ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ତାଙ୍କ ମୃତ୍ୟୁ ଗୁଜବକୁ ନେଇ ପ୍ରତିକ୍ରିୟା ଦେଇଛନ୍ତି । ଟ୍ରମ୍ପ ଗଣମାଧ୍ୟମକୁ କହିଛନ୍ତି ଯେ, ସେ ଏକ ସାମ୍ବାଦିକ ସମ୍ମିଳନୀରେ ଯୋଗ ଦେଇନପାରିବାରୁ ତାଙ୍କ ମୃତ୍ୟୁ ଗୁଜବ ବ୍ୟାପିଥିଲା । ସେ ଗଣମାଧ୍ୟମକୁ କହିଛନ୍ତି- ‘ମୁଁ ଲଗାତାର ଆଠଟି ପ୍ରେସ୍ କନଫରେନ୍ସ ଦେଇଥିଲି, ତା’ପରେ ଓଭାଲ୍ ଅଫିସରେ ଥିବାରୁ ଗୋଟିଏ ମିସ୍ କରିଥିଲି। ଏହା ପରେ ଗୁଜବ ବ୍ୟାପିଗଲା ଯେ ଟ୍ରମ୍ପ ଆଉ ଆମ ମଧ୍ୟରେ ନାହାନ୍ତି। ଲୋକମାନେ ମୋତେ ପଚାରିଲେ, ମହାଶୟ, ଆପଣ ଠିକ୍ ଅଛନ୍ତି କି?’ ଟ୍ରମ୍ପ କହିଛନ୍ତି ଯେ, ଏହି ମିଥ୍ୟା ଖବର ପରେ ସେ ତିନି ଘଣ୍ଟା ଧରି ଏକ ସାମ୍ବାଦିକ ସମ୍ମିଳନୀ କରିଥିଲେ। ଟ୍ରମ୍ପ ଦୁଇ ଦିନ କାମ ନକରିବା ଖବରକୁ ମଧ୍ୟ ମିଥ୍ୟା କହିଥିଲେ। ସେ କହିଛନ୍ତି ଯେ, ବାଇଡେନ ମାସ ମାସ ଧରି କାମ କରିନଥିଲେ କିନ୍ତୁ ତାଙ୍କ ବିଷୟରେ କୌଣସି ଗୁଜବ ପ୍ରସାରିତ ହୋଇନଥିଲା ।
ଆମେରିକାର ଉପରାଷ୍ଟ୍ରପତି ଜେଡି ଭାନ୍ସ ଅଗଷ୍ଟ ୨୭ ତାରିଖରେ ଏକ ସାକ୍ଷାତକାର ଦେଇଥିଲେ। ଏଥିରେ ସେ କହିଥିଲେ ଯେ, ସେ ଯେକୌଣସି ଖରାପ ପରିସ୍ଥିତିରେ ଦେଶକୁ ନେତୃତ୍ୱ ଦେବାକୁ ପ୍ରସ୍ତୁତ। ସାକ୍ଷାତକାର ପରେ ଟ୍ରମ୍ପଙ୍କ ସ୍ୱାସ୍ଥ୍ୟ ସମ୍ପର୍କିତ ଗୁଜବ ବ୍ୟାପିବାକୁ ଲାଗିଲା । ଏହା ପରେ ଗତ ସପ୍ତାହରେ ସୋସିଆଲ ମିଡିଆରେ ଟ୍ରମ୍ପଙ୍କ ସ୍ୱାସ୍ଥ୍ୟ ସମ୍ପର୍କିତ ପୋଷ୍ଟ ଟ୍ରେଣ୍ଡ କରିବା ଆରମ୍ଭ କରିଥିଲା । ୬୦ ହଜାରରୁ ଅଧିକ ପୋଷ୍ଟ ସେୟାର କରାଯାଇଥିଲା । ଯେଉଁଥିରେ 'ଟ୍ରମ୍ପ ମୃତ' ବୋଲି ଟ୍ରେଣ୍ଡ କରିଥିଲା । ଅନେକ ଏକ୍ସ ବ୍ୟବହାରକାରୀ ଦାବି କରିଥିଲେ ଯେ, ଟ୍ରମ୍ପ ଗତ ୨୪ ଘଣ୍ଟା ଧରି ଦେଖାଯାଇ ନାହାନ୍ତି। ଚଳିତ ବର୍ଷ ଜୁଲାଇରେ ୭୯ ବର୍ଷୀୟ ଟ୍ରମ୍ପଙ୍କ ହାତରେ ଆଘାତ ଚିହ୍ନ ଏବଂ ଗୋଡ ଫୁଲିଥିବାର ଫଟୋ ସାମ୍ନାକୁ ଆସିଥିଲା। ସେବେଠାରୁ ଟ୍ରମ୍ପଙ୍କ ସ୍ୱାସ୍ଥ୍ୟାବସ୍ଥା ଉପରେ ଆଲୋଚନା ଆରମ୍ଭ ହୋଇଥିଲା।
