ନୂଆଦିଲ୍ଲୀ, ୧୮।୭: ରୁଷ୍ ଏବଂ ୟୁକ୍ରେନ ମଧ୍ୟରେ ଚାଲିଥିବା ଭୟଙ୍କର ଯୁଦ୍ଧ ଏବେ ଏକ ନୂଆ ମୋଡ଼ ନେଇଛି । ଯୁଦ୍ଧକ୍ଷେତ୍ରରେ ବିଶାଳ ରୁଷ୍ ସେନାକୁ ସାମ୍ନା କରିବା ଏବେ ପୁଟିନଙ୍କ ପାଇଁ ଆଦୌ ସହଜ ହେଉନାହିଁ । ଆମେରିକାର ପ୍ରମୁଖ ଗୁଇନ୍ଦା ଏଜେନ୍ସି 'ସିଆଇଏ' (CIA) ର ନିର୍ଦ୍ଦେଶକ ରାଟ୍କ୍ଲିଫ୍ ଏକ ସାଂଘାତିକ ତଥ୍ୟ ପ୍ରକାଶ କରିଛନ୍ତି । ତାଙ୍କ କହିବା ଅନୁସାରେ, ଯୁଦ୍ଧ ମଇଦାନରେ ୟୁକ୍ରେନ ସୈନ୍ୟଙ୍କ ରଣନୀତି ଆଗରେ ରୁଷୀୟ ସୈନ୍ୟମାନେ ହାରାହାରି ମାତ୍ର ୨୦ରୁ ୩୦ ମିନିଟ୍ ପର୍ଯ୍ୟନ୍ତ ହିଁ ଜୀବିତ ବା ସୁରକ୍ଷିତ ତିଷ୍ଠି ରହିପାରୁଛନ୍ତି । ୟୁକ୍ରେନ ପକ୍ଷରୁ ବ୍ୟାପକ ଭାବେ ବ୍ୟବହାର କରାଯାଉଥିବା ଅତ୍ୟାଧୁନିକ ଆର୍ଟିଫିସିଆଲ ଇଣ୍ଟେଲିଜେନ୍ସ (AI) ଚାଳିତ ଡ୍ରୋନ୍ ଏବେ ରୁଷ୍ ବାହିନୀ ପାଇଁ ସବୁଠାରୁ ବଡ଼ ସମସ୍ୟା ପାଲଟିଛି ।
ରୁଷ୍ ସେନାରେ ଦେଖାଦେଲାଣି ବଡ଼ ସୈନ୍ୟ ସଙ୍କଟ:
ସିଆଇଏ ନିର୍ଦ୍ଦେଶକଙ୍କ ରିପୋର୍ଟ ଅନୁଯାୟୀ, AI ଡ୍ରୋନ୍ର ଘନ ଘନ ଆକ୍ରମଣ ଯୋଗୁଁ ରୁଷ୍ ସେନା ମଧ୍ୟରେ ସୈନ୍ୟ ସଂଖ୍ୟା ଦ୍ରୁତ ଗତିରେ ହ୍ରାସ ପାଇବାରେ ଲାଗିଛି । ସ୍ଥିତି ଏପରି ହୋଇଛି ଯେ, ରୁଷ୍ ପାଖରେ ଏବେ ନୂଆ ସୈନ୍ୟ ସାମିଲ କରିବା ପାଇଁ ବଡ଼ ସମସ୍ୟା ଦେଖାଦେଇଛି । ଯେଉଁ ହାରରେ ରୁଷୀୟ ସୈନ୍ୟ ପ୍ରାଣ ହରାଉଛନ୍ତି, ସେହି ହାରରେ ତୀବ୍ରଗତିରେ ନୂଆ ସୈନ୍ୟଙ୍କୁ ଯୁଦ୍ଧକ୍ଷେତ୍ରକୁ ପଠାଇବା ପୁଟିନ ପ୍ରଶାସନ ପାଇଁ ଏକ ସାଂଘାତିକ ପରିସ୍ଥିତି ସୃଷ୍ଟି କରିଛି । ରିପୋର୍ଟ ମୁତାବକ, ରୁଷ୍ ସେନା ପ୍ରତି ସପ୍ତାହରେ ହାରାହାରି ପ୍ରାୟ ୭,୦୦୦ ସୈନ୍ୟଙ୍କୁ ହରାଉଛି । ୟୁକ୍ରେନ ସଶସ୍ତ୍ର ବାହିନୀର ମୁଖ୍ୟ କମାଣ୍ଡର ଓଲେକ୍ସାଣ୍ଡର ସିରିସ୍କି