ମାଲକାନଗିରି, ୧୬/୫ : ଜିଲ୍ଲାର ସାମ୍ପ୍ରତିକ ପରିସ୍ଥିତି ଓ ଗୁରୁତ୍ୱପୂର୍ଣ୍ଣ ୩ଦଫା ଦାବି ନେଇ ଆଦିବାସୀ ସମାଜ ମହାସଂଘ ପକ୍ଷରୁ ଶୁକ୍ରବାର ମାଲକାନଗିରି ଜିଲ୍ଲା ସଦର ମହାକୁମାସ୍ଥିତ ମାଲ୍ୟବନ୍ତ ଛାତ୍ରବାସ ପରିସରରେ ଜରୁରୀକାଳୀନ ବୈଠକ ଓ ଆଦିବାସୀ ସମାବେଶ ଅନୁଷ୍ଠିତ ହୋଇଯାଇଛି । ବୈଠକର ମୁଖ୍ୟ ଉଦେଶ୍ୟ ଥିଲା ଜମି ଜଳ ଜଙ୍ଗଲ, ବଞ୍ଚିବାର ଅଧିକାର ସହିତ, ଜଙ୍ଗଲ ଜମି ପଟା ଓ ସ୍ୱତଃ ପ୍ରଦାନ, ଜାଲ ଜାତିଗତ ପ୍ରମାଣ ପତ୍ରର ଯାଞ୍ଚ ଓ କାର୍ଯ୍ୟାନୁଷ୍ଠାନ, ଏମଭି ଗ୍ରାମର ନାମ ପରିବର୍ତ୍ତନ ଓ ରାଜସ୍ୱ ଗ୍ରାମର ମାନ୍ୟତା ପ୍ରସ୍ତାବକୁ ଗ୍ରହଣ ନ କରିବା ସହ ବିଭିନ୍ନ ଦାବି ସମ୍ପର୍କରେ ଆଲୋଚନା ହୋଇଥିଲା।
ବୈଠକରେ ନବରଙ୍ଗପୁର ସାଂସଦ ବଳଭଦ୍ର ମାଝୀ, ମାଲକାନଗିରି ବିଧାୟକ ନରସିଂହ ମାଡକାମୀ, ଜିଲ୍ଲା ପରିଷଦ ଅଧ୍ୟକ୍ଷ। ସମାରୀ ଟାଙ୍ଗୁଲ, ପୂର୍ବତନ ବିଧାୟକ ମାନସ ମାଡକାମୀ, ଆଦିବାସୀ ସମାଜ ମହାସଂଘ ସଭାପତି ବନ୍ଧୁ ମୁଦୁଲି, ଉପଦେଷ୍ଟା ଘନଶ୍ୟାମ ମାଡ଼କାମୀ, ଜିଲ୍ଲା ସରପଞ୍ଚ ସଂଘ ସଭାପତି ଶ୍ରୀନିବାସ ମୁଦୁଲି, ଯୁବ ଆଦିବାସୀ ନେତା ଲଳିତ ମାଡକାମି ପ୍ରମୁଖ ଆଦିବାସୀ ନେତା ଓ ୧୧୧ ଟି ପଞ୍ଚାୟତ ର ସରପଞ୍ଚ, ସମିତି ସଭ୍ୟ, ଜିଲ୍ଲା ପରିଷଦ ସଦସ୍ୟ ଓ ୧୪ଟି ଆଦିବାସୀ ସମାଜ ମୁଖିଆ ଏବଂ ଲୋକ ପ୍ରତିନିଧିମାନେ ଉପସ୍ଥିତ ରହି ଆଲୋଚନାରେ ଭାଗ ନେଇଥିଲେ।
