ନୂଆଦିଲ୍ଲୀ: ତୁର୍କୀରେ ଗୁରୁବାର ସନ୍ଧ୍ୟାରେ ଶକ୍ତିଶାଳୀ ଭୂମିକମ୍ପ ଅନୁଭୂତ ହୋଇଛି। ଏହି ଭୂମିକମ୍ପର ତୀବ୍ରତା ରିକ୍ଟର ସ୍କେଲରେ ୫.୧ ରେକର୍ଡ କରାଯାଇଛି । ଭୂମିକମ୍ପ ଏତେ ଶକ୍ତିଶାଳୀ ଥିଲା ଯେ, ଲୋକମାନେ ଭୟରେ ଘରୁ ବାହାରକୁ ବାହାରି ଆସିଥିଲେ । ସେପଟେ କୌଣସି ଜୀବନ କିମ୍ବା ସମ୍ପତ୍ତି କ୍ଷତିର ରିପୋର୍ଟ ମିଳି ନାହିଁ । EMSC ରିପୋର୍ଟ ଅନୁଯାୟୀ, ଗୁରୁବାର ସନ୍ଧ୍ୟାରେ ତୁର୍କୀରେ ୫.୧ ତୀବ୍ରତାର ଏକ ଭୂମିକମ୍ପ ଅନୁଭୂତ ହୋଇଥିଲା।  କୁଲୁରୁ ଉତ୍ତର-ପୂର୍ବରେ ୧୪ କିଲୋମିଟର ଦୂରରେ ଭୂମିକମ୍ପ ଅନୁଭୂତ ହୋଇଥିଲା। 

ବୁଧବାର ସକାଳେ ଗ୍ରୀସର ଫ୍ରାଏ ନିକଟରେ ୬.୧  ତୀବ୍ରତାର ଭୂମିକମ୍ପ ହେବା ପରେ ଏହି ଭୂମିକମ୍ପ ଆସିଛି । ଯୁକ୍ତରାଷ୍ଟ୍ର ଭୂତତ୍ତ୍ୱ ସର୍ଭେ ଅନୁଯାୟୀ, ସ୍ଥାନୀୟ ସମୟ ରାତି ୧.୫୧ ମିନିଟରେ ୭୮ କିଲୋମିଟର ଗଭୀରତାରେ ଭୂମିକମ୍ପ ହୋଇଥିଲା। ଭୂମିକମ୍ପ ଇଜିପ୍ଟର କାଇରୋ ସହିତ ଇସ୍ରାଏଲ, ଲେବାନନ, ତୁର୍କୀଏ ଏବଂ ଜୋର୍ଡାନରେ ଅନୁଭୂତ ହୋଇଥିଲା । ବୁଧବାର ଦିନ ନେପାଳରେ ୪.୬ ତୀବ୍ରତାର ଏକ ଭୂମିକମ୍ପ ଅନୁଭୂତ ହୋଇଥିଲା । କିନ୍ତୁ ଏପର୍ଯ୍ୟନ୍ତ କୌଣସି କ୍ଷୟକ୍ଷତିର ସୂଚନା ମିଳି ନାହିଁ । 

ନେପାଳର ଭୂମିକମ୍ପ ମନିଟରିଂ ସେଣ୍ଟର ଭୂମିକମ୍ପ ନେଇ ସୂଚନା ଦେଇଥିଲା । ଜାତୀୟ ଭୂମିକମ୍ପ ମନିଟରିଂ ଏବଂ ଗବେଷଣା କେନ୍ଦ୍ର ଅନୁଯାୟୀ, ଭୂମିକମ୍ପର କେନ୍ଦ୍ରସ୍ଥଳ ଦେଶର ପୂର୍ବରେ ଥିବା ସୋଲୁଖୁମ୍ବୁ ଜିଲ୍ଲାର ଛେସକାମ ଅଞ୍ଚଳରେ ଥିଲା। କାଠମାଣ୍ଡୁ ଏବଂ ଅନ୍ୟାନ୍ୟ ପଡ଼ୋଶୀ ଜିଲ୍ଲାଗୁଡ଼ିକରେ ମଧ୍ୟ ଭୂମିକମ୍ପ ଅନୁଭୂତ ହୋଇଥିଲା। ତଥାପି, ଭୂମିକମ୍ପ ଯୋଗୁଁ କୌଣସି କ୍ଷୟକ୍ଷତିର ସୂଚନା ମିଳି ନାହିଁ ।

ସେପଟେ ପାକିସ୍ତାନରେ ମଧ୍ୟ ଭୂମିକମ୍ପ ଅନୁଭୂତ ହେଉଛି । ଗୋଟିଏ ସପ୍ତାହରେ ପାକିସ୍ତାନରେ ୩ ଥର ଭୂମିକମ୍ପ ହୋଇଛି । ରିକ୍ଟର ସ୍କେଲରେ ତୀବ୍ରତା ୫ ତଳେ ଥିଲେ ହେଁ, ଆଗକୁ ବଡ଼ ଧରଣର ଭୂମିକମ୍ପ ହୋଇପାରେ ବୋଲି ଭୂ-ବିଜ୍ଞାନୀମାନେ ଆକଳନ କରିଛନ୍ତି ।