ବ୍ରହ୍ମପୁର,୨୦/୦୫: ସୁନାପୁରରେ ରହିଛି ଇକୋ ରିଟ୍ରିଟ୍ । ଏହି ବିଚ୍କୁ ମିଳିଛି ବ୍ଲୁ-ଫ୍ଲାଗ୍ ମାନ୍ୟତା । ବର୍ଷ ସାରା ସୁନାପୁର ବେଳାଭୂମିରେ ପର୍ଯ୍ୟଟକ ଏକାଠି ହୁଅନ୍ତି । ଏବେ ପର୍ଯ୍ୟଟକଙ୍କ ସଂଖ୍ୟା ଆହୁରି ବଢ଼ାଇବା ଏବଂ ଅନ୍ତର୍ଜାତୀୟ ପର୍ଯ୍ୟଟକଙ୍କୁ ଆକୃଷ୍ଟ କରିବାକୁ ବଡ଼ ପ୍ରକଳ୍ପ ହାତକୁ ନିଆଯାଇଛି । ବେଳାଭୂମିରେ ୱାଟର୍ ସ୍ପୋର୍ଟସ୍ କମ୍ପେ୍ଲକ୍ସ ଭିତ୍ତିଭୂମି ନିର୍ମାଣ ହେବାକୁ ଯାଉଛି । ରାଜ୍ୟ ପର୍ଯ୍ୟଟନ ବିଭାଗ ଅନୁଦାନରେ ବ୍ରହ୍ମପୁର ଉନ୍ନୟନ କର୍ତ୍ତୃପକ୍ଷ(ବିଡିଏ) ଏହି ଭିତ୍ତିଭୂମି ନିର୍ମାଣ ପାଇଁ ଟେଣ୍ଡର୍ ଆହ୍ୱାନ କରିଛନ୍ତି । ଏଥିସହିତ ଗୋପାଳପୁର ବେଳାଭୂମିରେ ଦିବ୍ୟାଙ୍ଗ୍ ଅନୁକୂଳ ଭିତ୍ତିଭୂମି ନିର୍ମାଣ ପାଇଁ ମଧ୍ୟ ବିଡିଏ ଟେଣ୍ଡର୍ ଆହ୍ୱାନ କରାଯାଇଛି ବୋଲି ବିଡିଏ ସଚିବ ରମେଶ ଚନ୍ଦ୍ର ହାଁସଦା କହିଛନ୍ତି । ଉଭୟ ପ୍ରକଳ୍ପ ପାଇଁ ପର୍ଯ୍ୟଟନ ବିଭାଗ ପ୍ରାୟ ୨ କୋଟି ୬୬ ଲକ୍ଷ ଟଙ୍କା ଖର୍ଚ୍ଚ କରିବ ।
ଜାତୀୟ ଓ ଅନ୍ତର୍ଜାତୀୟ ପର୍ଯ୍ୟଟକଙ୍କୁ ସୋନପୁର ବେଳାଭୂମିକୁ ଟାଣି ଆଣିବା ପାଇଁ ରାଜ୍ୟ ସରକାରଙ୍କ ଏହା ଏକ ପ୍ରୟାସ । ଏଠାରେ ୱାଟର୍ ସ୍ପୋର୍ଟସ୍ କମ୍ପେ୍ଲକ୍ସ ଭିତ୍ତିଭୂମି ନିର୍ମାଣ ଏବଂ ଜଳ କ୍ରୀଡ଼ା ଉପକରଣ ଉପଲବ୍ଧ କରାଇବାକୁ ପ୍ରସ୍ତାବ ଦିଆଯାଇଥିଲା । ପର୍ଯ୍ୟଟନ ବିଭାଗ ଏହାକୁ ଅନୁମୋଦନ କରିବା ସହ ବିଡିଏ ଜରିଆରେ ଭିତ୍ତିଭୂମି ନିର୍ମାଣ କାର୍ଯ୍ୟ ହାତକୁ ନିଆଯାଇଛି । ଉଭୟ ୱାଟର୍ ସ୍ପୋର୍ଟସ୍ କମ୍ପେ୍ଲକ୍ସ ଭିତ୍ତିଭୂମି ଓ ଦିବ୍ୟାଙ୍ଗ ଅନୁକୂଳ ସୁବିଧା ଭିତ୍ତିଭୂମି ପାଇଁ ୧୬ ତାରିଖରେ ଟେଣ୍ଡର୍ ଆହ୍ୱାନ କରାଯାଇଛି । ଜୁନ୍ ୯ ତାରିଖ ଟେଣ୍ଡର୍ ଦାଖଲର ଶେଷ ଦିନ ରହିଛି । ୱାଟର୍ ସ୍ପୋର୍ଟସ୍ କମ୍ପେ୍ଲକ୍ସ ଭିତ୍ତିଭୂମିରେ ପାର୍କିଂ ଲଟ୍ ନିର୍ମାଣ, ପାଥ୍ ୱେ, ପାର୍କ ଓ ଦୁଇଟି ଜେଟି ଉପଲବ୍ଧ ରହିବ । ଏହା ପରେ ୱାଟର୍ ସ୍ପୋର୍ଟସ୍ ଉପକରଣ ଭାବେ ଜେଟ୍ସ୍କି, ବାନାନା ବୋଟ୍, ସ୍ପିଡ୍ ବୋଟ୍ ଆଦି ଏଠାରେ ରହିବା ସୂଚନା ମିଳିଛି । ଏଥିପାଇଁ ୨ କୋଟି ୪୪ ଲକ୍ଷ ଟଙ୍କାର ବ୍ୟୟ ବରାଦ ହୋଇଛି ।
ୱାଟର୍ ସ୍ପୋର୍ଟସ୍ କମ୍ପେ୍ଲକ୍ସ ଭିତ୍ତିଭୂମି ସହ ଗୋପାଳପୁର ବେଳାଭୂମିକୁ ଦିବ୍ୟାଙ୍ଗଙ୍କ ପାଇଁ ଅନୁକୂଳ କରାଯିବାକୁ ପର୍ଯ୍ୟଟନ ବିଭାଗ ପ୍ରାୟ ୨୧ ଲକ୍ଷରୁ ଅଧିକ ଟଙ୍କା ବ୍ୟୟ କରିବ । ଏଥି ପ୍ରକଳ୍ପ ଅନ୍ତର୍ଗତ ବାଲିରେ ମ୍ୟାଟ୍ ପଡ଼ିବ । ବେଳାଭୂମି ବୁଲିବାକୁ ଆସୁଥିବା ଦିବ୍ୟାଙ୍ଗଙ୍କ ପାଇଁ ଟ୍ରାଇ ସାଇକଲ୍ ଓ ବେଳାଭୂମି ପର୍ଯ୍ୟନ୍ତ ରେଲିଂ ସୁବିଧା ରହିବ । ବ୍ଲୁ-ଫ୍ଲାଗ୍ ବିଚ୍ ମାନ୍ୟତା ପାଇଁ ଏହି ସୁବିଧା ଜରୁରୀ । ଦିବ୍ୟାଙ୍ଗ ଅନୁକୂଳ ଭିତ୍ତିଭୂମି ନିର୍ମାଣ ପରେ ଗୋପାଳପୁରକୁ ବ୍ଲୁ-ଫ୍ଲାଗ୍ ବିଚ୍ ମାନ୍ୟତା ପ୍ରଦାନ ପାଇଁ ଆବେଦନ କରାଯିବ ବୋଲି ଅନୁମାନ କରାଯାଉଛି ।
