ନୂଆଦିଲ୍ଲୀ: ମହାରାଷ୍ଟ୍ରର ଶିଳ୍ପ ମନ୍ତ୍ରୀ ତଥା ଏକନାଥ ସିନ୍ଦେ ଗୋଷ୍ଠୀର ନେତା ଉଦୟ ସାମନ୍ତ ଏବେ ଏକ ବଡ ବୟାନ ଦେଇଛନ୍ତି। ସେ କହିଛନ୍ତି ଯେ, ରାଜ ଠାକରେ ସିନ୍ଦେ ଗୋଷ୍ଠୀର ଶିବସେନାରେ ଯୋଗ ଦେଇପାରନ୍ତି। ସାମନ୍ତ କହିଛନ୍ତି ଯେ, ଠାକରେ ଭାଇ ମାନେ ଆଜି ଏକାଠି ଅଛନ୍ତି, କିନ୍ତୁ ଭବିଷ୍ୟତରେ ସେମାନେ ଏକାଠି ରହିବେ କି ନାହିଁ ତାହା କହିବା କଷ୍ଟକର। ସେ ଏହା ମଧ୍ୟ କହିଛନ୍ତି ଯେ, ରାଜନୀତିରେ କେହି କେବେ ବନ୍ଧୁ କିମ୍ବା ଶତ୍ରୁ ନୁହଁନ୍ତି। ରାଜ ଠାକରେ ଭବିଷ୍ୟତରେ ଆମ ସହିତ ଯୋଗ ଦେଇପାରନ୍ତି। କାହିଁକି ନୁହେଁ ? ସେ ନିଶ୍ଚିତ ଭାବରେ କରିପାରିବେ ।
ଶିଳ୍ପ ମନ୍ତ୍ରୀ ଉଦୟ ସାମନ୍ତ ମଧ୍ୟ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବୀସଙ୍କ ଡାଭୋସ୍ ଗସ୍ତ ବିଷୟରେ ଉଲ୍ଲେଖ କରିଛନ୍ତି। ସେ କହିଛନ୍ତି କି, "ରାଜ୍ୟ ସରକାରଙ୍କ ସାମ୍ପ୍ରତିକ ଡାଭୋସ୍ ଗସ୍ତ ଅତ୍ୟନ୍ତ ସଫଳ ହୋଇଥିଲା। ଏହି ଗସ୍ତ ସମୟରେ, ମହାରାଷ୍ଟ୍ର ୫୧ ଟି ବୁଝାମଣାପତ୍ର (MoU) ସ୍ୱାକ୍ଷର କରିଛି, ଯାହାର ମୋଟ ନିବେଶ ପରିମାଣ ୧୬ ଲକ୍ଷ କୋଟି।" ସାମନ୍ତଙ୍କ ଅନୁଯାୟୀ, ମହାରାଷ୍ଟ୍ର ଏପର୍ଯ୍ୟନ୍ତ ୩୭ ଲକ୍ଷ କୋଟି ଟଙ୍କାର ବୁଝାମଣାପତ୍ର ସ୍ୱାକ୍ଷର କରିଛି।
୪୦ ରୁ ୪୨ ଲକ୍ଷ ଯୁବକ ନିଯୁକ୍ତି ପାଇବାର ସମ୍ଭାବନା…
ସେ କହିଛନ୍ତି ଯେ ଏହି ବୁଝାମଣାପତ୍ର ରାଜ୍ୟର ୪୦ ରୁ ୪୨ ଲକ୍ଷ ଯୁବକଙ୍କୁ ନିଯୁକ୍ତି ପ୍ରଦାନ କରିବାର ସମ୍ଭାବନା ଅଛି। ଏହି ସମୟରେ, ଗତ ବର୍ଷ ଡାଭୋସରେ ସ୍ୱାକ୍ଷରିତ ହୋଇଥିବା ନିବେଶ ଚୁକ୍ତିନାମା ଗୁଡ଼ିକ ୫.୫୮ ଲକ୍ଷ ଲୋକଙ୍କୁ ନିଯୁକ୍ତି ପ୍ରଦାନ କରିସାରିଛି ଏବଂ ପ୍ରାୟ ୭୦ ପ୍ରତିଶତ ବୁଝାମଣାପତ୍ର ଉପରେ କାମ ଆରମ୍ଭ ହୋଇସାରିଛି।
ତୁରନ୍ତ ଫଳାଫଳ ଆଶା କରିବା ଭୁଲ…
ସମାଲୋଚନାର ଜବାବ ଦେଇ ଉଦୟ ସାମନ୍ତ କହିଛନ୍ତି, "ଯେଉଁମାନେ ପ୍ରଶ୍ନ କରୁଛନ୍ତି ଯେ ଗତ ବର୍ଷର ୧୫ ଲକ୍ଷ କୋଟି ଟଙ୍କାର ବୁଝାମଣାପତ୍ର କୁଆଡେ ଗଲା, ସେମାନେ ରତ୍ନଗିରି ଏବଂ ସମ୍ଭାଜୀନଗର ଭଳି ଅଞ୍ଚଳ ପରିଦର୍ଶନ କରିବା ଉଚିତ ଏବଂ ଭୂମିରେ ଚାଲିଥିବା ପ୍ରକଳ୍ପ ଗୁଡ଼ିକୁ ଦେଖିବା ଉଚିତ। ଶିଳ୍ପଗୁଡ଼ିକୁ ସମ୍ପୂର୍ଣ୍ଣ କାର୍ଯ୍ୟକ୍ଷମ ହେବାକୁ ଚାରିରୁ ପାଞ୍ଚ ବର୍ଷ ସମୟ ଲାଗେ, ତେଣୁ ତୁରନ୍ତ ଫଳାଫଳ ଆଶା କରିବା ଭୁଲ।"
