ସୁକିନ୍ଦା/କଳିଙ୍ଗନଗର,୩୧/୦୮: ଯାଜପୁର ଜିଲ୍ଲା ସୁକିନ୍ଦା ବ୍ଲକ୍ ପିମ୍ପୁଡ଼ିଆ ପଞ୍ଚାୟତର ପୂର୍ବତନ ପଞ୍ଚାୟତ ନିର୍ବାହୀ ଅଧିକାରୀ (ପିଇଓ) ସନ୍ତୋଷ ଜେନାଙ୍କୁ ଶନିବାର କଟକ ଭିଜିଲାନ୍ସ ବିଭାଗ ଦାନଗଦୀ ବ୍ଲକ୍ କାର୍ଯ୍ୟାଳୟରୁ ଗିରଫ କରିଛି । ୭ ଲକ୍ଷ ୩୫ ହଜାର ଭତ୍ତା ଟଙ୍କା ହେର୍ଫେର୍ ଅଭିଯୋଗକୁ ନେଇ ରୁଜୁ ମାମଲା ଆଧାରରେ ଭିଜିଲାନ୍ସ ବିଭାଗ ଶ୍ରୀ ଜେନାଙ୍କୁ ଗିରଫ କରି କୋର୍ଟଚାଲାଣ କରିଛି ।
ଭିଜିଲାନ୍ସ ସୂଚନା ମୁତାବକ, ସନ୍ତୋଷ ପିମ୍ପୁଡ଼ିଆ ପଞ୍ଚାୟତ ପିଇଓ ଥିବା ସମୟରେ ୨୦୨୩-୨୪ ଆର୍ଥିକ ବର୍ଷରେ ଭତ୍ତା ଟଙ୍କା ହେରଫେର୍ କରିଥିଲେ । ଅଡିଟ୍ ସମୟରେ ସେ ୧୦ ଲକ୍ଷରୁ ଅଧିକ ଟଙ୍କା ହେର୍ଫେର୍ କରିଥିବା ରିପୋର୍ଟରୁ ଜଣାପଡ଼ିଥିଲା । ପରବର୍ତ୍ତୀ ସମୟରେ ସେ ୩ ଲକ୍ଷ ଟଙ୍କା ଫେରସ୍ତ କରିଥିଲେ । ମାତ୍ର ସିଂହଭାଗ ଅର୍ଥ ଦୀର୍ଘ ବର୍ଷ ହେବ ଫେରାଉନଥିଲେ । ସେ ଅଦ୍ୟାବଧି ୭ ଲକ୍ଷ ୩୫ ହଜାର ଟଙ୍କା ସରକାରୀ ଅର୍ଥ ହଡ଼ପ କରିଥିବା ଅଭିଯୋଗ ହୋଇଥିଲା । ତେଣୁ ଜିଲ୍ଲା ପ୍ରଶାସନ ମାମଲାକୁ ଭିଜିଲାନ୍ସ ବିଭାଗକୁ ହସ୍ତାନ୍ତର କରିଥିଲା ।
ଏସମ୍ପର୍କରେ ଦାନଗଦୀ ବିଡିଓ ପ୍ରଦୀପ ସେଠୀ କହିଛନ୍ତି, ପୂର୍ବରୁ ଶ୍ରୀ ଜେନା ନିଲମ୍ବିତ ହୋଇଥିଲେ । ତାଙ୍କୁ ଦାନଗଦୀ ବ୍ଲକ୍ କାର୍ଯ୍ୟାଳୟରେ ଦୈନିକ ଉପସ୍ଥିତ ରହିବାକୁ ନିର୍ଦ୍ଦେଶ ହୋଇଥିଲା । ନିର୍ଦ୍ଦେଶ ବଳରେ ଶ୍ରୀ ଜେନା କାର୍ଯ୍ୟାଳୟକୁ ଆସୁଥିବା ବେଳେ ତାଙ୍କୁ କୌଣସି ଦାୟିତ୍ୱ ଦିଆଯାଇନଥିଲା ।
