ଭୁବନେଶ୍ୱର,୨୯/୧୧: ଆଜିଠୁ ଅଖିଳ ଭାରତୀୟ ଡିଜିପି ସମ୍ମିଳନୀ ରାଜଧାନୀରେ ଆରମ୍ଭ ହେବ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ସ୍ୱରାଷ୍ଟ୍ରମନ୍ତ୍ରୀ ଅମିତ ଶାହ ଓ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲଙ୍କ ସମେତ ଅନ୍ୟାନ୍ୟ ଭିଭିଆଇପି ୩ ଦିନ ଧରି ଭୁବନେଶ୍ୱରରେ ରହିବେ । ଏହାକୁ ଦୃଷ୍ଟିରେ ରଖି ରାଜଧାନୀର ବିଭିନ୍ନ ରାସ୍ତାରେ ଟ୍ରାଫିକ୍ କଟକଣା ଜାରି ହୋଇଛି । ବିଶେଷ କରି ବିମାନବନ୍ଦରରୁ ଏଜି ଛକ, ପିଏମ୍ଜି ଛକ ଦେଇ ୧୨୦ ବାଟାଲିୟନ ରାସ୍ତାରେ ଯା’ଆସ ମନା କରାଯାଇଛି । ଭିଭିଆଇପିଙ୍କ ଗସ୍ତ ସୂଚୀ ଅନୁସାରେ ସେହିଦିନ ସାମୟିକ ସମୟ ପାଇଁ ନିର୍ଦ୍ଦିଷ୍ଟ ରାସ୍ତା ବନ୍ଦ କରାଯିବ । ଶୁକ୍ରବାର ଓ ଶନିବାର ଏୟାରପୋର୍ଟ ଆବାସିକ ଛକରୁ ଟି-ଜଙ୍କସନ (ପାଣି ଟାଙ୍କି ଛକ) ରାସ୍ତାରେ କୌଣସି ଗାଡି ଚଳାଚଳ କରିପାରିବନି ।
ଆଜି ୧ଟା ୨୫ରେ ପହଞ୍ଚିବେ ଅମିତ ଶାହ, ୨ଟାରେ ଉଦ୍ଘାଟନ
ଆଜି ଅପରାହ୍ଣ ୧ଟା ୨୫ ମିନିଟ୍ରେ ବିମାନବନ୍ଦରରେ ଅମିତ ଶାହଙ୍କ ସ୍ୱତନ୍ତ୍ର ବିମାନ ଅବତରଣ କରିବ । ସେ ବିମାନବନ୍ଦରରୁ ସିଧା ଲୋକସେବା ଭବନରେ ଥିବା ସମ୍ମିଳନୀ କକ୍ଷକୁ ଯିବେ । ଅପରାହ୍ଣ ୨ଟାରେ ଡିଜିପି ସମ୍ମିଳନୀର ଉଦ୍ଘାଟନ କରିବେ । ସେଥିପାଇଁ ଅପରାହ୍ଣ ୧ଟାରୁ ୨ଟା ପର୍ଯ୍ୟନ୍ତ ଏୟାରପୋର୍ଟ ଛକରୁ ପିଏମ୍ଜି ଛକ ରାସ୍ତାକୁ ବ୍ଲକ୍ କରାଯାଇଛି । କ୍ୟାପିଟାଲ ହସ୍ପିଟାଲ ଓ ଏଜି ଛକ ଟ୍ରାଫିକ୍ ମଧ୍ୟ ବନ୍ଦ ରହିବ ।
ସନ୍ଧ୍ୟାରେ ରାଜଭବନ-ଏଜି-ହାଉସିଂ ବୋର୍ଡ-ରାମମନ୍ଦିର ରାସ୍ତା ସିଲ୍
ଶୁକ୍ରବାର ଅପରାହ୍ଣ ୪ଟା ୧୫ରେ ବାୟୁସେନାର ସ୍ୱତନ୍ତ୍ର ବିମାନରେ ପହଞ୍ଚିବେ ମୋଦି । ବିମାନବନ୍ଦରରୁ ବାହାରି ଏକ ସାଧାରଣ ସଭାରେ ଉଦ୍ବୋଧନ ହେବେ । ଅପରାହ୍ଣ ୪ଟା ୪୫ରୁ ୫ଟା ୨୫ ଯାଏଁ ଏୟାରପୋର୍ଟ ଛକରୁ ରାଜଭବନ ରାସ୍ତା ବନ୍ଦ ରହିବ । ଏହି ରାସ୍ତାରେ ମୋଦି ରାଜଭବନକୁ ଯିବେ । ମୋଦି ସନ୍ଧ୍ୟା ବେଳେ ରାମମନ୍ଦିର ନିକଟ ବିଜେପି ରାଜ୍ୟ କାର୍ଯ୍ୟାଳୟ ବୈଠକରେ ଯୋଗଦେବେ । ସେଥିପାଇଁ ସନ୍ଧ୍ୟା ୬ଟାରୁ ୬ଟା ୪୫ ଯାଏଁ ରାଜଭବନ ଛକଏଜି ଛକ-ହାଉସିଂ ବୋର୍ଡ ଛକ-ରାମମନ୍ଦିର ଛକ-ମାଷ୍ଟରକ୍ୟାଣ୍ଟିନ ଛକ ରାସ୍ତା ବନ୍ଦ ରହିବ । ମୋଦିଙ୍କ ଫେରିବା ସମୟରେ ରାତି ୮ଟା ୨୫ରୁ ୮ଟା ୫୦ ଯାଏଁ ମଧ୍ୟ ଏହି ରାସ୍ତାରେ କେହି ଯାତାୟତ କରିପାରିବେନି ।
