ମାଲକାନଗିରି, ୨୮/୬ : ରାସ୍ତା ଶୋଚନୀୟ ଯୋଗୁଁ ମାଲକାନଗିରି ପୌରାଞ୍ଚଳର ଏମଭି-୪୩ ଗ୍ରାମବାସୀଙ୍କର ନିଆରା ପ୍ରତିବାଦ । ପଙ୍କ କାଦୁଅ ମୟ ରାସ୍ତାରେ ମାଛ ଯାଆଁଳ ଛାଡ଼ିଲେ ଓ ଜାଲ ପକାଇ ମାଛ ଧରିଲେ। ମାଲକାନଗିରି ପୌରାଞ୍ଚଳର ପ୍ରମୁଖ ରାସ୍ତାରେ ଏଭଳି ଏକ ଦୃଶ୍ୟ ଦେଖିବାକୁ ମିଳିଛି।
ସୂଚନା ଅନୁସାରେ, ମାଲକାନଗିରି ଜିଲ୍ଲା ସଦରମହକୁମା ରିକଲାମେସନ କଲୋନୀ ତାମିଲ କ୍ୟାମ୍ପଠାରୁ ଏମଭି-୪୩ ଗ୍ରାମ ପାଖାପାଖି ୩ କିମି ରାସ୍ତାରେ ଆଣ୍ଠୁଏ ଆଣ୍ଠୁଏ ଗାତ ରହିଛି । ବାରମ୍ବାର କହିବା ପରେ ମଧ୍ୟ ପ୍ରଶାସନ ନ ଶୁଣିବାରୁ ଏଭଳି ଭିନ୍ନ ଢଙ୍ଗରେ ଆଜି ପ୍ରତିବାଦ କରିଛନ୍ତି ଗ୍ରାମବାସୀ। ଏହି ରାସ୍ତା ଦେଇ ୨୦ରୁ ଊର୍ଦ୍ଧ୍ବ ଗ୍ରାମର ଶହ ଶହ ଲୋକ ଓ ଯାନବାହାନ ଯାତାୟତ କରିଥାଏ । ପ୍ରତିଦିନ ଏହି ରାସ୍ତାରେ ମହାବିଦ୍ୟାଳୟ ଓ ବିଦ୍ୟାଳୟକୁ ଛାତ୍ରଛାତ୍ରୀମାନେ ଯାତାୟତ କରୁଥିବାବେଳେ ନାନା ସମସ୍ୟା ଭୋଗୁଛନ୍ତି। ଅନେକ ସମୟରେ ଦୁର୍ଘଟଣାର ଶିକାର ମଧ୍ୟ ହେଉଥିବା ଅଭିଯୋଗ କରିଛନ୍ତି ଲୋକେ। ଯଦି ପ୍ରଶାସନ ତୁରନ୍ତ ରାସ୍ତା ନିର୍ମାଣ ନକରେ ତେବେ ଆଗାମୀ ଦିନରେ ଆନ୍ଦୋଳନାତ୍ମକ ପନ୍ଥା ଗ୍ରହଣ କରିବାକୁ ଅଞ୍ଚଳବାସୀ ଚେତାବନୀ ଦେଇଛନ୍ତି।
