ନୂଆଦିଲ୍ଲୀ,୧୮/୦୮: ମହାରାଷ୍ଟ୍ର ରାଜ୍ୟପାଳ ସି.ପି ରାଧାକ୍ରିଷ୍ଣନ (ଚନ୍ଦ୍ରପୁରମ ପୋନ୍ନୁସ୍ୱାମୀ ରାଧାକ୍ରିଷ୍ଣନ) ଏନ୍ଡିଏର ଉପରାଷ୍ଟ୍ରପତି ପ୍ରାର୍ଥୀ ହୋଇଛନ୍ତି । ରବିବାର ଅନୁଷ୍ଠିତ ବିଜେପି ସଂସଦୀୟ ଦଳ ବୈଠକରେ ତାଙ୍କ ନାମ ଉପରେ ସହମତି ପ୍ରକାଶ ପାଇଛି । ବୈଠକ ପରେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେ.ପି ନଡ୍ଡା ରାଧାକ୍ରିଷ୍ଣନଙ୍କ ନାମ ଘୋଷଣା କରିଛନ୍ତି । ତାମିଲନାଡୁର ତିରୁପୁର ଠାରେ ୧୯୫୭ ଅକ୍ଟୋବର ୨୦ରେ ରାଧାକ୍ରିଷ୍ଣନଙ୍କ ଜନ୍ମ । ନିଜର ରାଜନୈତିକ ଜୀବନ ସେ ଆରଏସ୍ଏସ୍ ଓ ଜନସଂଘରୁ ଆରମ୍ଭ କରିଥିଲେ । ୧୬ ବର୍ଷ ବୟସରୁ ସେ ଆରଏସ୍ଏସ୍ ସହ ଜଡିତ ଥିଲେ । ୧୯୯୮ ଓ ୧୯୯୯ରେ କୋଏମ୍ବାଟୁର ଆସନରୁ ଲୋକସଭାକୁ ନିର୍ବାଚିତ ହୋଇଥିଲେ । ତାମିଲନାଡୁରେ ଜନ୍ମ, ୪୦ ବର୍ଷର ରାଜନୈତିକ କ୍ୟାରିୟର । କିଏ ଏନ୍ଡିଏ ଉପରାଷ୍ଟ୍ରପତି ପ୍ରାର୍ଥୀ ସି.ପି ରାଧାକୃଷ୍ଣନ । ତାଙ୍କ ନାମ ପଛର କାହାଣୀ କଣ ଜାଣନ୍ତୁ ଏହି ରିପୋର୍ଟରେ ।
ସି.ପି ରାଧାକ୍ରିଷ୍ଣନଙ୍କ ବିଷୟରେ...ଏନ୍ଡିଏ ଉପରାଷ୍ଟ୍ରପତି ପ୍ରାର୍ଥୀ ସି.ପି ରାଧାକୃଷ୍ଣନ ତାମିଲନାଡୁର ତିରୁପୁରଠାରେ ୧୯୫୭ ଅକ୍ଟୋବରର ୨୦ରେ ଜନ୍ମଗ୍ରହଣ କରିଥିଲେ ।୬୮ ବର୍ଷୀୟ ରାଧାକୃଷ୍ଣନ ଅନେକ ରାଜ୍ୟର ରାଜ୍ୟପାଳ ରହିଛନ୍ତି । ସେ ୨୦୨୩ ଫେବୃଆରୀରୁ ଜୁଲାଇ ୨୦୨୪ ଯାଏ ଝାଡ଼ଖଣ୍ଡ ରାଜ୍ୟପାଳ ଥିଲେ । ତେଲେଙ୍ଗାନା ରାଜ୍ୟପାଳ ଓ ପୁଡ଼ୁଚେରୀ ଉପରାଜ୍ୟପାଳ ଭାବେ ଅତିରିକ୍ତ ଦାୟିତ୍ୱ ତୁଲାଇଛନ୍ତି । ଗତ ବର୍ଷ ଜୁଲାଇରୁ ସେ ମହାରାଷ୍ଟ୍ର ରାଜ୍ୟପାଳ ଅଛନ୍ତି । ଭାରତୀୟ ଜନତା ପାର୍ଟିର ଜଣେ ବରିଷ୍ଠ ନେତା ଥିଲେ ଏବଂ ବର୍ତ୍ତମାନ (୩୧ ଜୁଲାଇ ୨୦୨୪ ରୁ ଏପର୍ୟ୍ୟନ୍ତ) ମହାରାଷ୍ଟ୍ରର ରାଜ୍ୟପାଳ ଅଛନ୍ତି । ୧୯୭୩ ମସିହାରେ ୧୬ ବର୍ଷ ବୟସରେ ରାଷ୍ଟ୍ରୀୟ ସ୍ୱୟଂସେବକ ସଂଘ (ଆରଏସଏସ)ରେ ଯୋଗ ଦେଇଥିଲେ । ୧୯୭୪ ମସିହାରେ ସେ ଭାରତୀୟ ଜନସଂଘର ତାମିଲନାଡୁ ରାଜ୍ୟ କାର୍ୟ୍ୟକାରିଣୀର ସଦସ୍ୟ ହୋଇଥିଲେ। ୧୯୯୬ ମସିହାରେ ତାଙ୍କୁ ତାମିଲନାଡୁ ବିଜେପିର ସଚିବ ଭାବରେ ନିଯୁକ୍ତ କରାଯାଇଥିଲା । ସି.