ପୁଲିସ ଭବନରେ ରହିବେ ଶାହ, ଏଜି-ନାଲ୍କୋ ଛକ ରାସ୍ତା ବନ୍ଦ
ସ୍ୱରାଷ୍ଟ୍ରମନ୍ତ୍ରୀ ସମ୍ମିଳନୀରୁ ସିଧା ଚନ୍ଦ୍ରଶେଖରପୁରସ୍ଥିତ ପୁଲିସ ଭବନ (ଆଇପିଏସ ମେସ୍)କୁ ଯିବେ । ସେଠାରେ ରାତ୍ରିଯାପନ କରିବେ । ସେଥିପାଇଁ ଶନିବାର ସନ୍ଧ୍ୟା ସାଢ଼େ ୭ଟାରୁ ରାତି ୮ଟା ୨୦ ମିନିଟ୍ ଯାଏଁ ଏଜି-ରବୀନ୍ଦ୍ର ମଣ୍ଡପ-୧୨୦ ବାଟାଲିୟନ- ଜୟଦେବ ବିହାର-ନାଲକୋ ଛକ ରାସ୍ତାରେ ଗାଡି ଚଳାଚଳ ବନ୍ଦ ରହିବ । ଶାହ ଶନିବାର ସକାଳେ ପୁଣି ସମ୍ମିଳନୀରେ ଯୋଗଦେବେ । ସକାଳ ୬ଟାରୁ ସାଢ଼େ ୮ଟା ଯାଏଁ ଏହି ରାସ୍ତା ବନ୍ଦ ରହିବ । ସମ୍ମିଳନୀରୁ ଆଇପିଏସ୍ ମେସକୁ ଫେରିବା ପାଇଁ ଏହି ରାସ୍ତାକୁ ସନ୍ଧ୍ୟା ସାଢ଼େ ୭ଟାରୁ ରାତି ୮ଟା ୧୫ ମିନିଟ୍ ଯାଏଁ ବନ୍ଦ କରାଯିବ ।
ମୋଦିଙ୍କ ପାଇଁ ଏଜି-ରାଜଭବନ-ପାୱାର ହାଉସ୍ ରାସ୍ତା ସିଲ୍
ଶନିବାର ସକାଳ ୮ଟା ୨୫ରେ ରାଜଭବନରୁ ଲୋକସେବା ଭବନ ସମ୍ମିଳନୀ କକ୍ଷ ଯିବେ ମୋଦି । ସେଥିପାଇଁ ସକାଳ ୮ଟା ୧୦ରୁ ସାଢ଼େ ୮ଟା ଯାଏଁ ରାଜଭବନ ଛକରୁ ଏଜି ଛକ ଓ ରାଜଭବନ ଛକରୁ ପାୱାର ହାଉସ୍ ଛକ ରାସ୍ତାକୁ ବନ୍ଦ କରାଯିବ । ମୋଦି ରାଜଭବନକୁ ଫେରିବା ପାଇଁ ସନ୍ଧ୍ୟା ୭ଟା ୫୫ରୁ ରାତି ୮ଟା ୨୦ ମିନିଟ୍ ଯାଏଁ ଏହି ରାସ୍ତାକୁ ବନ୍ଦ କରାଯିବ ।
ଉଦଯାପନୀରେ ବି କଟକଣା ବଳବତ୍ତର
ଉଦ୍ଯାପନୀ ଦିବସରେ ଅର୍ଥାତ୍ ରବିବାର ସକାଳ ୬ଟାରୁ ୮ଟା ୨୦ ଯାଏଁ ଏଜି-ରବୀନ୍ଦ୍ର ମଣ୍ଡପ- ୧୨୦ ବାଟାଲିୟନ-ଜୟଦେବ ବିହାର-ନାଲକୋ ଛକ ରାସ୍ତାକୁ ବନ୍ଦ କରାଯିବ । ସେହି ସମୟ ଭିତରେ ଆଇପିଏସ୍ ମେସ୍ରୁ ଶାହଙ୍କ କାର୍କେଡ୍ ଲୋକସେବା ଭବନ ଆସିବ । ସକାଳ ୮ଟା ୫ରୁ ୮ଟା ୨୫ ଯାଏଁ ରାଜଭବନ ଛକରୁ ଏଜି ଛକ ଓ ରାଜଭବନ ଛକରୁ ପାୱାର ହାଉସ୍ ଛକ ରାସ୍ତା ବ୍ଲକ କରାଯିବ । ଏହି ସମୟରେ ମୋଦିଙ୍କ କାରକେଡ୍ ରାଜଭବନରୁ ବାହାରି ଲୋକସେବା ଭବନ ସମ୍ମିଳନୀ କକ୍ଷରେ ପହଞ୍ଚିବ । ଉଦ୍ଯାପନ ପରେ ପ୍ରଧାନମନ୍ତ୍ରୀ, ସ୍ୱରାଷ୍ଟ୍ରମନ୍ତ୍ରୀ ସମେତ ଅନ୍ୟ ଭିଭିଆଇପି ସିଧା ବିମାନବନ୍ଦର ଯିବେ । ସେଥିପାଇଁ ଏଜି ଛକରୁ ବିମାନବନ୍ଦର ରାସ୍ତାକୁ ଅପରାହ୍ଣ ୪ଟା ୨୦ରୁ ୪ଟା ୪୫ ଓ ସନ୍ଧ୍ୟା ୫ଟା ୧୫ରୁ ୫ଟା ୪୦ ମିନିଟ୍ ଯାଏଁ ବନ୍ଦ କରାଯିବ ।
