ୱାଶିଂଟନ,୦୬/୦୩: ଆମଦାନି ଶୁଳ୍କ ନେଇ ପୁଣି ଆମେରିକା ଟାର୍ଗେଟରେ ଭାରତ । ଏଥର ଆମେରିକା କଂଗ୍ରେସର ଯୁଗ୍ମ ଅଧିବେଶନରେ ଭାରତକୁ ନାଲି ଆଖି ଦେଖାଇଛନ୍ତି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ଏପ୍ରିଲ ୨ରୁ ଯେସାକୁ ତେସା ଆମଦାନି ଶୁଳ୍କ ଲାଗୁ କରିବାକୁ ଦେଇଛନ୍ତି ଧମକ ।
ଟ୍ରମ୍ପ କହିଛନ୍ତି ଯେ, ଭାରତ ଆମ ଉପରେ ୧୦୦%ରୁ ଅଧିକ ଶୁଳ୍କ ଲଦୁଛି । ଏ ବ୍ୟବସ୍ଥା ଆମେରିକା ପାଇଁ ନ୍ୟାୟସଙ୍ଗତ ନୁହେଁ । ଏହା ଆମ ଉପରେ ଯେତିକି ଟିକସ ଲଗାଉଛି ଆମେ ମଧ୍ୟ ସମାନ ଟିକସ ଲଦିବାକୁ ତୟାର । ଆମେରିକୀୟ ଅଟୋମୋବାଇଲ କ୍ଷେତ୍ର ଉପରେ ଭାରତର ୧୦୦%ରୁ ଅଧିକ ଆମଦାନି ଶୁଳ୍କ ଗ୍ରହଣୀୟ ନୁହେଁ ।
ମୋଟା ଶୁଳ୍କ ଲଦି ଯଦି ଭାରତ ଆମକୁ ସେଠାକାର ବଜାରରୁ ବଞ୍ଚିତ ରଖୁଛି, ଆମେ ମଧ୍ୟ ସମାନ ପଦ୍ଧତି ମାଧ୍ୟମରେ ଆମ ବଜାରରୁ ସେମାନଙ୍କୁ ଦୂରେଇ ରଖିବୁ ବୋଲି ଟ୍ରମ୍ପ କହିଛନ୍ତି । ଯେଉଁ ରାଷ୍ଟ୍ର ଆମେରିକୀୟ ସାମଗ୍ରୀ ଉପରେ ଯେତିକି ଟିକସ କଷିବ ଉକ୍ତ ରାଷ୍ଟ୍ର ଉପରେ ସେତିକି ଶୁଳ୍କ ଲଗାଯିବ ବୋଲି ସେ ପ୍ରକାଶ କରିଛନ୍ତି ।
ଏକ ରିପୋର୍ଟ ଅନୁସାରେ, ଆମେରିକାର ଯେସାକୁ ତେସା ଆମଦାନି ଶୁଳ୍କ ନୀତି ଦ୍ୱାରା ପ୍ରତି ବର୍ଷ ଭାରତ ରପ୍ତାନି ବାବଦକୁ ୬୦,୦୦୦ କୋଟି ଟଙ୍କାରୁ ଅଧିକ କ୍ଷତି ସହିବ । ଇଣ୍ଡିଆ ରେଟିଙ୍ଗ୍ସ ଆଣ୍ଡ୍ ରିସର୍ଚ୍ଚ ଅନୁସାରେ, ଆମେରିକାକୁ ରପ୍ତାନି ୨୦୦ କୋଟି ଡଲାରରୁ ୩୫୦ କୋଟି ଡଲାର ଖସିଲେ ଭାରତର ଜିଡିପି ଅଭିବୃଦ୍ଧି ୦.୦୫% ରୁ .୧୦% ସଂକୁଚିତ ହୋଇପାରେ ।
