ନୂଆଦିଲ୍ଲୀ, ୧୨/୦୩: ଭାରତୀୟ କୁସ୍ତି ସଂଘ (ଡବ୍ଲ୍ୟୁଏଫ୍ଆଇ) ଉପରୁ କେନ୍ଦ୍ର କ୍ରୀଡ଼ା ମନ୍ତ୍ରଣାଳୟ ବାସନ୍ଦାଦେଶ ପ୍ରତ୍ୟାହୃତ କରିନେଇଛି । ଫଳରେ ନିର୍ବାଚିତ ଅଧିକାରୀମାନେ ସଂଘର ସମ୍ବିଧାନ ଆଧାରରେ ଏଥର କାର୍ଯ୍ୟ କରିବେ । ବ୍ରିଜଭୂଷଣ ସରଣ ସିଂଙ୍କ ନାମରେ ମହିଳା କୁସ୍ତିଯୋଦ୍ଧାମାନେ ଯୌନ ଶୋଷଣ ଅଭିଯୋଗ ଆଣିବା ପରେ ସେ ସଭାପତି ପଦରୁ ଅନ୍ତର ହୋଇଥିଲେ । ସଂଘର ନୂଆ ନିର୍ବାଚନ ହୋଇଥିଲା । ଏଥିରେ ବ୍ରିଜଭୂଷଣଙ୍କ ଏକାନ୍ତ ଅନୁଗତ ସଞ୍ଜୟ ସିଂ ନୂଆ ସଭାପତି ଭାବେ ନିର୍ବାଚିତ ହୋଇଥିଲେ । ନିର୍ବାଚନରେ ଅନିୟମିତତା ହେବା ଏବଂ ବ୍ରିଜଭୂଷଣଙ୍କ ଅନୁଗତମାନେ ନିର୍ବାଚିତ ହେବା ନେଇ କ୍ରୀଡ଼ାବିତମାନେ ବିରୋଧ କରିଥିଲେ । ଏହାପରେ କ୍ରୀଡ଼ା ମନ୍ତ୍ରଣାଳୟ ଡବ୍ଲ୍ୟୁଏଫ୍ଆଇ ଉପରେ ବାସନ୍ଦ ଲଗାଇଥିଲା । ଭାରତୀୟ ଅଲିମ୍ପିକ୍ସ ସଂଘ(ଆଇଓଏ) ଏହାର ପରିଚାଳନା ନିମନ୍ତେ ଏକ ଆଡ୍-ହକ କମିଟି ଗଠନ କରିଥିଲା ।
୨୦୨୩ ଡିସେମ୍ବର ୨୧ ତାରିଖରେ ଡବ୍ଲ୍ୟୁଏଫ୍ଆଇ ନିର୍ବାଚନ ହୋଇଥିଲା । ୨୪ ତାରିଖରେ ବାସନ୍ଦାଦେଶ ଲାଗିଥିଲା । ୧୫ ମାସ ପରେ ଏହା ପ୍ରତ୍ୟାହୃତ ହୋଇଥିବାରୁ ସଭାପତି ସଞ୍ଜୟ କେନ୍ଦ୍ର କ୍ରୀଡ଼ା ମନ୍ତ୍ରଣାଳୟକୁ ଧନ୍ୟବାଦ ଜଣାଇଛନ୍ତି । ଅମାନ ଆଗକୁ ଏସିଆନ୍ ଚାମ୍ପିଅନସିପ୍ ରହିଛି । ଡବ୍ଲ୍ୟୁଏଫ୍ଆଇ ଏଥିପାଇଁ ଦଳ ଚୟନ କରିବ ।
