ନୂଆଦିଲ୍ଲୀ ୦୪/୦୪: ଲୋକସଭାରେ ୱାକଫ ସଂଶୋଧନ ବିଲ୍କୁ ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ଜେଡିୟୁ ସମର୍ଥନ କରିବା ପରେ ତାକୁ ନେଇ ଦଳରେ ବିବାଦ ଆରମ୍ଭ ହୋଇଛି । ଏହି ପରିପ୍ରେକ୍ଷୀରେ ଦଳର ଦୁଇଜଣ ବରିଷ୍ଠ ନେତା ଇସ୍ତଫା ଦେଇଛନ୍ତି । ସେମାନେ ହେଲେ ମହମ୍ମଦ କାସିମ ଅନସାରୀ ଓ ମହମ୍ମଦ ନୱାଜ ମଲିକ । ସେମାନେ ନିଜ ନିଜର ଇସ୍ତଫାପତ୍ର ନୀତୀଶଙ୍କ ନିକଟକୁ ପଠାଇ ଦେଇଛନ୍ତି ।
ଅନ୍ସାରୀ ତାଙ୍କ ଇସ୍ତଫାପତ୍ରରେ ଉଲ୍ଲେଖ କରିଛନ୍ତି ଯେ ଜେଡିୟୁ ଧର୍ମନିରପେକ୍ଷ ବିଚାରଧାରା ଓ ଭୋଟକୁ ସୁରକ୍ଷିତ ରଖେ ବୋଲି ତାଙ୍କ ଭଳି ଲକ୍ଷ ଲକ୍ଷ ମୁସଲିମ୍ ବିଶ୍ୱାସ କରିଆସୁଛନ୍ତି । କିନ୍ତୁ ୱାକଫ ବିଲ୍ ସପକ୍ଷରେ ଜେଡିୟୁ ଭୋଟ ଦେଇ ସେମାନଙ୍କ ବିଶ୍ୱାସ ଭାଙ୍ଗି ଦେଇଛି । ଏହା ତାଙ୍କୁ ମଧ୍ୟ ଗଭୀର ଅଘାତ ଦେଇଛି । ଜେଡିୟୁ ନେତା ତଥା କେନ୍ଦ୍ରମନ୍ତ୍ରୀ ଲଲନ ସିଂହ ଲୋକସଭାରେ ବିଲ୍କୁ ଯେଭଳି ଦୃଢ଼ ସମର୍ଥନ କଲେ ତାହା ତାଙ୍କୁ ମର୍ମାହତ କରିଛି ।
ୱାକଫ ବିଲ ଭାରତୀୟ ମୁସଲିମଙ୍କ ବିରୋଧୀ । ତେଣୁ ଏହାକୁ ସେ ଗ୍ରହଣ କରିପାରିବେ ନାହିଁ । ଅନେକ ଦିନ ଧରି ସେ ଦଳରେ ରହିଥିଲେ। ହେଲେ ଦଳର ଏଭଳି ଆଭିମୁଖ୍ୟ ତାଙ୍କୁ ଆଘାତ ଦେଇଥିବାରୁ ସେ ଦଳର ପ୍ରାଥମିକ ସଦସ୍ୟତା ଓ ଅନ୍ୟ ସବୁ ପଦ ପଦବିରୁ ଇସ୍ତଫା ଦେଉଛନ୍ତି । ସେହିଭଳି ମଲିକ ହେଉଛନ୍ତି ଜେଡିୟୁ ସଂଖ୍ୟାଲଘୁ ସାମ୍ମୁଖ୍ୟର ରାଜ୍ୟ ସମ୍ପାଦକ । ସେ ନିୀତୀଶଙ୍କୁ ପଠାଇଥିବା ଇସ୍ତଫାପତ୍ରରେ ଲେଖିଛନ୍ତି ଯେ ୱାକଫ ବିଲ୍ ସମ୍ବିଧାନ ପ୍ରଦତ୍ତ ମୌଳିକ ଅଧିକାରର ଉଲ୍ଲଂଘନ କରୁଛି । ବିଲ୍ ମାଧ୍ୟମରେ ମୁସଲିମଙ୍କୁ ଅପମାନିତ କରାଯାଉଛି । ଆପଣ କିମ୍ବା ଆପଣଙ୍କ ଦଳ ଏକଥା ଉଠାଉନାହିଁ ବୋଲି ସେ ଲେଖିଛନ୍ତି ।
