ନୂଆଦିଲ୍ଲୀ, ୬।୫: ପହଲଗାମ ଆକ୍ରମଣକୁ ନେଇ ଆତଙ୍କବାଦ ବିରୋଧରେ କଡ଼ା ଆଭିମୁଖ୍ୟ ଗ୍ରହଣ କରିଛି ଭାରତ । ଯୁଦ୍ଧ ପାଇଁ ଆରମ୍ଭ କରୁଛି ପ୍ରସ୍ତୁତି । ଏହାରି ଭିତରେ ଭାରତକୁ ନିଜର ସମର୍ଥନ ଜଣାଇଆସୁଛି ଆମେରିକା । ଆମେରିକା ସଂସଦର ବାଚସ୍ପତି ମାଇକ୍ ଜନସନ ଅନୁରୂପ ଭାବେ ଭାରତକୁ ସମର୍ଥନ ଜଣାଇଛନ୍ତି । ଆତଙ୍କବାଦର ପାଳନକର୍ତ୍ତା ଭାବେ ପରିଚିତ ପାକିସ୍ତାନକୁ ଏକ ଘରିକିଆ କରିବା ଲାଗି ଭାରତ କୂଟନୈତିକ ଏବଂ ଅର୍ଥନୈତିକ ସ୍ତରରେ ଉଦ୍ୟମ ଚଳାଇଛି । ତା’ ସହିତ ଆତଙ୍କବାଦ ବିରୋଧରେ ଯୁଦ୍ଧ ପାଇଁ ମଧ୍ୟ ପ୍ରସ୍ତୁତି କରୁଛି, ଯାହା ପାକିସ୍ତାନକୁ ବିଚଳିତ କରିଛି । ଭାରତକୁ ଅଟକାଇବା ଲାଗି ପାକିସ୍ତାନ ବିଭିନ୍ନ ରାଷ୍ଟ୍ରର ସହାୟକା ଲୋଡ଼ିଥିଲେ ହେଁ ସେଥିରେ ବିଫଳ ହୋଇଛି । ଏହାରି ଭିତରେ ଆମେରିକା ବାରମ୍ବାର ଭାରତକୁ ଏହାର ସମର୍ଥନ ଜଣାଇଛି । ପୂର୍ବରୁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ, ପରରାଷ୍ଟ୍ର ସଚିବ ମାର୍କୋ ରୁବିଓ ଏବଂ ଅନ୍ୟାନ୍ୟ ନେତାମାନେ ଭାରତକୁ ସମର୍ଥନ ଜଣାଇଛନ୍ତି । ବର୍ତ୍ତମାନ ଆମେରିକା ସଂସଦ ଅର୍ଥାତ୍ (ହାଉସ୍ ଅଫ ରିପ୍ରେଜେଣ୍ଟେଟିଭସ)ର ବାଚସ୍ପତି ମାଇକ୍ ଜନସନ ଅନୁରୂପ ଭାବେ ଭାରତକୁ ସମର୍ଥନ ଜଣାଇଛନ୍ତି ।
ଆତଙ୍କବାଦ ବିରୋଧୀ ଲଢ଼େଇରେ ଭାରତକୁ ସମର୍ଥନ ଲାଗି ଆମେରିକା ସବୁକିଛି କରିବ ବୋଲି ସେ କହିଛନ୍ତି । ସେ ଆହୁରି କହିଛନ୍ତି, ଯାହା ସମ୍ଭବ ଆମେ ତାହା କରିବୁ । ଆମେରିକାର ପ୍ରତିନିଧି ସଭାର ବାଚସ୍ପତି ମାଇକ ଜନସନ କହିଛନ୍ତି ଯେ, ଆତଙ୍କବାଦ ବିରୋଧରେ ଭାରତକୁ ସମର୍ଥନ କରିବାକୁ ଆମେରିକା ସମସ୍ତ ପ୍ରକାରର ପ୍ରୟାସ କରିବ । ସେ ଭାରତକୁ ଅନେକ ଦୃଷ୍ଟିରୁ ଆମେରିକା ପାଇଁ ଏକ "ଅତ୍ୟନ୍ତ ଗୁରୁତ୍ୱପୂର୍ଣ୍ଣ" ଅଂଶୀଦାର ବୋଲି କହିଛନ୍ତି ।
ଗତ କିଛି ଦଶନ୍ଧି ଧରି ସୀମାପାର ଆତଙ୍କବାଦର ଶିକାର ହୋଇଆସୁଥିବା ଭାରତ ପାଇଁ ତାଙ୍କର ବାର୍ତ୍ତା ବିଷୟରେ ପଚରାଯିବାରୁ ମାଇକ ଜନସନ କହିଥିଲେ, ‘ଭାରତରେ ଯାହା ଘଟୁଛି ତାହା ପ୍ରତି ଆମର ବହୁତ ସହାନୁଭୂତି ଅଛି ଏବଂ ଆମେ ଆମର ସହଯୋଗୀମାନଙ୍କ ସହିତ ଠିଆ ହେବାକୁ ଚାହୁଁଛୁ । ମୁଁ ଭାବୁଛି ଭାରତ ଅନେକ ଦିଗରୁ ଆମ ପାଇଁ ଏକ ଗୁରୁତ୍ୱପୂର୍ଣ୍ଣ ଅଂଶୀଦାର । ମୁଁ ଆଶା କରୁଛି ଯେ ଦୁଇ ଦେଶ ମଧ୍ୟରେ ବାଣିଜ୍ୟ ଆଲୋଚନା ଭଲ ଭାବରେ କାମ କରିବ ।' ପହଲଗାମ ପ୍ରସଙ୍ଗରେ ଭାରତକୁ ସମର୍ଥନ କଲେ ଆମେରିକା ହାଉସ ବାଚସ୍ପତିଗତ ଏପ୍ରିଲ ୨୨ ତାରିଖରେ ଜମ୍ମୁ-କାଶ୍ମୀରର ପହଲଗାମରେ ହୋଇଥିବା ଆକ୍ରମଣରେ ୨୬ ଜଣଙ୍କର ମୃତ୍ୟୁ ହୋଇଛି ଏବଂ ଅନେକ ଆହତ ମଧ୍ୟ ହୋଇଛନ୍ତି । ପରେ ଟ୍ରମ୍ପ ପ୍ରଶାସନ ଆତଙ୍କବାଦ ବିରୋଧରେ ଭାରତକୁ ସମର୍ଥନ ଜଣାଇଛି ।