ଟ୍ରମ୍ପ କହିଲେ ଯେ, ଦଶନ୍ଧି ଦଶନ୍ଧି ଧରି ଅନ୍ୟ ରାଷ୍ଟ୍ରଗୁଡ଼ିକ ଆମେରିକା ଉପରେ ମୋଟା ଶୁଳ୍କ ଲଦି ଚାଲିଛନ୍ତି । ଏବେ ଆମ ପାଳି । ଆମେ ବର୍ତ୍ତମାନ ଉକ୍ତ ରାଷ୍ଟ୍ରଗୁଡ଼ିକ ଉପରେ ସମାନ ମାତ୍ରାରେ ଟିକସ ଲଦିବୁ । ୟୁରୋପୀୟ ସଂଘ, ଚୀନ୍, ବ୍ରାଜିଲ, ଭାରତ, ମେକ୍ସିକୋ ଏବଂ କାନାଡା ଏସବୁ ରାଷ୍ଟ୍ର ଆମ ଉପରେ ଚଢ଼ା ଶୁଳ୍କ ଲଗାଉଛନ୍ତି । ଆମେ ଯେତିକି ଟିକସ ଲଗାଉଛୁ ତା’ଠାରୁ ଢେର ଗୁଣା ଅଧିକ । ଏହା ଅଯୌକ୍ତିକ । ଯେସାକୁ ତେସା ଶୁଳ୍କ ପାଇଁ ରାଷ୍ଟ୍ରଗୁଡ଼ିକ ଏବେ ପ୍ରସ୍ତୁତ ରୁହନ୍ତୁ । କାନାଡା, ମେକ୍ସିକୋ ଏବଂ ଚୀନ୍ ଟ୍ରମ୍ପଙ୍କ ଟାରିଫ୍ ବାଣକୁ ସାମ୍ନା କରୁଥିବାବେଳେ ଭାରତ ବର୍ତ୍ତମାନ ସୁଦ୍ଧା ଏଥିରୁ ବାହାରେ ଅଛି । କିନ୍ତୁ ଏପ୍ରିଲ ୨ରେ ଯେତେବେଳେ ରେସିପ୍ରୋକାଲ ଟାରିଫ୍ ରାଷ୍ଟ୍ରଗୁଡ଼ିକ ଉପରେ ଲାଗୁ ହେବ ଭାରତ ମଧ୍ୟ ବର୍ତ୍ତିପାରିବ ନାହିଁ ।
ଅର୍ଥନୀତିଜ୍ଞଙ୍କ ମତରେ, ଆମେରିକୀୟ ସାମଗ୍ରୀ ଉପରେ ଭାରତ ଯେତିକି ଆମଦାନି ଶୁଳ୍କ ଲଗାଉଛି ତାହା ଭାରତୀୟ ସାମଗ୍ରୀ ଉପରେ ଆମେରିକାର ଶୁଳ୍କ ତୁଳନାରେ ୧୦%ରୁ ଅଧିକ । ଟ୍ରମ୍ପଙ୍କ ଯେସାକୁ ତେସା ଶୁଳ୍କ ନୀତିକୁ ନେଇ ଭାରତର ଅଟୋ ଶିଳ୍ପଠାରୁ ଆରମ୍ଭ କରି କୃଷି ପର୍ଯ୍ୟନ୍ତ କ୍ଷେତ୍ର ଚିନ୍ତିତ ।
ସର୍ବାଧିକ ପ୍ରଭାବିତ ହେବାକୁ ଥିବା କ୍ଷେତ୍ରଗୁଡ଼ିକ ହେଲା କେମିକାଲ, ଧାତବ ଉତ୍ପାଦ, ଗହଣା, ଅଟୋମୋବାଇଲ, ଫାର୍ମା ଏବଂ ଖାଦ୍ୟ ସାମଗ୍ରୀ । ସିଟି ଗ୍ରୁପ୍ ବିଶେଷଜ୍ଞଙ୍କ ଅନୁସାରେ, ୨୦୨୪ରେ ଭାରତ ଆମେରିକାକୁ ପ୍ରାୟ ୭୪୦୦ କୋଟି ଡଲାର ମୂଲ୍ୟର ସାମଗ୍ରୀ ରପ୍ତାନି କରିଛି ।
