ରେଢ଼ାଖୋଲ, ୧୦/୦୭: ସମ୍ୱଲପୁର ଜିଲ୍ଲା ରେଢ଼ାଖୋଲ ବ୍ଲକ ବଡ଼କୁଡା ଗ୍ରାମ ନିକଟ ଗ୍ରାମ୍ୟ ଉନ୍ନୟନ ବିଭାଗ ରାସ୍ତାରେ ୪ଦିନ ହେବ ଏକ ତେନ୍ତୁଳି ଗଛ ପଡିରହିଛି । ଯାହା ଫଳରେ ଯାତାୟାତ ବାଧାପ୍ରାପ୍ତ ହୋଇଛି ।
ସୂଚନା ମୁତାବକ, ବଡ଼କୁଡା ଗାଁ ଅଞ୍ଚଳରେ ଆଜକୁ ପ୍ରାୟ ଏକ ମାସରୁ ଉର୍ଦ୍ଧ୍ୱ ହେବ ବର୍ଷା ଲାଗି ରହିଛି । ତେବେ ୪ଦିନ ପୂର୍ବରୁ ବଡ଼କୁଡା ଗାଁ ନିକଟରେ ଥିବା ଏକ ବିଶାଳକାୟ ତେନ୍ତୁଳି ଗଛ ରାସ୍ତା ଉପରେ ଟଳି ପଡିଥିଲା । ଏନେଇ ଗାଁଲୋକେ ପ୍ରଶାସନକୁ ଜଣାଇବା ପରେ ଅଗ୍ନିଶମ ବାହିନୀ ପହଞ୍ଚି ଟଳି ପଡ଼ିଥିବା ଗଛର ଅଗ୍ରଭାଗର କିଛି ଅଂଶ କାଟି ଥିଲେ ମଧ୍ୟ୍ୟ ଗଛର ବଡ ଗଣ୍ଡିକୁ କାଟି ନଥିବାରୁ ରାସ୍ତାରେ ଯାନବାହାନ ଚଳାଚଳ ସମ୍ପୂର୍ଣ ଭାବେ ବନ୍ଦ ହୋଇ ଯାଇଛି । ଫଳରେ ଏହି ରାସ୍ତା ଉପରେ ନିର୍ଭର କରୁଥିବା ଗ୍ରାମବାସୀ, ସ୍କୁଲ, କଲେଜର ଛାତ୍ରଛାତ୍ରୀ ଅସୁବିଧାର ସମ୍ମୁଖୀନ ହେଉଛନ୍ତି । ଏପରିକି ଗାଁକୁ ଆମ୍ବୁଲାନ୍ସ ଆସି ପାରୁ ନଥିବାରୁ ଜନସାଧାରଣ ସ୍ୱାସ୍ଥ୍ୟ ସେବା ପାଇବାରୁ ବଞ୍ଚିତ ହେଉଥିବା ଅଭିଯୋଗ ହୋଇଛି । ଏନେଇ ବିଡିଓ ରାଜେନ୍ଦ୍ର ନାରାୟଣ ସେନାପତିଙ୍କୁ ଯୋଗାଯୋଗ କରିବାରୁ ରାସ୍ତାରୁ ଗଛକୁ ହଟାଯିବା ପାଇଁ ପଦକ୍ଷେପ ଗ୍ରହଣ କରାଯାଇଛି । ଖୁବ୍ ଶୀଘ୍ର ଯାତାୟାତ ସ୍ୱାଭାବିକ ହେବ ବୋଲି ସେ କହିଛନ୍ତି ।
