡପ ଲାଗି କିଛି କର୍ମଚାରୀଙ୍କୁ ସ୍ୱତନ୍ତ୍ର ଭାବେ ନିଯୁକ୍ତି ଦିଆଯିବ । ଏହି କର୍ମଚାରୀମାନେ ପୂଜା ମଣ୍ଡପଗୁଡ଼ିକୁ ଏନ୍ଓସି ପ୍ରଦାନରେ ସହଯୋଗ କରିବେ । ପ୍ରତି ୨୦ରୁ ୨୫ଟି ପୂଜା ମଣ୍ଡପ ପାଇଁ ଜଣେ ବରିଷ୍ଠ ଅଧିକାରୀ ରହିବେ । ଅଗ୍ନିଶମ ସାର୍ଟିଫିକେଟ୍, ବିଦ୍ୟୁତ୍ ସାର୍ଟିଫିକେଟ୍ ଏବଂ ନିର୍ମାଣ (ଷ୍ଟ୍ରକ୍ଚରାଲ୍) ସାର୍ଟିଫିକେଟ୍ ଉପରେ ବିଶେଷ ଗୁରୁତ୍ୱ ଦିଆଯିବ ବୋଲି ଜିଲ୍ଲାପାଳ ସ୍ପଷ୍ଟ କରିଛନ୍ତି ।
ପୂଜା ମଣ୍ଡପ ଓ ତୋରଣ ନିର୍ମାଣ ଦ୍ୱାରା ଯେପରି ଟ୍ରାଫିକ୍ ଜାମ୍, ରାସ୍ତା ଅବରୋଧ ନହୁଏ ତାହାକୁ ଦୃଷ୍ଟିରେ ରଖି ପୁଲିସ୍ ଏନ୍ଓସି ପ୍ରଦାନ କରିବ । ଭସାଣି ସମୟରେ ଅଘଟଣ ଏଡାଇବା ପାଇଁ ଜଣେ ସୁପର୍ଭାଇଜିଂ ଅଫିସର ନିଯୁକ୍ତ ରହିବେ । ଏଥିସହ ଅନ୍ୟାନ୍ୟ ବିଭାଗର ଅଧିକାରୀମାନେ ମଧ୍ୟ ବିଭିନ୍ନ ସ୍ଥାନରେ ନିୟୋଜିତ ହେବେ । ପୂଜା ଶେଷ ପରେ ପୋତା ଯାଇଥିବା ବାଉଁଶ ତଥା ଅନ୍ୟାନ୍ୟ ସାମଗ୍ରୀଗୁଡ଼ିକ ନିର୍ଦ୍ଦିଷ୍ଟ ସମୟ ମଧ୍ୟରେ ହଟାଯିବ ବୋଲି ଜିଲ୍ଲାପାଳ କହିଛନ୍ତି ।
ଶୁଣାଣି ଅବସରରେ କଟକ ଡିସିପି ଖିଲାରୀ ରିଶିକେଶ ଦ୍ୟାନ୍ଦେଓ ମଧ୍ୟ ଏକ ସତ୍ୟପାଠ ଦାଖଲ କରିଥିଲେ । ଅଗ୍ନିଶମ, ବିଦ୍ୟୁତ୍ ଆଦି ସାର୍ଟିଫିକେଟ୍ ନେବା ପରେ ସାଂସ୍କୃତିକ, ଡେକୋରେସନ୍ ଆଦି ପାଇଁ ଅନୁମତି ଦିଆଯିବ ବୋଲି ଡିସିପି କହିଛନ୍ତି । ପୂଜା ମଣ୍ଡପ ନିର୍ମାଣ ପାଇଁ ପ୍ରତ୍ୟେକ ପୂଜା କମିଟି ପକ୍ଷରୁ ନିର୍ଦ୍ଦିଷ୍ଟ ପରିମାଣର ଅର୍ଥ ସିଏମ୍ସିରେ ଜମା କରାଯିବ । ଉକ୍ତ ଜମା ଅର୍ଥର ରସିଦ୍ ଡିସିପିଙ୍କ କାର୍ଯ୍ୟାଳୟରେ ଜମା କରିବା ପରେ ସମସ୍ତଙ୍କୁ ଲାଇସେନ୍ସ ପ୍ରଦାନ କରାଯିବ । ପ୍ରତେକ ପୂଜା କମିଟି ନିଜ ତରଫରୁ ସ୍ୱେଚ୍ଛାସେବୀ ମୁତୟନ କରିବା ଓ ସିସି କ୍ୟାମେରା ଲଗାଇବାକୁ କୁହାଯାଇଛି ।