ଏଥିମଧ୍ୟରେ ୮୫୦ କୋଟି ଡଲାର ମୂଲ୍ୟର ମୋତି, ରତ୍ନପଥର ଏବଂ ଗହଣା ରହିଥିବାବେଳେ ୮୦୦ କୋଟି ଡଲାର ମୂଲ୍ୟର ଫାର୍ମା ଉତ୍ପାଦ ଏବଂ ୪୦୦ କୋଟି ଡଲାର ମୂଲ୍ୟର ପେଟ୍ରୋକେମିକାଲ ରହିଛି । ୨୦୨୪ରେ ଭାରତକୁ ଆସିଛି ପ୍ରାୟ ୪୨୦୦ କୋଟି ଡଲାରର ଆମେରିକୀୟ ସାମଗ୍ରୀ । ତେବେ ଏସବୁ ସାମଗ୍ରୀ ପାଇଁ ଆମେରିକା ଯେତିକି ଟିକସ ଲଗାଉଛି ତା’ଠାରୁ ଢେର ଅଧିକ ଶୁଳ୍କ କଷୁଛି ଭାରତ । କାଠ ଉତ୍ପାଦ ଓ ଯନ୍ତ୍ରପାତିରେ ୭% ଅଧିକ, ଫୁଟ୍ୱେର୍ ଓ ପରିବହନ ଉପକରଣରେ ୧୫%ରୁ ୨୦% ଅଧିକ ଏବଂ ଖାଦ୍ୟ ସାମଗ୍ରୀରେ ପ୍ରାୟ ୬୮% ଅଧିକ ଟିକସ ଲଦୁଛି ଭାରତ ।
ଟ୍ରମ୍ପଙ୍କ ଯେସାକୁ ତେସା ଶୁଳ୍କ ନୀତି ଦ୍ୱାରା ଭାରତୀୟ କୃଷି ଉତ୍ପାଦ ଉପରେ ଅଧିକ ପ୍ରଭାବ ପଡ଼ିପାରେ । କାରଣ ଉଭୟ ଦେଶଗୁଡ଼ିକ ପକ୍ଷରୁ ଏ କ୍ଷେତ୍ରରେ ଲଗାଯାଉଥିବା ପାରସ୍ପରିକ ଶୁଳ୍କ ପାର୍ଥକ୍ୟ ଅଧିକ ରହିଛି । ବିଶେଷ କରି ଏ କ୍ଷେତ୍ରରେ କାରବାର କମ୍ ରହିଛି । କିନ୍ତୁ ଶୁଳ୍କ ପାର୍ଥକ୍ୟ ଅଧିକ । ବୟନ ଶିଳ୍ପ ସାମଗ୍ରୀ, ଚମଡ଼ା ଏବଂ କାଠ ଉତ୍ପାଦଗୁଡ଼ିକ ପାଇଁ ରିସ୍କ କମ୍ ଅଛି । କାରଣ ଉଭୟ ରାଷ୍ଟ୍ର ମଧ୍ୟରେ ଏ କ୍ଷେତ୍ରରେ ଶୁଳ୍କ ବ୍ୟବଧାନ କମ୍ ।
ଗତ ସପ୍ତାହରେ ଇଣ୍ଡିଆ ରେଟିଙ୍ଗ୍ସ ଆଣ୍ଡ୍ ରିସର୍ଚ୍ଚ ପ୍ରକାଶ କରିଥିଲା ଯେ, ଟ୍ରମ୍ପଙ୍କ ଯେସାକୁ ତେସା ଆମଦାନି ଶୁଳ୍କ ନୀତି ଲାଗୁ ହେଲେ ୨୦୨୫-୨୬ ଆର୍ଥିକବର୍ଷରେ ଆମେରିକାକୁ ଭାରତର ରପ୍ତାନି ୨୦୦ କୋଟି ଡଲାରରୁ ୭୦୦ କୋଟି ଡଲାର ପର୍ଯ୍ୟନ୍ତ ହ୍ରାସ ପାଇବ । ଚଳିତ ଆର୍ଥିକବର୍ଷର ଏପ୍ରିଲ-ଡିସେମ୍ବରରେ ଆମେରିକାକୁ ଭାରତର ରପ୍ତାନି ୫.