ନୂଆଦିଲ୍ଲୀ,୦୨/୧୧: ଟ୍ରେନରେ ଯାତ୍ରୀଙ୍କୁ ଛୁରାମାଡ଼ । ଶନିବାର ସନ୍ଧ୍ୟାରେ ୟୁକେର କେମ୍ବ୍ରିଜଶାୟରରେ ଏକ ଟ୍ରେନରେ ଅନେକ ଲୋକଙ୍କ ଉପରେ ଛୁରାମାଡ଼ ହୋଇଛି । ଏଥିରେ ଅନେକ ଲୋକଆହତ ହୋଇଛନ୍ତି । ଏହି ଘଟଣା ପରେ ଟ୍ରେନରେ ଆତଙ୍କ ଖେଳି ଯାଇଥିଲା । ପୁଲିସ ଖବର ପାଇ ଘଟଣାସ୍ଥଳରେ ପହଞ୍ଚି ଦୁଇ ଜଣଙ୍କୁ ଗିରଫ କରିଛି ।
ଅଧିକାରୀମାନେ ବ୍ରିଟିଶ ଟ୍ରାନ୍ସପୋର୍ଟ ପୁଲିସ ସହିତ ମିଶି ଘଟଣାର ତଦନ୍ତ କରୁଛନ୍ତି । ହଣ୍ଟିଂଡନରେ ଟ୍ରେନକୁ ଅଟକାଯାଇ ଆହତମାନଙ୍କୁ ଡାକ୍ତରଖାନା ନିଆଯାଇଛି ।ପୁଲିସ କହିଛି: "ଆମେ ସନ୍ଧ୍ୟା ୭ଟା ୩୯ ରେ ରିପୋର୍ଟ ପାଇଥିଲୁ, ଯେ ଏକ ଟ୍ରେନରେ ଅନେକ ଲୋକଙ୍କୁ ଛୁରାମାଡ଼ କରାଯାଇଛି। ସଶସ୍ତ୍ର ଅଧିକାରୀମାନେ ଘଟଣାସ୍ଥଳରେ ପହଞ୍ଚିଥିଲେ ଏବଂ ହଣ୍ଟିଂଡନରେ ଟ୍ରେନକୁ ଅଟକାଯାଇଥିଲା, ଯେଉଁଠାରେ ଦୁଇଜଣଙ୍କୁ ଗିରଫ କରାଯାଇଛି । ଅନେକ ଲୋକଙ୍କୁ ହସ୍ପିଟାଲକୁ ନିଆଯାଇଥିଲା। "ବ୍ରିଟିଶ ପ୍ରଧାନମନ୍ତ୍ରୀ କୀର ଷ୍ଟାରମର୍ ଏହି ଭୟଙ୍କର ଘଟଣାକୁ ଗଭୀର ଭାବରେ ଚିନ୍ତାଜନକ ବୋଲି କହି ନିନ୍ଦା କରିଛନ୍ତି। ସେ କହିଛନ୍ତି, "ମୋର ସମବେଦନା ସମସ୍ତ ପ୍ରଭାବିତଙ୍କ ସହିତ ଅଛି ଏବଂ ଏହି ଆକ୍ରମଣର ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ମୁଁ ଜରୁରୀକାଳୀନ ସେବାକୁ ଧନ୍ୟବାଦ ଜଣାଉଛି।
ସେହିପରି ଗୃହ ସଚିବ ଶବାନା ମହମୁଦ କହିଛନ୍ତି ଯେ, ହଣ୍ଟିଂଡନରେ ଛୁରାମାଡ଼ ଖବର ପାଇଁ ସେ ଗଭୀର ଦୁଃଖିତ ଏବଂ ଏହି ପ୍ରାରମ୍ଭିକ ପର୍ଯ୍ୟାୟରେ ମନ୍ତବ୍ୟ ଦେବାରୁ ନିବୃତ୍ତ ରହିବାକୁ ଲୋକଙ୍କୁ ଅନୁରୋଧ କରିଛନ୍ତି। ସେ କହିଛନ୍ତି ଯେ, ଦୁଇଜଣ ସନ୍ଦିଗ୍ଧ ବ୍ୟକ୍ତିଙ୍କୁ ତୁରନ୍ତ ଗିରଫ କରାଯାଇ ଅଟକ ରଖାଯାଇଛି ଏବଂ ସେ ତଦନ୍ତ ବିଷୟରେ ସୂଚନା ସଂଗ୍ରହ ଜାରି ରଖିଛନ୍ତି। ତେବେ ଏହି ଘଟଣା ଯୋଗୁଁ ହଣ୍ଟିଂଡନ୍ ସହରକୁ ଯାଉଥିବା ରାସ୍ତା ଏବଂ ଏହି ଅଞ୍ଚଳରେ କାର୍ଯ୍ୟ କରୁଥିବା ଲଣ୍ଡନ ଏବଂ ଉତ୍ତର ପୂର୍ବ ରେଳବାଇ ସେବାରେ ବଡ଼ ବାଧା ସୃଷ୍ଟି ହୋଇଛି।ସ୍କାଏ ନ୍ୟୁଜ୍ ସହିତ କଥାବାର୍ତ୍ତା ସମୟରେ, ଟ୍ରେନରେ ଥିବା ଜଣେ ଦେଖଣାହାରୀ କହିଛନ୍ତି, "ମୁଁ ଦେଖିଲି କେହି ଜଣେ ମୋ ବଗି ଭିତରକୁ ଦୌଡ଼ି ଦୌଡ଼ି ଆସି କହିଥିଲା 'ସେମାନଙ୍କ ପାଖରେ ଛୁରୀ ଅଛି, ମୋତେ ଛୁରୀ ଭୁସି ଦିଆଯାଇଛି।' ସେ ସନ୍ଦିଗ୍ଧ ଲୋକଙ୍କଠାରୁ ଖସି ଯିବାକୁ ଚେଷ୍ଟା କରୁଥିଲେ। ତାଙ୍କ ଶରୀରରେ ପ୍ରଚୁର ରକ୍ତ ଲାଗିଥିଲା।"
