ଭୁବନେଶ୍ୱର,୨୮/୧୧: ଗୁରୁବାର ରାତିରୁ ରାଜ୍ୟରେ ଶୀତ କମିବ । ରାତି ତାପମାତ୍ରା ପ୍ରାୟ ୪ଡିଗ୍ରୀ ପର୍ଯ୍ୟନ୍ତ ବଢ଼ିପାରେ । ଏହା ପ୍ରଭାବରେ କମ୍ ଶୀତ ଅନୁଭୂତ ହେବ । ଉଭୟ ପାଣିପାଗ ବିଭାଗ ଓ ପାଣିପାଗ ବିଶେଷଜ୍ଞ ଏଭଳି ପୂର୍ବାନୁମାନ କରିଛନ୍ତି । ସେହିଭଳି ତାମିଲନାଡୁ ଓ ଶ୍ରୀଲଙ୍କା ଉପକୂଳରେ ହେବାକୁ ଥିବା ବାତ୍ୟା ପ୍ରଭାବରେ ରାଜ୍ୟରେ କାଁ ଭାଁ ବର୍ଷା ହୋଇପାରେ ।
ବରିଷ୍ଠ ପାଣିପାଗ ବିଶେଷଜ୍ଞ ପ୍ରଫେସର ସୁରେନ୍ଦ୍ରନାଥ ପଶୁପାଳକ କହିଛନ୍ତି, ଭୁବନେଶ୍ୱର ଓ ସଂଲଗ୍ନ ଉପକୂଳ ଜିଲ୍ଲାରେ ୨୮ ତାରିଖ ରାତିରେ ସର୍ବନିମ୍ନ ତାପମାତ୍ରା ପ୍ରାୟ ୪ ଡିଗ୍ରୀ ବଢ଼ିବ । ୨ ତାରିଖ ଯାଏ ରାତି ତାପମାତ୍ରା ଅଧିକ ରହିବ ଓ ଶୀତ କମ୍ ରହିବ । ୩ ତାରିଖରେ ରାତି ତାପମାତ୍ରା ପୁଣି ୨ ଡିଗ୍ରୀ କମିଯିବ । ୪, ୫ ଓ ୬ ତାରିଖରେ ଏଭଳି ତାପମାତ୍ରା ରହିବ । ଡିସେମ୍ବର ୧ ତାରିଖ ଯାଏ ଦିନରେ ପାଗ କୋହଲା ରହିବ । ୩୦ ତାରିଖ ରାତିରେ ଆଭ୍ୟନ୍ତରୀଣ ଜିଲ୍ଲାରେ ରାତି ତାପମାତ୍ରା ୩ ଡିଗ୍ରୀ ବଢ଼ିବ । ୧ ତାରିଖରେ ପୁଣି ୨ ଡିଗ୍ରୀ କମିବ । ଡିସେମ୍ବର ୫ ତାରିଖ ଯାଏ ଏଭଳି ତାପମାତ୍ରା ରହିବ ବୋଲି ସେ ପୂର୍ବାନୁମାନ କରିଛନ୍ତି । ଆସନ୍ତା ୭ଦିନ ଯାଏ କୁହୁଡ଼ି ଦୃଶ୍ୟମାନ ହେବନି ବୋଲି ମଧ୍ୟ ସେ ଆକଳନ କରିଛନ୍ତି ।
