ନୂଆଦିଲ୍ଲୀ,୧୨/୦୮:ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣିଥରେ ଚୀନ୍ ଉପରେ ଅତିରିକ୍ତ ଶୁଳ୍କ ଲଗାଇବାର ସମୟସୀମା ବୃଦ୍ଧି କରିଛନ୍ତି। ସୋମବାର ଦିନ ଟ୍ରମ୍ପ ଏହି ନିଷ୍ପତ୍ତିକୁ ୯୦ ଦିନ ପାଇଁ ସ୍ଥଗିତ ରଖିଛନ୍ତି। ଟ୍ରମ୍ପ ଏ ସମ୍ପର୍କରେ ଏକ ଆଦେଶରେ ସ୍ୱାକ୍ଷର କରିଛନ୍ତି। ଚୀନ୍ ଏବଂ ଆମେରିକା ମଧ୍ୟରେ ଶୁଳ୍କ ଯୁଦ୍ଧର ସମୟସୀମା ଶେଷ ହେବାର ମାତ୍ର କିଛି ଘଣ୍ଟା ପୂର୍ବରୁ ଏହି ନିଷ୍ପତ୍ତି ନିଆଯାଇଛି।
ଆମେରିକୀୟ ଗଣମାଧ୍ୟମ ୱାଲ ଷ୍ଟ୍ରିଟ୍ ଜର୍ଣ୍ଣାଲ ଏବଂ ସିଏନବିସି ରିପୋର୍ଟ ଅନୁଯାୟୀ, ଟ୍ରମ୍ପ ଚୀନ ଉପରେ ଶୁଳ୍କ ଲଗାଇବା ନିଷ୍ପତିକୁ ୯୦ ଦିନ ପାଇଁ ବୃଦ୍ଧି କରିଛନ୍ତି। ଏହି ପ୍ରତିବନ୍ଧକ ମଙ୍ଗଳବାର ଶେଷ ହେବାକୁ ଯାଉଥିଲା। କେବଳ ଏତିକି ନୁହେଁ, ଟ୍ରମ୍ପ ଏହା ମଧ୍ୟ କହିଛନ୍ତି ଯେ, ସି ଜିନପିଙ୍ଗଙ୍କ ସହ ତାଙ୍କର ସମ୍ପର୍କ ବହୁତ ଭଲ ଏବଂ ଚୀନ ବହୁତ ଭଲ ବ୍ୟବହାର କରୁଛି। ଟ୍ରମ୍ପଙ୍କ ଦ୍ୱାରା ଶୁଳ୍କ ବନ୍ଦ କରିବା ପାଇଁ ସ୍ୱାକ୍ଷରିତ ଆଦେଶର ପୂର୍ଣ୍ଣାଙ୍ଗ ପାଠ୍ୟ ଏପର୍ଯ୍ୟନ୍ତ ପ୍ରକାଶିତ ହୋଇନାହିଁ। କିନ୍ତୁ ୱାଲ ଷ୍ଟ୍ରିଟ୍ ଜର୍ଣ୍ଣାଲ ଦାବି କରିଛି ଯେ, ଏହି ଛାଡ଼ ନଭେମ୍ବର ଆରମ୍ଭରେ ଶେଷ ହେବ। ସି ଜିନପିଙ୍ଗ ଏବଂ ଟ୍ରମ୍ପ ମଧ୍ୟ ଶୁଳ୍କ ସମ୍ପର୍କରେ ଫୋନ୍ରେ କଥା ହୋଇଥିଲେ। ଆଲୋଚନା ସମୟରେ ହୋଇଥିବା ସହମତିକୁ ଆମେରିକା ପାଳନ କରିବ ବୋଲି ଚୀନ୍ ଆଶା ପ୍ରକାଶ କରିଛି।
ପ୍ରକାଶ ଥାଉକି, ଚଳିତ ବର୍ଷ ଆରମ୍ଭରେ ଟ୍ରମ୍ପ ଚୀନ୍ ଉପରେ ଭାରି ଶୁଳ୍କ ଲଗାଇବାକୁ ଘୋଷଣା କରିଥିଲେ। ଏହାର ଜବାବରେ ଚୀନ୍ ମଧ୍ୟ ଆମେରିକା ଉପରେ ଭାରି ଶୁଳ୍କ ଲଗାଇଥିଲା। କିନ୍ତୁ ମେ ମାସରେ ଦୁଇ ଦେଶ ମଧ୍ୟରେ ହୋଇଥିବା ବୁଝାମଣାରେ ସାମୟିକ ଭାବରେ ଶୁଳ୍କ ହ୍ରାସ କରିବା ପାଇଁ ଏକ ଚୁକ୍ତି ହୋଇଥିଲା। ଏହା ପରେ ଟ୍ରମ୍ପ ଚୀନ୍ ଉପରେ ଶୁଳ୍କକୁ ସ୍ଥଗିତ ରଖିଥିଲେ। ଏହି ସମୟସୀମା ମଙ୍ଗଳବାର ଶେଷ ହେବାର ଥିଲା, ଯାହାକୁ ପୁଣି ଥରେ ବୃଦ୍ଧି କରାଯାଇଛି। ଚୀନ୍ ଉପରେ ଶୁଳ୍କକୁ ସ୍ଥଗିତ ରଖିବାର ଅର୍ଥ ହେଉଛି ଚୀନ୍ ରୁ ଆମେରିକା ଯାଉଥିବା ସାମଗ୍ରୀ ଉପରେ କେବଳ ୩୦ ପ୍ରତିଶତ ଶୁଳ୍କ ଲାଗୁ ହେବ। ଯେତେବେଳେ ଚୀନ୍ ଆମେରିକାରୁ ୧୦ ପ୍ରତିଶତ ଶୁଳ୍କ ଆଦାୟ କରୁଛି। ସେହିପରି ଟ୍ରମ୍ପ୍ ଭାରତ ଉପରେ ୫୦ ପ୍ରତିଶତ ଶୁଳ୍କ ଲଗାଇବାକୁ ଘୋଷଣା କରିଛନ୍ତି।