ଅଗଷ୍ଟ ୨୫ ତାରିଖରେ ଦକ୍ଷିଣ କୋରିଆ ରାଷ୍ଟ୍ରପତି ଲି ଜାଏ-ମ୍ୟୁଙ୍ଗଙ୍କ ସହ ସାକ୍ଷାତ ସମୟରେ ଟ୍ରମ୍ପଙ୍କ ଡାହାଣ ହାତରେ ଏକ ଆଘାତ ଚିହ୍ନ ଦେଖାଯାଇଥିଲା । ଏହାକୁ ମେକଅପ୍ ସାହାଯ୍ୟରେ ଲୁଚାଇବାକୁ ଚେଷ୍ଟା କରାଯାଇଥିଲା । ପୂର୍ବରୁ ଫେବୃଆରୀରେ ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରନ ଏବଂ ଜୁଲାଇରେ ୟୁରୋପୀୟ କମିଶନ ଅଧ୍ୟକ୍ଷ ଉର୍ସୁଲା ଭନ୍ ଡେର ଲେଏନଙ୍କ ସହ ସାକ୍ଷାତ ସମୟରେ ଟ୍ରମ୍ପଙ୍କ ହାତରେ କ୍ଷତଚିହ୍ନ ଏବଂ ମେକଅପ୍ ଚିହ୍ନ ଦେଖାଯାଇଥିଲା । ଜୁଲାଇ ମାସରେ, ହ୍ୱାଇଟ୍ ହାଉସ୍ ପ୍ରେସ୍ ସଚିବ କାରୋଲିନ୍ ଲେଭିଟ୍ କହିଥିଲେ, ‘ରାଷ୍ଟ୍ରପତି ଟ୍ରମ୍ପ ତାଙ୍କର ଅଧିକାଂଶ ସମୟ ସାଧାରଣ ସ୍ଥାନରେ ବିତାଇଥାନ୍ତି ଏବଂ ପ୍ରତିଦିନ ଶହ ଶହ ଲୋକଙ୍କ ସହିତ ହାତ ମିଳାନ୍ତି। ଏହି କାରଣରୁ ଏହି ଚିହ୍ନଗୁଡ଼ିକ ସୃଷ୍ଟି ହୋଇଛି।’ ଟ୍ରମ୍ପଙ୍କ ଡାକ୍ତର ସିଆନ୍ ବାର୍ବାବେଲା କହିଛନ୍ତି ଯେ, ବାରମ୍ବାର ହାତ ଥରିବା ଏବଂ ହୃଦରୋଗକୁ ରୋକିବା ପାଇଁ ନିଆଯାଉଥିବା ଆସ୍ପିରିନ୍ (ପେନ୍କିଲର୍) ବ୍ୟବହାର ଯୋଗୁଁ ଏହି ଚିହ୍ନ ହୋଇଥିଲା। ସେ କହିଛନ୍ତି ଯେ, ଏହା ଏକ ସାଧାରଣ ସମସ୍ୟା ।
୧୩ ଜୁଲାଇ, ୨୦୨୫ରେ ନ୍ୟୁ ଜର୍ସିର ମେଟଲାଇଫ୍ ଷ୍ଟାଡିୟମରେ ଫିଫା କ୍ଲବ୍ ବିଶ୍ୱକପ୍ ଫାଇନାଲ୍ ସମୟରେ ଟ୍ରମ୍ପଙ୍କ ପାଦ ଫୁଲିଥିବା ଦେଖାଯାଇଥିଲା। ତା'ପରେ ୧୬ ଜୁଲାଇରେ ବାହାରିନ୍ ପ୍ରଧାନମନ୍ତ୍ରୀ ସଲମାନ୍ ବିନ୍ ହମାଦ୍ ଅଲ୍ ଖଲିଫାଙ୍କ ସହ ସାକ୍ଷାତ ସମୟରେ ଟ୍ରମ୍ପଙ୍କ ହାତରେ ଆଘାତ ଲାଗିଥିବାର ଫଟୋ ସାମ୍ନାକୁ ଆସିଥିଲା। ଏହା ପରେ ସୋସିଆଲ ମିଡିଆରେ ବିତର୍କ ହୋଇଥିଲା ଯେ, ଟ୍ରମ୍ପ ତାଙ୍କ ସ୍ୱାସ୍ଥ୍ୟ ସମସ୍ୟାକୁ ଲୁଚାଉଛନ୍ତି । ହ୍ୱାଇଟ୍ ହାଉସ୍ କହିଥିଲା ଯେ, ଟ୍ରମ୍ପଙ୍କ ଗୋଡର ତଳ ଭାଗରେ ସାମାନ୍ୟ ଫୁଲିଛି । ଏହା ପରେ ସେ ନିଜର ପରୀକ୍ଷା କରାଇଥିଲେ ଏବଂ ରିପୋର୍ଟକୁ ସମସ୍ତଙ୍କ ସହିତ ସେୟାର କରିବାକୁ ନିର୍ଦ୍ଦେଶ ଦେଇଥିଲେ।
