ନୂଆଦିଲ୍ଲୀ : ପ୍ରସିଦ୍ଧ ଶିଳ୍ପପତି ରତନ ଟାଟାଙ୍କ ନିଧନ ସମୟରେ ଖୁବ୍ ଚର୍ଚ୍ଚାରେ ଥିଲେ ଶାନ୍ତନୁ ନାଇଡୁ। ରତନ ଟାଟାଙ୍କର ଅନ୍ତିମ ସମୟରେ ସେ ହିଁ ତାଙ୍କର ଅତି ନିକଟତର ଥିଲେ। ଏବେ ଟାଟାଙ୍କର ଅବର୍ତ୍ତରେ ସେ କଣ କରୁଛନ୍ତି ? ଶାନ୍ତନୁ ନିଜେ କହିଛନ୍ତି ନିଜ ଦୈନିକ ଜୀବନର କାର୍ଯ୍ୟ ପନ୍ଥା ବିଷୟରେ। ସେ ଏବେ କୌଣସି ଏକ ପ୍ରୋଜେକ୍ଟରେ କାମ କରୁଛନ୍ତି। ଏନେଇ ସେ ଲିଙ୍କଡଇନ୍ରେ ଏହାର ସୂଚନା ଦେଇଛନ୍ତି। ଶାନ୍ତନୁ ନାଇଡୁ ନିଜର ପୋଷ୍ଟ ମାଧ୍ୟମରେ କହିଛନ୍ତି ଯେ, ସେ ଏବେ ଏକ ପ୍ରୋଜେକ୍ଟରେ କାମ କରୁଛନ୍ତି, ଯାହାକୁ ପ୍ରଥମେ ମୁମ୍ୱାଇରେ ଲଞ୍ଚ କରାଯାଇ ଥିଲା ଏବଂ ଏବେ ଏହାକୁ ଜୟପୁର ନେବାରୁ ପ୍ରସ୍ତୁତି ଚାଲିଛି।
ଶାନ୍ତନୁ ନାଇଡୁଙ୍କର ଏହି ପ୍ୟାଶନ ପ୍ରୋଜେକ୍ଟ ହେଉଛି 'ବୁକିଜ୍’ , ଯାହା ଏକ ସାଇଲେଣ୍ଟ ରିଡିଂର ସୁବିଧା ପ୍ରଦାନ କରିଥାଏ। ବୁକିଜ୍ , ଏକ ପଢୁଥିବା ଗୋଷ୍ଠୀ, ଯେଉଁ ଲୋକ ସାର୍ବଜନିକ ସ୍ଥାନରେ ଏକାଠି ହୋଇ ଚୁପଚାପ୍ ପଢିଥାନ୍ତି। ଏହାର ବିସ୍ତାର ଏବେସୁଦ୍ଧା ବେଙ୍ଗାଲୁରୁ ଓ ପୁଣେରେ କରାଯାଇ ସାରିଛି। ଏବେ ଟାଟାଙ୍କର ମାର୍ଗଦର୍ଶନରେ ନାଇଡୁ ନିଜର ମିଶନକୁ ଜୟପୁର ନେଇ ଯାଉଛନ୍ତି।
ଲିଙ୍କଡଇନ୍ରେ ଜୟପୁର ଲଞ୍ଚ କରିବାର ଘୋଷଣା କରି ନାଇଡୁ ନିଜର ଉତ୍ସାହ ବ୍ୟକ୍ତ କରିଛନ୍ତି। ସେ ନିଜର ପୋଷ୍ଟରେ ଲେଖିଛନ୍ତି , ଜୟପୁର, ଏବେ ସମୟ ଆସି ଗଲା। ଆମେ ଆପଣଙ୍କୁ ରବିବାର ୮ ତାରିଖରେ ଜୟପୁର ବୁକିଜ୍ ରେ ଦେଖିବୁ। ଲଞ୍ଚ ପାଇଁ ନିମ୍ନରେ ସାଇନ୍ ଅପ୍ କରନ୍ତୁ । ମୁଁ ଖୁବ୍ ଉତ୍ସାହିତ ଅଛି ।
୮ ଡିସେମ୍ୱରରେ ହେବାକୁ ଥିବା ଏହି କାର୍ଯ୍ୟକ୍ରମ ପାଠକଙ୍କୁ ସାଇଲେଣ୍ଟ ରିଡିଂ ଗ୍ରୁପ୍ରେ ସାମିଲ ହେବା ଓ ନିଜକୁ ଏଥିରେ ରେଜିଷ୍ଟର୍ଡ କରିବାର ସୁଯୋଗ ଦେଉଛି।
