ନୂଆଦିଲ୍ଲୀ: ଭାରତୀୟ ଟିମ୍ର ଷ୍ଟାର ବ୍ୟାଟର ବିରାଟ କୋହଲି ବିସିସିଆଇର ନିୟମ ଉପରେ ନିଜର ଅସନ୍ତୋଷ ପ୍ରକାଶ କରିଛନ୍ତି । ଖେଳାଳିମାନଙ୍କ ସହ ସେମାନଙ୍କ ପରିବାର ସଦସ୍ୟ ଯାତ୍ରା କରିବା ଉପରେ ବିସିସିଆଇ ପ୍ରତିବନ୍ଧକ ଲଗାଇଛି । ଭାରତୀୟ ଦଳ ୨୦୨୪-୨୫ରେ ବର୍ଡର-ଗାଭାସ୍କର ଟ୍ରଫିରେ ପରାସ୍ତ ହେବା ପରେ ଏହି ନିଷ୍ପତ୍ତି ନିଆଯାଇଛି । ନିର୍ଦ୍ଦେଶନାମାରେ ଉଲ୍ଲେଖ ଥିଲା ଯେ, ଖେଳାଳିଙ୍କ ପିଲାମାନେ ଏବଂ ପତ୍ନୀ ୪୫ ଦିନରୁ ଅଧିକ ସମୟ ଧରି ହେବାକୁ ଥିବା ଖେଳର ଦୁଇ ସପ୍ତାହ ପରେ ହିଁ ଯୋଗ ଦେଇପାରିବେ । ଏହାଠୁ କମ୍ ଅବଧିର ଗସ୍ତ ଲାଗି ପରିବାରକୁ ଏକ ସପ୍ତାହ ପର୍ଯ୍ୟନ୍ତ ରହିବାକୁ ଅନୁମତି ଦିଆଯିବ । ଏହାକୁ ନେଇ ବିରାଟ କୋହଲି କହିଛନ୍ତି ଯେ, ନିୟମ ପରିବର୍ତ୍ତନ କରାଯିବା ଉଚିତ ଏବଂ ଖେଳାଳିମାନେ ସେମାନଙ୍କ ପରିବାର ସହିତ ରହିବା ଦରକାର ।
କୋହଲି RCB ଇନୋଭେସନାଲ୍ ଲ୍ୟାବ୍ ଇଣ୍ଡିଆନ୍ ସ୍ପୋର୍ଟ୍ସ ସମିଟ୍ ସମୟରେ କହିଛନ୍ତି, ‘ଲୋକମାନଙ୍କୁ ବୁଝାଇବା ବହୁତ କଷ୍ଟକର ଯେ ଯେତେବେଳେ ତୁମ ସହିତ କିଛି ଖରାପ ହୁଏ , ସେତେବେଳେ ତୁମର ପରିବାର ପାଖକୁ ଫେରି ଆସିବା କେତେ ଜରୁରୀ । ମୁଁ ଭାବୁନାହିଁ ଯେ, ଲୋକମାନେ ଏହାର ମୂଲ୍ୟ ବୁଝିପାରୁଛନ୍ତି । ମୁଁ ଏଥିପାଇଁ ବହୁତ ନିରାଶ ଅନୁଭବ କରୁଛି ।’
ସେ ଆହୁରି କହିଛନ୍ତି ଯେ, ‘କୌଣସି ଖେଳାଳି ଖରାପ ଖେଳ ପରେ ଏକା ତାଙ୍କ କୋଠରୀକୁ ଯାଇ ମନ ଦୁଃଖ କରିବାକୁ ଚାହାଁନ୍ତି ନାହିଁ । ସେ ସାଧାରଣ ସ୍ଥିତିକୁ ଫେରିବାକୁ ଚାହାଁନ୍ତି ଏବଂ ମ୍ୟାଚ୍ ପରେ ସେ ପୁଣି ଥରେ ଭଲ ଖେଳିବାକୁ ଚେଷ୍ଟା କରନ୍ତି । ଯଦି ତୁମେ କୌଣସି ଖେଳାଳିଙ୍କୁ ପଚାର, ତୁମେ କ'ଣ ଚାହୁଁଛ ? ତୁମର ପରିବାର ସବୁବେଳେ ତୁମ ପାଖରେ ରହୁ ? ସେ ହଁ ବୋଲି କହିବ । ସେ କୋଠରୀକୁ ଯାଇ ଏକା ବସି ମନ ଦୁଃଖ କରିବାକୁ ଚାହେଁ ନାହିଁ । ସାଧାରଣ ହେବାକୁ ଚାହେଁ। ତା'ପରେ ପ୍ରକୃତରେ ସେ ଖେଳକୁ ଏକ ଦାୟିତ୍ୱ ଭାବରେ ଗ୍ରହଣ କରିପାରିବ।’