ବଙ୍ଗୋପସାଗରରେ ସୃଷ୍ଟି ହୋଇଥିବା ଅବପାତ ଆସନ୍ତା ୧୨ ଘଣ୍ଟାରେ ଛୋଟ ବାତ୍ୟାରେ ପରିଣତ ହୋଇପାରେ । ସମୁଦ୍ର ଉପରେ ଥିବା ସମୟରେ ଏହାର ପ୍ରଭାବ ଅଧିକ ରହିବ । ୩୦ ତାରିଖରେ ବାତ୍ୟା ଉପକୂଳ ଛୁଇଁବା ବେଳକୁ ଦୁର୍ବଳ ହୋଇଯିବ । ସ୍ଥଳଭାଗରେ କମ୍ ବର୍ଷା ଓ ପବନ ହୋଇପାରେ । ତେବେ ଓଡ଼ିଶା ଉପରେ ବାତ୍ୟାର ପ୍ରଭାବ ପଡ଼ିବାର ସମ୍ଭାବନା କମ୍ । ଦକ୍ଷିଣ ଉପକୂଳ ତଥା ଗଞ୍ଜାମରେ ହାଲୁକା ବର୍ଷା ହୋଇପାରେ । ଉପକୂଳ ଓଡ଼ିଶାରେ ଆସନ୍ତା ୪ ଦିନ ପାଗ ମେଘୁଆ ରହିବ । ଏହା ପର ତିନି ଦିନ ପାଗ ଆଂଶିକ ମେଘୁଆ ରହିବ । ଆଭ୍ୟନ୍ତରୀଣ ଅଞ୍ଚଳରେ ପାଗ ଶୁଖିଲା ରହିବ । ୩୦ ତାରିଖରେ ପାଗ ମେଘୁଆ ରହିବ ବୋଲି ପ୍ରଫେସର ପଶୁପାଳକ ଆକଳନ କରିଛନ୍ତି ।
ପାଣିପାଗ ବିଭାଗର ପୂର୍ବାନୁମାନ କହୁଛି, ୨୮, ୨୯ ଓ ୩୦ ତାରିଖରେ ଦକ୍ଷିଣ ଓଡ଼ିଶା ଓ ଉପକୂଳ ଓଡ଼ିଶା ସମେତ ବିଭିନ୍ନ ସ୍ଥାନରେ ହାଲୁକା ବର୍ଷା ହୋଇପାରେ । ୨୮ ତାରିଖରେ କେନ୍ଦ୍ରାପଡ଼ା, ଭଦ୍ରକ, ଜଗତସିଂହପୁର, ପୁରୀ, ଗଞ୍ଜାମ ଓ ଗଜପତି ଜିଲ୍ଲାରେ ହାଲୁକା ବର୍ଷା ହୋଇପାରେ । ୨୯ ତାରିଖରେ ମୟୂରଭଞ୍ଜ, କେନ୍ଦୁଝର, ରାୟଗଡ଼ା, କୋରାପୁଟ ଓ ମାଲକାନଗିରିରେ ସ୍ୱଳ୍ପରୁ ମଧ୍ୟମ ଧରଣର ବର୍ଷା ସମ୍ଭାବନା ଅଛି । ୩୦ ତାରିଖରେ ଉପକୂଳ ଓଡ଼ିଶା ସମେତ ରାୟଗଡ଼ା, କୋରାପୁଟ, ମାଲକାନଗିରି, ମୟୂରଭଞ୍ଜରେ ସ୍ୱଳ୍ପରୁ ମଧ୍ୟମ ଧରଣର ବର୍ଷା ସମ୍ଭାବନା ଅଛି । ଆସନ୍ତା ତିନି ଦିନରେ ରାଜ୍ୟରେ ରାତି ତାପମାତ୍ରା ୨ରୁ ୪ ଡିଗ୍ରୀ ବଢ଼ିବ ।
ମଙ୍ଗଳବାର ରାତିରେ ଜି ଉଦୟଗିରିର ତାପମାତ୍ରା ସବୁଠୁ କମ୍ ବା ୮.୪ ଡିଗ୍ରୀ ସେଲସିୟସ୍ ରହିଥିଲା । ଫୁଲବାଣୀରେ ୮.୫, ସିମିଳିଗୁଡ଼ାରେ ୮.୭ ଓ ଭବାନୀପାଟଣାରେ ୧୦.୪ ଡିଗ୍ରୀ ତାପମାତ୍ରା ରେକର୍ଡ ହୋଇଥିଲା ।
