ଚାନ୍ଦବାଲି, ୦୬/୧୧: ଅଙ୍ଗନବାଡ଼ି କେନ୍ଦ୍ରରେ ଅନିୟମିତତା ଯୋଗୁଁ ବାରମ୍ବାର ଅଭିଯୋଗ ହୋଇଥିଲା । ଏହା ସତ୍ତ୍ୱେ ମିଳିଲାନି ନ୍ୟାୟ । ନ୍ୟାୟ ନପାଇ ଚାନ୍ଦବାଲି ଥାନାର ଦ୍ଵାରସ୍ଥ ହେଲେ ଅବିଭାବକ ଓ ଗ୍ରାମବାସୀ । ଭଦ୍ରକ ଜିଲ୍ଲା ଚାନ୍ଦବାଲି ବ୍ଲକ କାଣ୍ଡଗରଡି ପଞ୍ଚାୟତ ତାଳ ଆଡିଆ ଅଙ୍ଗନବାଡ଼ି କେନ୍ଦ୍ର ନାଁରେ ଏଭଳି ଏକ ଅଭିଯୋଗ ଆସିଛି ।
ଅଙ୍ଗନବାଡ଼ି କେନ୍ଦ୍ରରେ କୁନି କୁନି ପିଲାଙ୍କୁ ମିଳୁ ନାହିଁ ରନ୍ଧା ଏବଂ ଶୁଖିଲା ଖାଦ୍ୟ । ଅଙ୍ଗନବାଡ଼ି କେନ୍ଦ୍ରରେ ଦୀର୍ଘ ଆଠ ମାସ ଧରି କର୍ମୀଙ୍କ ଅବହେଳା ଯୋଗୁଁ ଏମିତି ପରିସ୍ଥିତି ଦେଇ ଗତି କରୁଛନ୍ତି କୁନି କୁନି ପିଲା । ଅଣ୍ଡା ଏବଂ ଶୁଖିଲା ଖାଦ୍ୟ ଲୁଟ୍ ହେବା ନେଇ ମହିଳା ଏବଂ ଶିଶୁ ବିକାଶ ସମ୍ୱନ୍ଧିତ ଅଧିକାରୀଙ୍କୁ ଜଣାଇ ଥିଲେ ମଧ୍ୟ, ଏହାର ସମାଧାନ ହୋଇ ପାରୁନାହିଁ । ସରକାର କୁନି କୁନି ପିଲାଙ୍କୁ ଆକୃଷ୍ଟ କରିବା ପାଇଁ ଯେଉଁ ସବୁ ସୁବିଧା ଏବଂ ବ୍ୟବସ୍ଥା କରିଛନ୍ତି, ସେଥିରୁ ପିଲାମାନେ ବଞ୍ଚିତ ହେଉଥିବା ଅଭିଯୋଗ ହୋଇଛି ।
ଅଙ୍ଗନବାଡ଼ି କେନ୍ଦ୍ରକୁ ମନ ଇଚ୍ଛା କର୍ମୀ ଆସୁଛନ୍ତି । ତେଣୁ ଏହି ଘଟଣାରେ ଅଙ୍ଗନବାଡି କେନ୍ଦ୍ରରେ କର୍ମୀ ଓ ସହାୟକଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନେବା ପାଇଁ ଚାନ୍ଦବାଲି ଥାନାରେ ଅଭିଯୋଗ କରିଛନ୍ତି ଅବିଭାବକ ଓ ଗ୍ରାମବାସୀ । ଚାନ୍ଦବାଲି ବ୍ଲକ୍ରେ ମତୋ ସିଡିପିଓ -୨ ଙ୍କୁ ଘଟଣା ସମ୍ପର୍କରେ ପଚାରିଲା ବେଳେ ଏହି ଘଟଣାରେ ସତ୍ୟତା ନାହିଁ ବୋଲି କହିଛନ୍ତି । ଏହା ସହ ଗ୍ରାମବାସୀମାନେ ମିଥ୍ୟା ଅଭିଯୋଗ କରୁଛନ୍ତି ବୋଲି ସେ କହିଛନ୍ତି । ପିଲାଙ୍କୁ ଠିକ୍ ଭାବରେ ଖାଇବାକୁ ଦିଆ ଯାଉଛି । ଜିଲ୍ଲାପାଳଙ୍କୁ ଏହି ଘଟଣାରେ ଜଣାଇଛି, ତଦନ୍ତ କରିବାକୁ ଅନୁରୋଧ ମଧ୍ୟ କରାଯାଇଛି । ତଦନ୍ତ ପରେ ସମାଧାନ ହୋଇ ପାରିବ ବୋଲି ଫୋନ ଯୋଗେ ମତୋ ସିଡିପିଓ କହିଛନ୍ତି ।