୫୭% ବଢ଼ି ୫୯୯୩ କୋଟି ଡଲାର ରହିଛି । ସେହିଭଳି ଆର୍ଥିକ ବର୍ଷର ପ୍ରଥମ ୯ ମାସରେ ସେଠାରୁ ଭାରତକୁ ଆମଦାନି ୧.୯୧% ବଢ଼ି ୩୩୪୦ କୋଟି ଡଲାର ରହିଛି ।
ସମ୍ପ୍ରତି ଭାରତର ଶିଳ୍ପ ଏବଂ ବାଣିଜ୍ୟ ମନ୍ତ୍ରୀ ପୀୟୂଷ ଗୋୟଲ ୱାଶିଂଟନ ଗସ୍ତରେ ଅଛନ୍ତି । ସେ ଆମେରିକାର ବାଣିଜ୍ୟ ପ୍ରତିନିଧି ଜେମିସନ୍ ଗ୍ରୀର୍ଙ୍କୁ ଭେଟିବେ । ତେବେ ଏ ପରିପ୍ରେକ୍ଷୀରେ ଟାରିଫ୍ ଉପରେ ଆଲୋଚନା ହୋଇପାରେ ବୋଲି ଅନୁମାନ ରହିଛି ।
ବାଣିଜ୍ୟ ବିବାଦ କମାଇବା ପାଇଁ ଭାରତ କେତେକ ଆମେରିକୀୟ ସାମଗ୍ରୀରେ ଶୁଳ୍କ କମାଇଛି । ହାଇଏଣ୍ଡ୍ ମୋଟର୍ସାଇକେଲ୍ରେ ଶୁଳ୍କକୁ ୫୦%ରୁ ୩୦%କୁ ଏବଂ ବର୍ବନ ହ୍ୱିସ୍କିରେ ଶୁଳ୍କକୁ ୧୫୦%ରୁ ୧୦୦%କୁ ଖସାଇଛି ଭାରତ । ଅନ୍ୟାନ୍ୟ ସାମଗ୍ରୀରେ ଶୁଳ୍କ ହ୍ରାସ ଲାଗି ଭାରତ ସମୀକ୍ଷା କରୁଛି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆମେରିକା ଗସ୍ତ ସମୟରେ ଉଭୟ ଦେଶ ମଧ୍ୟରେ ଏକ ବାଣିଜ୍ୟ ଚୁକ୍ତି ନେଇ ଆଲୋଚନା ହୋଇଥିଲା । ଆଶା ଥିଲା, ଭାରତରେ ଆମେରିକୀୟ ଉତ୍ପାଦଗୁଡ଼ିକ ପାଇଁ ବଜାରକୁ ଖୋଲି ଭାରତ ଟ୍ରମ୍ପଙ୍କ ଟିକସ ବାଣରୁ ବର୍ତ୍ତିଯିବ । କିନ୍ତୁ ଏସବୁ ଆଶା ମଉଳିଯାଇଛି । ଭାରତକୁ ପୁଣି ଶୁଳ୍କ ଧମକ ଦେଇଛନ୍ତି ଟ୍ରମ୍ପ । ଏପରିକି ଆମେରିକାର ଯେସାକୁ ତେସା ଆମଦାନି ଶୁଳ୍କରୁ ବର୍ତ୍ତିବା ପାଇଁ ଭାରତ ଆଗୁଆ ଅନେକ ଆମେରିକୀୟ ସାମଗ୍ରୀ ଉପରେ ଶୁଳ୍କ କମାଇଥିଲା । ସେସବୁ କିଛି କାର୍ଯ୍ୟରେ ଆସିପାରିନାହିଁ ।
