ନୂଆଦିଲ୍ଲୀ: ଅଭିନେତା ବିଜୟଙ୍କ ତାମିଲଗା ଭେଟ୍ରି କାଝାଗମ (ଟିଭିକେ) ଦଳ ଆସନ୍ତା ବର୍ଷ ତାମିଲନାଡୁ ବିଧାନସଭା ନିର୍ବାଚନରେ ଡେବ୍ୟୁ କରିବ । ମଦୁରାଇରେ ଅନୁଷ୍ଠିତ ଦଳର ଦ୍ୱିତୀୟ ରାଜ୍ୟ ସମ୍ମିଳନୀ ସମୟରେ ବିଜୟ କହିଛନ୍ତି ଯେ, ତାଙ୍କ ଦଳ ଅନେକ ଆସନରେ ପ୍ରତିଦ୍ୱନ୍ଦ୍ୱିତା କରିବ । ଏପରିକି ଟିଭିକେ ଶାସକ ଡିଏମକେ କିମ୍ବା ବିଜେପି ସହିତ ମେଣ୍ଟ କରିବ ନାହିଁ ବୋଲି ସେ ସ୍ପଷ୍ଟ କରିଛନ୍ତି ।
ବିଜୟ କହିଛନ୍ତି ଯେ, ଟିଭିକେ ସମ୍ପୂର୍ଣ୍ଣ ଏକାକୀ ନିର୍ବାଚନ ଲଢ଼ିବ । ବିଜୟ ବିଜେପିକୁ ଦଳର "ଏକମାତ୍ର ଆଦର୍ଶଗତ ବିରୋଧୀ" ଏବଂ ଡିଏମକେକୁ "ଏକମାତ୍ର ରାଜନୈତିକ ବିରୋଧୀ" ବୋଲି କହିଛନ୍ତି । ତାମିଲନାଡୁରେ ୨୦୨୬ ନିର୍ବାଚନ କେବଳ ଡିଏମକେ ଏବଂ ଟିଭିକେ ମଧ୍ୟରେ ହେବ ବୋଲି ସେ ଦାବି କରିଛନ୍ତି ।
ଏହି କାର୍ଯ୍ୟକ୍ରମରେ ବହୁ ସଂଖ୍ୟକ ସମର୍ଥକ ଉପସ୍ଥିତ ଥିଲେ । ଏହି ସମୟରେ ବିଜୟ କୌଣସି ପ୍ରମୁଖ ଦଳ ସହିତ ମେଣ୍ଟ ନକରି ତାଙ୍କ ଦଳ ଏକାକୀ ଆଗାମୀ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବ ବୋଲି ସ୍ପଷ୍ଟ କରିଛନ୍ତି । ଆଜିର ଏହି ମେଗା କାର୍ଯ୍ୟକ୍ରମରେ ଥଲାପତି ବିଜୟଙ୍କ ହଜାର ହଜାର ପ୍ରଶଂସକ ଯୋଗ ଦେଇଥିଲେ । ଅଭିନେତା ବିଜୟ ନିଜର ରାଜନୈତିକ ଦଳ ଲଞ୍ଚ କରିବା ପାଖରୁ ବିଭିନ୍ନ ଦଳୀୟ କାର୍ଯ୍ୟକ୍ରମରେ ଲୋକଙ୍କ ଗହଳି ସମସ୍ତଙ୍କ ଦୃଷ୍ଟି ଆକର୍ଷଣ କରିଆସିଛି । ଆଜି ମଦୁରାଇରେ ମଧ୍ୟ ସମାନ ଚିତ୍ର ଦେଖିବାକୁ ମିଳିଛି । କିନ୍ତୁ ଏହି ଭିଡ଼ ଭୋଟ ରାଜନୀତିରେ ବିଜୟଙ୍କୁ କିଭଳି ସମର୍ଥନ କରିବ ତା ଉପରେ ସମସ୍ତଙ୍କ ନଜର ରହିବ ।
