ନୂଆଦିଲ୍ଲୀ,୦୨/୧୨: ଆମେରିକାର ନବନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବ୍ରିକ୍ସ ଦେଶ ଗୁଡିକ ଉପରେ ଟିକସ ଲଗାଇବା ଲାଗି ଧମକ ଦେଇଛନ୍ତି । ଏ ନେଇ ସୋସିଆଲ ମିଡିଆରେ ସେ ଏକ ପୋଷ୍ଟ ଶେୟାର କରିଛନ୍ତି । ଆମେରିକା ଡଲାର ବ୍ୟତୀତ ଅନ୍ୟ କୌଣସି ମୁଦ୍ରାରେ କାରବାର କଲେ ୧୦୦% ଟାରିଫ ଲଗାଇବେ ବୋଲି କହିଛନ୍ତି ଟ୍ରମ୍ପ ।
ଟ୍ରମ୍ପ ଶନିବାର କହିଛନ୍ତି, ଡଲାର ବ୍ୟତୀତ ଅନ୍ୟ କୌଣସି ମୁଦ୍ରାରେ କାରବାର ଯେଭଳି ନ ହେବ ସେ ନେଇ ବ୍ରିକ୍ସ ଦେଶ ଗୁଡିକଠାରୁ ପ୍ରତିଶ୍ରୁତି ଆବଶ୍ୟକ । ଦେଶ ଗୁଡିକ କୌଣସି ନୂଆ କରେନ୍ସି ଆଣିବେନି କିମ୍ବା ଅନ୍ୟ ଦେଶର ମୁଦ୍ରାରେ କାରବାର ମଧ୍ୟ କରିବେନି । ଯଦି ଦେଶ ଗୁଡିକ ଏହାକୁ ନ ମାନନ୍ତି ତେବେ ଆମେରିକାକୁ ରପ୍ତାନି ଉପରେ ୧୦୦% ଟିକସ ଲାଗୁ କରାଯିବ ।
ଏଭଳି କଲେ ଆମେରିକା ବଜାରରେ ସେମାନଙ୍କ ସାମଗ୍ରୀ ବିକ୍ରି ହେବ ବୋଲି ଦେଶ ଗୁଡିକ ଭୁଲିଯିବା ଆବଶ୍ୟକ । ବ୍ୟବସାୟ କ୍ଷେତ୍ରରେ ଡଲାର ବାଦ ଅନ୍ୟ କୌଣସି ମୁଦ୍ରାର ସ୍ଥାନ ନାହିଁ । ଯଦି କୌଣସି ଦେଶ ଏଭଳି କରୁଛି ତେବେ ସେ ଆମେରିକା ସହ କାରବାରକୁ ଭୂଲିଯାଉ ବୋଲି ଟ୍ରମ୍ପ ନାଲି ଆଖି ଦେଖାଇଛନ୍ତି ।
ବ୍ରିକ୍ସରେ ଏବେ ଭାରତ, ରୁଷ ଚୀନ ସହ ଅନ୍ୟ ୯ ଦେଶ ସାମିଲ ରହିଛନ୍ତି । ଏହା ମଧ୍ୟରେ ଅଭିବୃଦ୍ଧିଶୀଳ ଅର୍ଥନୀତିଗୁଡିକ ମଧ୍ୟ ରହିଛନ୍ତି । ବ୍ରିକ୍ସରେ ଥିବା ଦେଶ ଗୁଡିକ ମଧ୍ୟରେ ଏବେ ସୁଦ୍ଧା କୌଣସି ମୁଦ୍ରା ଆଣିବା ନେଇ ସହମତି ପ୍ରକାଶ ପାଇନି । ଏ ନେଇ ଆନୁଷ୍ଠାନିକ ଭାବେ ମଧ୍ୟ କୌଣସି ବୟାନ ଜାରି କରାଯାଇନି । ଚଳିତ ବର୍ଷ ରୁଷରେ ବ୍ରିକ୍ସ ଦେଶ ଗୁଡିକର ସମ୍ମିଳନୀ ଆଗରୁ ଏଭଳି କରେନ୍ସି ନେଇ ବେଶ ଚର୍ଚ୍ଚା ଧରିଥିଲା ।
ତେବେ ସମିଟ ଆଗରୁ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ କହିଥିଲେ, ଏଭଳି କରେନ୍ସି ଆଣିବା ଲାଗି ବ୍ରିକ୍ସ ସଙ୍ଗଠନ କୌଣସି ପ୍ରକାର ବିଚାର କରୁନି । ତେବେ ଏହି ସମିଟରେ ବ୍ରିକ୍ସ ଦେଶ ଗୁଡିକର ପେମେଣ୍ଟ ସିଷ୍ଟମକୁ ନେଇ ବେଶ ଚର୍ଚ୍ଚା ହୋଇଥିଲା । ଗ୍ଲୋବାଲ ସ୍ୱିଫ୍ଟ ପେମେଣ୍ଟ ସିଷ୍ଟମକୁ ଟକ୍କର ଦେବା ଲାଗି ଏଭଳି ନିଷ୍ପତ୍ତି ହୋଇଥିଲା । ୧୯୭୩ରେ ୨୨ ଦେଶର ୫୧୮ ବ୍ୟାଙ୍କ ସହ ସ୍ୱିଫ୍ଟ ନେଟୱର୍କ ଆରମ୍ଭ ହୋଇଥିଲା । ଏବେ ଏଥିରେ ୨୦୦ରୁ ଉଦ୍ଧ୍ୱର୍ ଦେଶ ଏବଂ ୧୧ ହଜାର ବ୍ୟାଙ୍କ ସାମିଲ ହୋଇଛନ୍ତି ।
