ନୂଆଦିଲ୍ଲୀ,୨୪।୪: ଆତଙ୍କବାଦୀଙ୍କଠାରୁ ବଞ୍ଚିବା ପାଇଁ ମୁଁ ମଥାରୁ ବିନ୍ଦି କାଢିଦେଲଇ। ଏପରିକି ଆଲ୍ଲା ହୁ ଆକବର ମଧ୍ୟ କହିବା ଆରମ୍ଭ କରିଦେଲି। ହେଲେ ସେମାନେ ମୋ ସ୍ବାମୀକୁ ଛାଡିଲେନି। ଗୁଳି ମାରିଦେଲେ। ଏଭଳି କିଛି କହିଛନ୍ତି ପୁନେର ସଙ୍ଗୀତା ଗଣବୋଟେ। ସେ କହିଛନ୍ତି, ନିଜ ଧର୍ମର ପରିଚୟକୁ ଆମେ ଲୁଚାଇବାକୁ ଚେଷ୍ଟା କରି ବିଫଳ ହେଲୁ।’
ଗତ ମଙ୍ଗଳାବାର ପହଲଗାମ୍ ନିକଟସ୍ଥ ବେସରନ୍ରେ ଆତଙ୍କବାଦୀ ଆକ୍ରମଣରେ ମୃତ ୨୬ ଲୋକଙ୍କ ଭିତରେ ଅଛନ୍ତି ସଙ୍ଗୀତାଙ୍କ ସ୍ବାମୀ କୌସ୍ତୁଭ ଗଣବୋଟେ। ସଙ୍ଗୀତା କହିଛନ୍ତି, ସ୍ଥାନୀୟ ଜଣେ ମୁସଲମାନ ବ୍ୟକ୍ତି ଯେତେବେଳେ ଆକ୍ରମଣକାରୀଙ୍କୁ ପଚାରିଥିଲେ କାହିଁକି ଏଭଳି ନିର୍ଦୋଷ ଲୋକଙ୍କୁ ମାରୁଛ ? ସେମାନେ ତାଙ୍କୁ ମଧ୍ୟ ଗୁଳିମାରିଦେଲେ। କେବଳ ମୁଁ ନୁହେଁ ଅନେକ ମହିଳା ଓ ପରୁଷ ନିଜକୁ ଆତଙ୍କବାଦୀଙ୍କଠାରୁ ଧର୍ମ ଲୁଚାଇବାକୁ ଚେଷ୍ଟା କରିଥିଲୁ। ହେଲେ ସେମାନେ ଛାଡିଲେନି। ସଙ୍ଗୀତା ସେ ଦିନର ଘଟଣାକୁ ଗୋଟି ଗୋଟି କରି ଏନ୍ସିପି ମୁଖ୍ୟ ଶରଦ ପାଓ୍ବାରଙ୍କୁ ଆଜି କହିଛନ୍ତି।
ଶରଦ ପାଓ୍ବାର ଶୋକସନ୍ତପ୍ତ ପରିବାର ଲୋକଙ୍କୁ ବଜି ଭେଟିବାକୁ ଯାଇଥିଲେ। ଏହି ସମୟରେ ସେ ଦିବଂଗତ ଆତ୍ମାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ଏହି ଆକ୍ରମଣରେ କୌସ୍ତଭ ଗଣବୋଯେଙ୍କ ବ୍ୟତୀତ ତାଙ୍କ ପିଲାବେଳର ବନ୍ଧୁ ସନ୍ତୋଷ ଜଗଦାଲେ ମଧ୍ୟ ଆତଙ୍କୀ ହମଲାରେ ନିହତ ହୋଇଛନ୍ତି। ଦୁଇ ପରିବାର ଏକାଠି ମିଶି କାଶ୍ମୀର ଯାତ୍ରାରେ ଯାଇଥିଲେ। ସେତେବେଳେ ୪ ଜଣ ସଶସ୍ତ୍ର ଆତଙ୍କୀ ତାଙ୍କୁ ବୈସରନ୍ରେ ରୋକି ତାଙ୍କୁ ନିଜର ଧର୍ମ ସମ୍ପର୍କିତ ପ୍ରଶ୍ନ ପଚାରିଥିଲେ। ଆତଙ୍କବାଦୀମାନେ ସମସ୍ତଙ୍କୁ ଆଜାନ ପଢିବାକୁ କହିଥିଲେ। ସବୁ ମହିଳା ଓ ପୁରୁଷ ପଢିବା ଆରମ୍ଭ କରିଦେଇଥିଲେ। କିନ୍ତୁ ଏହାପରେ ବି ସେମାନେ ପୁରୁଷଙ୍କୁ ମାରିଦେଲେ। ସେମାନେ ବିଶେଷ କରି ମୁଣ୍ଡ, ଆଖି ଓ ଛାତିକୁ ଗୁଳି ମାରୁଥିଲେ। ଆକ୍ରମଣ ସମୟରେ କୌଣସି ସୁରକ୍ଷାକର୍ମୀ ମୁତୟନ ନଥିଲେ।
