ଭୁବନେଶ୍ୱର,୦୫/୦୬: ଯାହାକୁ ଦେଖିବ ଖୁଁଖୁଁ, ସୁଁସୁଁ । କାଶି କାଶି ଗଳା ପଡ଼ିଗଲାଣି । ବୟସ୍କଙ୍କ ଠାରୁ ନେଇ ଛୋଟ ପିଲା ପର୍ଯ୍ୟନ୍ତ ସମସ୍ତଙ୍କୁ ଥଣ୍ଡା, ଜ୍ୱର । ଦିନେ କି ଦୁଇଦିନ ନୁହେଁ ୭ରୁ ୧୫ ଦିନ ପର୍ଯ୍ୟନ୍ତ ଜ୍ୱର ଲାଗି ରହୁଛି । ବାହାରକୁ ଓ କର୍ମ କ୍ଷେତ୍ରକୁ ଗଲେ ଡର ଲାଗୁଛି। ଗୋଟିଏ ପଟେ କରୋନାର ନୂଆ ଭାରିଏଣ୍ଟ ବ୍ୟାପୁଥିବା ବେଳେ ଅନ୍ୟପଟେ ଭାଇରାଲ ଜ୍ୱର ଚିନ୍ତାକୁ ଦ୍ୱିଗୁଣିତ କରୁଛି ।
ସାରା ଓଡ଼ିଶାରେ ବର୍ତ୍ତମାନ ଭାଇରାଲ ଜ୍ୱରକୁ ନେଇ ଭୟ । ହଠାତ୍ ପାଗରେ ପରିବର୍ତ୍ତନ ହୋଇଛି । କେତେବେଳେ ଖରା ତ କେତେବେଳେ ବର୍ଷା ହେଉଛି । ଏଭଳି ସ୍ଥିତିରେ ଭାଇରାଲ ଜ୍ୱର ହେବା ସ୍ୱାଭାବିକ କଥା ବୋଲି ସ୍ୱାସ୍ଥ୍ୟ ବିଶେଷଜ୍ଞ କହିଛନ୍ତି । ଏବେ ପ୍ରାକ ମୌସୁମୀ ସମୟ । ଯେହେତୁ ଗରମ ସ୍ଥିତି ରହିଛି ଏଭଳି ସମୟରେ ଥଣ୍ଡା ହୁଏନି । ହେଲେ ପାଗ ପରିବର୍ତ୍ତନ ଯୋଗୁ ଇନଫ୍ଲୁଏଞ୍ଜା ଭାଇରସ୍ ବ୍ୟାପୁଛି । ତେଣୁ ଜ୍ୱର,ଥଣ୍ଡା ହେଉଛି । ସେହିପରି ଆଉ ଏକ ଭାଇରଲ ହେଲା ରେସପିରେରୋରି ସାନିଟିଆଲ । ଏହା ଶ୍ୱାସରୋଗୀଙ୍କ ପାଇଁ ବିପଜ୍ଜନକ ।
ଦେଶରେ କରୋନା ବ୍ୟାପୁଛି । ଯେଉଁମାନଙ୍କ ଶରୀରରେ ରୋଗ ପ୍ରତିରୋଧକ ଶକ୍ତି କମ୍ ଥିବ କିମ୍ବା ବହୁବିଧ ରୋଗରେ ଆକ୍ରାନ୍ତ ହୋଇଥିବେ ସେମାନଙ୍କ ଶରୀରରେ ଏହାର ଲକ୍ଷଣ ଦେଖାଦେବ । ଜ୍ୱର, ଥଣ୍ଡା ଅଧିକ ଦିନ ଲାଗିରହିଲେ ତୁରନ୍ତ ଡାକ୍ତରଙ୍କ ପରାମର୍ଶ ନିଅନ୍ତୁ । ସମ୍ ହସ୍ପିଟାଲର ବରିଷ୍ଠ ଭେଷଜ ବିଶେଷଜ୍ଞ ଡା. ଶ୍ରୀକାନ୍ତ ଧର୍ କହିଛନ୍ତି, ଯେଉଁ ବ୍ୟକ୍ତି ମଧୁମେହ, ଉଚ୍ଚ ରକ୍ତଚାପ, କର୍କଟ, ଶ୍ୱାସ ଭଳି ରୋଗରେ ପୀଡ଼ିତ ସେମାନେ ସତର୍କ ରହିବା ଆବଶ୍ୟକ । ଯଦି ଲକ୍ଷଣ ଦେଖାଯାଉଛି ତେଣୁ ତୁରନ୍ତ ଆସି ସ୍ୱାସ୍ଥ୍ୟ ଯାଞ୍ଚ କରନ୍ତୁ ବୋଲି ସେ କହିଛନ୍ତି ।