ଏମାନେ ଆମେରିକା ବ୍ୟାଙ୍କରେ ନିଜର ବିଦେଶୀ ମୁଦ୍ରା ଭଣ୍ଡାର ରଖୁଛନ୍ତି । ସବୁ ଅର୍ଥ ବ୍ୟବସାୟ କ୍ଷେତ୍ରରେ ଲାଗିନ ଥାଏ । ଏହି ବ୍ୟାଙ୍କ ଗୁଡିକର ଏହାର କିଛି ଅଂଶକୁ ଆମେରିକା ବଣ୍ଡ୍ ବଜାରରେ ନିବେଶ କରିଥାନ୍ତି । ଏଥିରୁ ସେମାନେ କିଛି ସୁଧ ପାଇଥାନ୍ତି । ସବୁ ଦେଶ ମିଳିତ ଭାବେ ୭.୮ ଲକ୍ଷ କୋଟି ଡଲାର ଜମା ରଖିଛନ୍ତି । ଯାହା ଭାରତୀୟ ଜିଡିପିର ୨ ଗୁଣ । ଏହି ଅର୍ଥକୁ ଆମେରିକା ଏହାର ବିକାଶ କାର୍ଯ୍ୟରେ ଲଗାଉଛି । ସ୍ୱିଫ୍ଟ ନେଟୱର୍କ ଦ୍ୱାରା ଆମେରିକା ବସିବସି ଡଲାରରେ ଆୟ କରେ ।
ତେବେ ଟ୍ରମ୍ପଙ୍କ ଏଭଳି ଧମକକୁ ନେଇ ପ୍ରତିକ୍ରିୟା ରଖିଛି ଥିଙ୍କ ଟ୍ୟାଙ୍କ ଗ୍ଲୋବାଲ ଟ୍ରେଡ ରିସର୍ଚ୍ଚ ଇନିସିଏଟିଭ (ଜିଟିଆର୍ଆଇ) । ଏହା କହିଛି ଯେ, ଟ୍ରମ୍ପଙ୍କ ଧମକ ଅବାସ୍ତବ । ସ୍ଥାନିୟ ଏଜେନ୍ସି ଟ୍ରେଡିଂ ସିଷ୍ଟମ ବିକାଶ ଉପରେ ଧ୍ୟାନ କେନ୍ଦ୍ରିତ କରୁ ଭାରତ । ୨୦୦୯ରେ ସ୍ଥାପିତ ହୋଇଥିବା ବ୍ରିକ୍ସ ଏକ ପ୍ରମୁଖ ଅନ୍ତର୍ଜାତୀୟ ଗ୍ରୁପ ଯେଉଁଥିରେ ଆମେରିକା ପ୍ରତିନିଧିତ୍ୱ କରୁନି ।
ବ୍ରିକ୍ସର ଅନ୍ୟ ଦେଶ ଗୁଡିକ ମଧ୍ୟ ଦକ୍ଷିଣ ଆଫ୍ରିକା, ଇରାନ, ଇଜିପ୍ଟ, ଇଥିଓପିଆ ଏବଂ ୟୁଏଇ ରହିଛି । ଗତ କିଛି ବର୍ଷ ହେବ ରୁଷ ଏବଂ ଚୀନ ଭଳି ସଦସ୍ୟ ରାଷ୍ଟ୍ର ଗୁଡିକ ଆମେରିକା ଡଲାରର ବିକଳ୍ପ ଭାବେ ନିଜସ୍ୱ ବ୍ରିକ୍ସ କରେନ୍ସି ଆଣିବା ଉପରେ ଚିନ୍ତା କରୁଛନ୍ତି । ତେବେ ଭାରତ ବିଧିବଦ୍ଧ ଭାବେ ଏହି ଯୋଜନାରେ ସାମିଲ ହେବା ନେଇ କିଛି ସ୍ପଷ୍ଟ କରିନି । ଶନିବାର ବ୍ରିକ୍ସ ଦେଶ ଗୁଡିକର ଏଭଳି ପଦକ୍ଷେପକୁ ନେଇ ଟ୍ରମ୍ପ ଖୋଲାଖୋଲି ଭାବେ ବିରୋଧ କରିଛନ୍ତି ।
ଜିଟିଆର୍ଆଇ କହିଛି ଯେ, ଟ୍ରମ୍ପ ଯଦି ପ୍ରକୃତରେ ଏଭଳି ଟିକସ ଲଗାନ୍ତି ଆମେରିକା ଗ୍ରାହକ ଏହା ଦ୍ୱାରା କ୍ଷତିଗ୍ରସ୍ତ ହେବେ । କାରଣ ଦେଶ ଗୁଡିକରୁ ଆମେରିକାକୁ ରପ୍ତାନି ବେଶ ମହଙ୍ଗା ହୋଇଯିବ । ବିଶ୍ୱ ବାଣିଜ୍ୟ କ୍ଷତିଗ୍ରସ୍ତ ହେବା ସହ କ୍ଷତି ସହୁଥିବା ଦେଶ ଗୁଡିକ ପାଲଟା ଟିକସ ଲଗାଇବା ଲାଗି ଅଡି ବସିବେ।
