ପୁରୀ,୧୧/୧୨: ପୁରୀ ସମୁଦ୍ରରେ ଗାଧୋଉଥିବା ସମୟରେ ନିଖୋଜ ହେଲେ ପର୍ଯ୍ୟଟକ । ନିଖୋଜ ହୋଇଥିବା ପର୍ଯ୍ୟଟକ ଜଣକ ମଧ୍ୟପ୍ରଦେଶ ଇନ୍ଦୋରର ପ୍ରଫୁଲ୍ଲ ମହାଳିକ ବୋଲି ଜଣା ପଡ଼ିଛି । ଘଟଣାସ୍ଥଳରେ ସମୁଦ୍ରକୂଳ ଥାନା ପୋଲିସ ପକ୍ଷରୁ ଖୋଜାଖୋଜି ଜାରି ରହିଛି।
ସୂଚନା ମୁତାବକ, ପ୍ରଫୁଲ୍ଲ ଡିସେମ୍ୱର ୯ ତାରିଖରେ ସାତ ଜଣ ସାଙ୍ଗଙ୍କ ସହ ପୁରୀ ବୁଲିବାକୁ ଆସିଥିଲେ । ତେବେ ବୁଧବାର ଚକ୍ରତୀର୍ଥ ବେଳାଭୂମିରେ ସାଙ୍ଗମାନଙ୍କ ସହ ସ୍ନାନ କରୁଥିବା ସମୟରେ ପ୍ରଫୁଲ୍ଲ ଗଭୀର ସମୁଦ୍ର ଭିତରେ ବୁଡି ଯାଇଥିଲେ । ଏହା ଦେଖି ତାଙ୍କ ସାଙ୍ଗମାନେ ସମୁଦ୍ରକୂଳ ଥାନା ପୋଲିସକୁ ଖବର ଦେଇଥିଲେ । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚିଛି ଏବଂ ପ୍ରଫୁଲ୍ଲଙ୍କ ପରିବାର ଲୋକଙ୍କୁ ଖବର ଦେଇଛି । ଏହା ସହ ସର୍ଚ୍ଚ ଅପରେସନ ମଧ୍ୟ ଜାରି ରଖିଛି । ସେପଟେ ଗତ ଏକ ମାସ ମଧ୍ୟରେ ସମୁଦ୍ରରେ ସ୍ନାନ ବେଳେ ତିନିଜଣ ଯୁବକ ନିଖୋଜ ହୋଇଯାଇଥିଲେ ମଧ୍ୟ ଏପର୍ଯ୍ୟନ୍ତ ତାଙ୍କର କୌଣସି ପତ୍ତା ମିଳିନାହିଁ । ତେବେ ସମୁଦ୍ର କୂଳରେ ପର୍ଯ୍ୟାପ୍ତ ଲାଇଫ ଗାର୍ଡ ମୁତୟନ ନହେବା, ସମୁଦ୍ର ସ୍ନାନ ସମୟରେ ପର୍ଯ୍ୟଟକ ମାନେ କିଭଳି ସଚେତନ ରହିବେ ସେନେଇ ସାଇନ୍ ବୋର୍ଡ ଲଗା ନଯିବା ତଥା ନିଶା ସେବନ କରି ସମୁଦ୍ରରେ ସ୍ନାନ କରୁଥିବା ଯୋଗୁ ବାରମ୍ବାର ଏଭଳି ଅଘଟଣ ଘଟୁଥିବା ଅଭିଯୋଗ ହୋଇଛି।