ମଧ୍ୟ ନିକଟରେ ରୁଷ୍ର ସ୍ଥିତିକୁ ନେଇ ଏକ ବଡ଼ ଦାବି କରିଥିଲେ । ତାଙ୍କ କହିବା ଅନୁସାରେ, ଯୁଦ୍ଧର ପ୍ରମୁଖ କେନ୍ଦ୍ର ପାଲଟିଥିବା ଡୋନେସ୍କ ଅଞ୍ଚଳରେ ମାତ୍ର ୧ ବର୍ଗ କିଲୋମିଟର ଭୂଭାଗ ଦଖଲ କରିବା ପାଇଁ ରୁଷ୍ ବାହିନୀକୁ ୪୦୦ରୁ ଅଧିକ ସୈନ୍ୟ ହରାଇବାକୁ ପଡ଼ୁଛି । ଏଥିରୁ ସ୍ପଷ୍ଟ ଜଣାପଡ଼ୁଛି ଯେ, ରୁଷ୍ ପାଖରେ ସୈନ୍ୟ ସଂଖ୍ୟା ୟୁକ୍ରେନ ତୁଳନାରେ ଯେତେ ଅଧିକ ଥିଲେ ମଧ୍ୟ, ଟେକ୍ନୋଲୋଜି ଯୁଦ୍ଧରେ ସେମାନେ ପଛେଇ ଯାଉଛନ୍ତି ।
ଏହା ବି ପଢ଼ନ୍ତୁ... Kimi K3 AI : ଚୀନ୍ର ଏଆଇ ମଡେଲ ‘କିମି କେ-୩’, ମଣିଷ ଭଳି ମସ୍ତିଷ୍କ... ମିନିଟ୍ରେ କରିବ କୋଡିଂ ଓ ଅଧ୍ୟୟନ
କମ୍ ଖର୍ଚ୍ଚ, ଅଧିକ ବିଧ୍ୱଂସ: ୟୁକ୍ରେନର AI ପ୍ରଯୁକ୍ତିବିଦ୍ୟା
ସିଆଇଏ ମୁଖ୍ୟଙ୍କ କହିବା ଅନୁସାରେ, ୟୁକ୍ରେନ ବହୁତ କମ୍ ଖର୍ଚ୍ଚରେ ଏହି ମାରାତ୍ମକ AI ଡ୍ରୋନ୍ ଗୁଡ଼ିକୁ ନିଜ ଦେଶରେ ହିଁ ନିର୍ମାଣ କରୁଛି । ଏହି ସ୍ମାର୍ଟ ଡ୍ରୋନଗୁଡ଼ିକ ବିନା ମାନବ ସହାୟତାରେ ଶତ୍ରୁପକ୍ଷର ବଙ୍କର ଓ ସୈନ୍ୟଙ୍କୁ ଚିହ୍ନଟ କରି ସଠିକ୍ ଆଟାକ୍ କରୁଛନ୍ତି । ଏହି ଅତ୍ୟାଧୁନିକ ବୈଷୟିକ ଉଦ୍ଭାବନ ଯୋଗୁଁ ବିଶାଳ ରୁଷ୍ ବାହିନୀକୁ ଅଟକାଇବାରେ ୟୁକ୍ରେନ ସଫଳ ହେଉଛି । ୟୁକ୍ରେନର ଏହି AI ଡ୍ରୋନ୍ର ବ୍ୟାପକ ସଫଳତା ଏବେ ପାଶ୍ଚାତ୍ୟ ଦେଶଗୁଡ଼ିକୁ ଚକିତ କରିଛି । ଏହାକୁ ଦୃଷ୍ଟିରେ ରଖି ଆମେରିକା ଏବଂ ଅନ୍ୟ ସହଯୋଗୀ ନାଟୋ (NATO) ଦେଶଗୁଡ଼ିକ ୟୁକ୍ରେନର ଡ୍ରୋନ୍ ବିକାଶ କାର୍ଯ୍ୟକ୍ରମ ପାଇଁ ଅତିରିକ୍ତ ଯୋଗାଇବାକୁ ଚିନ୍ତା କରୁଛନ୍ତି । ଏହାସହ ଏହି ମାରାତ୍ମକ AI ସିଷ୍ଟମର ମୂଳ ପ୍ରଯୁକ୍ତିବିଦ୍ୟାକୁ ହାସଲ କରିବା ପାଇଁ ଆମେରିକା ଏବେ ବେଶ୍ ଆଗ୍ରହ ପ୍ରକାଶ କରିଛି ।
