ନୟାଗଡ,୨୬/୧୨: ଭାରସାମ୍ୟ ହରାଇ ରାସ୍ତା ତଳକୁ ଖସି ପଡ଼ିଲା ସିମେଣ୍ଟ ବୋଝେଇ ଟ୍ରକ୍ । ଟ୍ରକ୍ ଭିତରେ ଚାପି ହୋଇ ଚାଳକଙ୍କ ମୃତ୍ୟୁ । ମୃତକ ଝାଡ଼ଖଣ୍ଡ ରାଜ୍ୟ କୋଡରମା ଜିଲ୍ଲାର ବୋନେଷନ୍ ଖାନ୍ ବୋଲି ଜଣାପଡ଼ିଛି । ଟ୍ରକ୍ଟି ବିଶାଖାପାଟଣାରୁ ସିମେଣ୍ଟ ନେଇ ସୁନ୍ଦରଗଡ଼ ଯାଉଥିବା ବେଳେ ନୟାଗଡ ଜିଲ୍ଲା ଦଶପଲ୍ଲା ଥାନା ବାରିହାପିଟା ଗାଁ ନିକଟରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଏକ ସିମେଣ୍ଟ ବୋଝେଇ ଟ୍ରକ୍ ବିଶାଖାପାଟଣାରୁ ସୁନ୍ଦରଗଡ଼ ଯାଉଥିଲା । ଏହି ସମୟରେ ଭାରସାମ୍ୟ ହରାଇ ବାରିହାପିଟା ଗାଁ ନିକଟରେ ରାସ୍ତା ତଳକୁ ଟ୍ରକ୍ଟି ଖସି ପଡ଼ିଥିଲା । ଫଳରେ ଗାଡ଼ିର ଚାଳକ ଜଣକ ଦୀର୍ଘ ସମୟ ଧରି ଗାଡ଼ି ଭିତରେ ଚାପି ହୋଇ ରହିଥିଲେ । ଏହା ଦେଖି ସ୍ଥାନୀୟଲୋକେ ତୁରନ୍ତ ପୋଲିସ ଏବଂ ଅଗ୍ନିଶମ ବାହିନୀକୁ ଖବର ଦେଇଥିଲେ । ଖବର ପାଇ ଘଟଣା ସ୍ଥଳରେ ଉଭୟ ପହଞ୍ଚିଥିଲେ । ସେଠାରେ ପହଞ୍ଚି ଅଗ୍ନିଶମ ବାହିନୀର ଏକ ଟିମ୍ କଟର ସାହାଯ୍ୟରେ କାଟି ଚାଳକଙ୍କ ମୃତ ଶରୀରକୁ ଗାଡିରୁ ବାହାର କରିଥିଲେ । ପୋଲିସ ଘଟଣାସ୍ଥଳରେ ପହଞ୍ଚି ବ୍ୟକ୍ତିଙ୍କ ମୃତଦେହ ଜବତ କରିଛି ।
