ପୁରୀ,୦୪/୦୨: ବଳିଆପଣ୍ଡା ଓ ସମୁଦ୍ର କୂଳ ଥାନା ଅଞ୍ଚଳରେ ଦାଦାବଟି ମାଗି ଆକ୍ରମଣ ଓ ଲୁଟ୍ ହୋଇଛି । ୨ ଜଣ ବ୍ୟବସାୟୀଙ୍କ ମଧ୍ୟରେ ଲାଗିଥିବା ବିବାଦକୁ କେନ୍ଦ୍ର କରି ଆକ୍ରମଣ ଓ ପ୍ରତିଆକ୍ରମଣ ଘଟିଥିବା ବେଳେ ଉଭୟ ପକ୍ଷରୁ ଦାଦାବଟି ମାଗି ଆକ୍ରମଣ ଓ ଲୁଟ୍ ଅଭିଯୋଗ ହୋଇଛି । ୨ ଥାନା ପୁଲିସ ମାମଲା ରୁଜୁ କରି ୩ ଜଣଙ୍କୁ ଗିରଫ କରିଛି । ସମୁଦ୍ର କୂଳ ଥାନା ପୁଲିସ ଗିରଫ କରିଥିବା ଜଣେ ଅଭିଯୁକ୍ତ ହେଲା ବଳିଆପଣ୍ଡା ଥାନା ଅଧୀନ ବିଜୟ ନଗର ଧୋବାଖାଲର ଲଳିତ ମୋହନ ସାହୁ (୨୩) । ବଳିଆପଣ୍ଡା ଥାନା ପୁଲିସ ଗିରଫ କରିଥିବା ୨ ଜଣ ଅଭିଯୁକ୍ତ ହେଲେ ଏହି ଥାନା ଅଧୀନ ଜନମଙ୍ଗଳ ସମିତି ଲେନ୍ର ଭରତ ସ୍ୱାଇଁ ଓରଫ ଡୁଗୁ(୨୫) ଓ ଶିବଶକ୍ତି ସାହିର ବିକ୍ରମ କୁମାର ପ୍ରଧାନ ଓରଫ ଗେଟୁ(୨୮) । ଅଭିଯୁକ୍ତ ଲଳିତ ମାଡ଼ରେ ଅନ୍ୟ ୨ ଅଭିଯୁକ୍ତଙ୍କ ସାଙ୍ଗ ଶିବଶକ୍ତି ସାହିର ଜଗନ୍ନାଥ ପ୍ରଧାନ(୨୪) ଗୁରୁତର ଆହତ ହୋଇ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଛି ।
ଖବର ଅନୁସାରେ ଜଗନ୍ନାଥ ବଳିଆପଣ୍ଡା ପାର୍କ ଛକ ଠାରେ ଏକ ଚିକେନ୍ ଦୋକାନ କରିଛି । ଏପରିକି ବିଭିନ୍ନ ହୋଟେଲ୍କୁ ଚିକେନ୍ ବିକ୍ରି କରିଥାଏ । ଜଗନ୍ନାଥର ମା’ ସାରଥୀ ପ୍ରଧାନ ଏତଲା ଦେଇଛନ୍ତି ଯେ, ଲଳିତ ତାଙ୍କ କୁକୁଡ଼ା ଦୋକାନକୁ ଆସି ବାରମ୍ବାର ୫୦ ହଜାର ଟଙ୍କା ବଟି ମାଗୁଥିଲା । ଜଗନ୍ନାଥ ଗତ ୧ ତାରିଖ ରାତିରେ ଚିକେନ୍ ଯୋଗାଇଥିବା ହୋଟେଲ୍ମାନଙ୍କରୁ କଲେକ୍ସନ୍ ସାରି ଫେରୁଥିବା ବେଳେ ସ୍ୱର୍ଗଦ୍ୱାର ନିକଟରେ ଲଳିତ ଓ ତା’ ସାଙ୍ଗମାନେ ଅଟକାଇ ତାକୁ ନିସ୍ତୁକ ମାଡ଼ ମାରି ଗୋଡ଼ରେ ଗାଡ଼ି ଚଢ଼ାଇ ଦେବା ସହ ପକେଟରୁ ୩୦ ହଜାର ଟଙ୍କା ଛଡ଼ାଇ ନେଇଥିଲେ । ଜଗନ୍ନାଥକୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସା ହେଉଥିବା ଅଭିଯୋଗ କରିଛନ୍ତି ସାରଥୀ । ଏହି ମାମଲାରେ ଲଳିତ ଗିରଫ ହୋଇଥିବା ବେଳେ ତା’ ସାଙ୍ଗମାନେ ଫେରାର୍ ରହିଛନ୍ତି ।
ସେହିପରି ଲଳିତ ଅଭିଯୋଗ କରିଛି, ସେ ଲାଇଟ୍ ହାଉସ୍ ପାଖରେ ଚା’ ଦୋକାନ କରିଛି । ଗତ ୧ ତାରିଖ ରାତି ୭ଟାରେ ଜଗନ୍ନାଥ, ତା’ ୩ ଜଣ ସାଙ୍ଗ ଆସି ୫୦ ହଜାର ଟଙ୍କା ଦାଦାବଟି ମାଗିଥିଲେ । ନ ହେଲେ ଦୋକାନ ଜାଳି ଦେବେ ବୋଲି ଧମକ ଦେଇଥିଲେ । ରାତି ସାଢ଼େ ୧୦ଟାରେ ଲଳିତ ଅନ୍ୟ ଏକ ଦୋକାନରୁ କଲେକ୍ସନ୍ ସାରି ଫେରୁଥିବା ବେଳେ ଜଗନ୍ନାଥ ଓ ତା’ ସାଙ୍ଗମାନେ ସଙ୍ଘବଦ୍ଧ ଭାବେ ମାରଣାସ୍ତ୍ରରେ ଆକ୍ରମଣ କରି ୫ ହଜାର ୫ ଶହ ଟଙ୍କା, ସୁନା ଚେନ୍ ଛଡ଼ାଇ ନେଇଥିଲେ । ଏହାପରେ ଲଳିତର ଚା’ ଦୋକାନକୁ ସେମାନେ ଜାଳି ଦେଇଥିବା ମଧ୍ୟ ସେ ଅଭିଯୋଗ କରିଛି । ବଳିଆପଣ୍ଡା ଥାନା ପୁଲିସ ରୁଜୁ କରିଥିବା ମାମଲାରେ ୨ ଜଣଙ୍କୁ ଗିରଫ କରି ପୋଡ଼ି ଯାଇଥିବା ଦୋକାନର ଅଂଶବିଶେଷ ଜବତ କରିଛି । ଉଭୟ ମାମଲାରେ ଏକାଧିକ ଅଭିଯୁକ୍ତ ଫେରାର୍ ଥିବା ବେଳେ ସେମାନଙ୍କୁ ଖୁବ୍ଶୀଘ୍ର ଗିରଫ କରାଯିବ ବୋଲି ଦୁଇ ଥାନା ପୁଲିସ ପକ୍ଷରୁ ସୂଚନା ମିଳିଛି ।
