ନୂଆଦିଲ୍ଲୀ,୧୯/୧୧ : ଭାରତ ଏବଂ ଅଷ୍ଟେ୍ରଲିଆ ମଧ୍ୟରେ ବର୍ଡର- ଗାଭାସ୍କର ଟ୍ରଫିର ପ୍ରଥମ ଟେଷ୍ଟ ୨୨ନଭେମ୍ବରରୁ ପର୍ଥରେ ଖେଳାଯିବ । ଭାରତ ବିପକ୍ଷ ସିରିଜ ପୂର୍ବରୁ ଅଷ୍ଟେ୍ରଲିଆ କ୍ରିକେଟ ଜଗତରେ ଚର୍ଚ୍ଚା ଆରମ୍ଭ ହୋଇଯାଇଛି । ଏହା ମଧ୍ୟରେ ଅଷ୍ଟେ୍ରଲିଆର ଆକ୍ରମଣାତ୍ମକ ବ୍ୟାଟର ଟ୍ରେବିସ ହେଡ଼ ବୁମରାହଙ୍କୁ ‘ଏକ୍ସ ଫ୍ୟାକ୍ଟର’ କହିଛନ୍ତି , ଏହାସହ ଏହି ପୀଢିର ସବୁଠାରୁ ବିପଦ ଜନକ ବୋଲର ବୋଲି କହିଛନ୍ତି । ବୁମରାହ ଶୁକ୍ରବାରରୁ ଏଠାରେ ଆରମ୍ଭ ହେଉଥିବା ପ୍ରଥମ ଟେଷ୍ଟରେ ଭାରତର ଅଧିନାୟକ କରିବେ । ଅଷ୍ଟେ୍ରଲିଆର ବର୍ତ୍ତମାନ ଏବଂ ପୂର୍ବତନ କ୍ରିକେଟର ଏହି ସିରିଜ ପୂର୍ବରୁ ତାଙ୍କର ତାରିଫ୍ କରିଛନ୍ତି । ସ୍ଥାନୀୟ ଗଣମାଧ୍ୟମ ଅନୁସାରେ ୭୦ଦଶକରେ ଓ୍ବେଷ୍ଟଇଣ୍ଡିଜର ଦ୍ରୁତ ଆକ୍ରମଣର ସ୍ବର୍ଣ୍ଣିମ ଗସ୍ତ ପରେ ପ୍ରଥମ ଥର କୌଣସି ଦ୍ରୁତ ବୋଲର ଅଷ୍ଟେ୍ରଲିଆ ବ୍ୟାଟରଙ୍କୁ ଭୟଭୀତ କରାଇ ଦେଇଛନ୍ତି ।
ବୁମରାହ ଗତ ଦୁଇ ଟେଷ୍ଟ ଗସ୍ତରେ ଅଷ୍ଟେ୍ରଲିଆ ବିପକ୍ଷରେ ୩୨ଓ୍ବିକେଟ ନେଇଥିଲେ ଯେଉଁଥିରେ ୨୦୧୮ବକ୍ସିଂ ଡେ ଟେଷ୍ଟରେ ନେଇଥିବା ୬ଓ୍ବିକେଟ ସାମିଲ ରହିଛି । ହେଡ ‘ଫକ୍ସ କ୍ରିକେଟ’କୁ କହିଛନ୍ତି କି, ତାଙ୍କର ସାମ୍ନା କରିବା ଅସମ୍ଭବ ଭଳି ଅଟେ । ଆପଣଙ୍କୁ ଲାଗୁଛି କି ଆପଣ ଗୋଟିଏ ପାଦ ଆଗରେ ଅଛନ୍ତି କିନ୍ତୁ ସବୁବେଳେ ସେ ଆପଣଙ୍କଠାରୁ ଗୋଟିଏ ପାଦ ଆଗକୁ ଯାଇଥାନ୍ତି ।
