ନୂଆଦିଲ୍ଲୀ: ତାଲିବାନ ସରକାର ପୁଣି ଥରେ ଅନ୍ତର୍ଜାତୀୟ ମାନବାଧିକାର ସଂଗଠନର ଟାର୍ଗେଟରେ ଆସିଛି। ଜାତିସଂଘର ଏକ ନୂଆ ରିପୋର୍ଟରେ ଦାବି କରାଯାଇଛି ଯେ, ପାକିସ୍ତାନ ଏବଂ ଇରାନରୁ ବଳପୂର୍ବକ ବାହାର କରାଯାଇଥିବା ଅନେକ ଆଫଗାନ ନାଗରିକଙ୍କୁ ତାଲିବାନ ନିର୍ଯାତନା ଏବଂ ଧମକ ଦେଉଛି । ଏହି ରିପୋର୍ଟ ଏପରି ଏକ ସମୟରେ ଆସିଛି ଯେତେବେଳେ କି, ପାକିସ୍ତାନ ଏବଂ ଇରାନ ଲକ୍ଷ ଲକ୍ଷ ଆଫଗାନ ଲୋକଙ୍କୁ ଦେଶରୁ ବାହାର କରି ଦେଉଛନ୍ତି, ଯେଉଁମାନେ କି ବେଆଇନ ଭାବରେ ସେଠାରେ ରହି ଆସୁଥିଲେ।
ଜାତିସଂଘ ମିଶନ ରିପୋର୍ଟ ଅନୁଯାୟୀ, ଆଫଗାନିସ୍ତାନକୁ ଫେରିଥିବା ଅନେକ ଲୋକ ତାଲିବାନ ଦ୍ବାରା ଗମ୍ଭୀର ମାନବାଧିକାର ଉଲ୍ଲଂଘନର ଶିକାର ହେଉଛନ୍ତି। କିଛି ଲୋକଙ୍କୁ ମୃତ୍ୟୁ ଧମକ ମିଳୁଛି, ଯେତେବେଳେ କି ଅନେକଙ୍କୁ ଗୁପ୍ତ ଭାବରେ ବଞ୍ଚିବାକୁ ପଡୁଛି।
ରିପୋର୍ଟରେ ଜଣେ ପୂର୍ବତନ ସରକାରୀ ଅଧିକାରୀଙ୍କ ଏକ ବିବୃତ୍ତି ଅନ୍ତର୍ଭୁକ୍ତ ହୋଇଛି। ଯିଏ କହିଛନ୍ତି ଯେ ତାଙ୍କୁ ଗୁରୁତର ଭାବରେ ମାଡ଼ ମରାଯାଇଥିଲା, ପାଣିରେ ଭସେଇ ଦିଆଯାଇଥିଲା ଏବଂ ତାଙ୍କୁ ମୃତ୍ୟୁଦଣ୍ଡ ଦିଆଯିବାର ଧମକ ଦିଆଯାଇଥିଲା। ଆଉ ଜଣେ ବ୍ୟକ୍ତି କହିଛନ୍ତି ଯେ ତାଙ୍କୁ ବନ୍ଧୁକ ସାହାଯ୍ୟରେ ମାଡ଼ ମରାଯାଇଥିଲା। ଏହି ଘଟଣା ଗୁଡ଼ିକ ଦର୍ଶାଉଛି ଯେ ତାଲିବାନ ଫେରି ଆସୁଥିବା ଆଫଗାନ ମାନଙ୍କ ସହିତ କଠୋର ବ୍ୟବହାର କରୁଛି।
ସଂଯୁକ୍ତ ରାଷ୍ଟ୍ର ମାନବାଧିକାର ମୁଖ୍ୟ ଭୋଲକର ତୁର୍କ କହିଛନ୍ତି ଯେ, କାହାକୁ ମଧ୍ୟ ଏପରି ଦେଶକୁ ପଠାଯିବା ଉଚିତ୍ ନୁହେଁ, ଯେଉଁଠାରେ ସେମାନେ ସେମାନଙ୍କର ପରିଚୟ କିମ୍ବା ଇତିହାସ ଯୋଗୁଁ ନିର୍ଯାତନାର ସମ୍ମୁଖୀନ ହେବେ । ସେ ଆଫଗାନ ମହିଳା ଏବଂ ଝିଅ ମାନଙ୍କ ପରିସ୍ଥିତିକୁ ବିଶେଷ ଚିନ୍ତାଜନକ ବୋଲି ବର୍ଣ୍ଣନା କରିଛନ୍ତି । ଏମାନେ ତାଲିବାନ ଦ୍ୱାରା କଠୋର ପ୍ରତିବନ୍ଧକରେ ପଡ଼ିଛନ୍ତି। ଯେପରିକି ସ୍କୁଲ ବନ୍ଦ, କାମ କରିବା ଉପରେ ପ୍ରତିବନ୍ଧକ ଏବଂ ସାର୍ବଜନୀନ ସ୍ଥାନକୁ ଯିବା ଉପରେ ପ୍ରତିବନ୍ଧକ।
ତାଲିବାନ ପ୍ରଶାସନ ଏହି ଅଭିଯୋଗଗୁଡ଼ିକୁ ଅସ୍ୱୀକାର କରିଛି। ସେ କହିଛନ୍ତି ଯେ ଫେରି ଆସୁଥିବା ଲୋକଙ୍କୁ ଡକ୍ୟୁମେଣ୍ଟ, ପରିବହନ ଏବଂ ଆଇନଗତ ସହାୟତା ଯୋଗାଇ ଦିଆଯାଉଛି।