ପି ରାଧାକ୍ରିଷ୍ଣନ କୋଏମ୍ବାଟୁରରୁ ଦୁଇଥର (୧୯୯୮ ଏବଂ ୧୯୯୯)ରେ ସାଂସଦ ରହିସାରିଛନ୍ତି । ତାଙ୍କର ୪୦ ବର୍ଷର ରାଜନୈତିକ କ୍ୟାରିୟର ରହିଛି । ରାଧାକୃଷ୍ଣନ ୨୦୦୪ ରୁ ୨୦୦୭ ପର୍ଯ୍ୟନ୍ତ ତାମିଲନାଡୁ ବିଜେପି ମୁଖ୍ୟ ଭାବରେ କାର୍ଯ୍ୟ କରିଥିଲେ । ଏହି ସମୟ ମଧ୍ୟରେ, ସେ ୧୯,୦୦୦ କିଲୋମିଟର ଯାଏ ୯୩ ଦିନିଆ 'ରଥଯାତ୍ରା' କରିଥିଲେ । ଏହି ଯାତ୍ରା ଭାରତୀୟ ନଦୀଗୁଡ଼ିକର ସଂଯୋଗୀକରଣ, ଆତଙ୍କବାଦର ନିରାକରଣ, ସମାନ ନାଗରିକ ସଂହିତା କାର୍ଯ୍ୟକାରୀ କରିବା ଏବଂ ନିଶାଦ୍ରବ୍ୟର ବିପଦ ବିରୁଦ୍ଧରେ ଲଢ଼ିବା ଦାବିରେ ଆୟୋଜିତ ହୋଇଥିଲା ।
ଏହି ଭରସାରେ ନାମ ରଖିଥିଲେ ମା'- ଏନ୍ଡିଏ ଉପରାଷ୍ଟ୍ରପତି ପ୍ରାର୍ଥୀ ଭାବେ ଚନ୍ଦ୍ରପୁରମ ପୋନ୍ନୁସ୍ୱାମୀ (ସି.ପି) ରାଧାକ୍ରିଷ୍ଣନଙ୍କ ନାମ ଘୋଷଣା ପରେ ତାମିଲନାଡୁର ତିରୁପୁରରେ ଥିବା ତାଙ୍କ ଘରେ ଏକ ଉତ୍ସବର ମାହୋଲ ଥିଲା । ତାଙ୍କ ମାଆ ଜାନକୀ ଅମ୍ମାଲ ଘରେ କେକ୍ କାଟି ଖୁସି ମନାଇଥିଲେ । ତାଙ୍କ ପୁଅକୁ ବିଜେପି ନେତୃତ୍ୱାଧୀନ ଏନଡିଏ ଦେଶର ପରବର୍ତ୍ତୀ ଉପରାଷ୍ଟ୍ରପତି ପଦ ପାଇଁ ମନୋନୀତ କରିଛି । ଜାନକୀ ଅମ୍ମାଲ ତାଙ୍କ ନାମ ପଛରେ ଥିବା କାହାଣୀକୁ ମନେ ପକାଇଥିଲେ ।
ସର୍ବପଲ୍ଲୀ ରାଧାକୃଷ୍ଣନଙ୍କ ସହ ସିପିଙ୍କ କନେକ୍ସନ- ନାମକୁ ନେଇ ସିପିଙ୍କ ମାଆ କହିଛନ୍ତି,'' ନାମ ସିପି ରାଧାକୃଷ୍ଣନ ରଖିଥିଲି, ଯାହା ଦ୍ୱାରା ସେ ରାଷ୍ଟ୍ରପତି ଡକ୍ଟର ସର୍ବପଲ୍ଲୀ ରାଧାକୃଷ୍ଣନଙ୍କ ପରି ହୋଇପାରିବେ । ଭଗବାନ ଏହି ସମ୍ମାନ ଦେଇଛନ୍ତି । ଜାନକୀ ଅମ୍ମଲା ଯେଉଁ ଆଶାର ସହିତ ପୁଅଙ୍କ ନାମ ରଖିଥିଲେ ତାକୁ ମନେ ପକାଇଛନ୍ତି । ଆଉ ଏବେ ଏହି ନାମ ତାଙ୍କ ପୁଅକୁ ରାଷ୍ଟ୍ରପତି ଭବନର ଆଉ ଗୋଟିଏ ପାଦ ନିକଟତର କରିଛି । ଉପ-ରାଷ୍ଟ୍ରପତି ନିର୍ବାଚନରେ ପୁଅର ବିଜୟ ପାଇଁ ପ୍ରାର୍ଥନା କରିଛନ୍ତି । ଭଗବାନ ଗଣେଶ ତାଙ୍କୁ ଆଶୀର୍ବାଦ କରନ୍ତୁ ବୋଲି କହିଛନ୍ତି ସିପି ରାଧାକୃଷ୍ଣନଙ୍କ ମାଆ ।
ସି.ପି ଆର ଏବେ ଜାତୀୟ ସ୍ତରରେ ଶିରୋନାମା ପାଲଟିଛନ୍ତି । ଯଦି ସି.ପି ଆର ଉପରାଷ୍ଟ୍ରପତି ନିର୍ବାଚିତ ହୁଅନ୍ତି, ତେବେ ସେ ତାମିଲନାଡୁରୁ ତୃତୀୟ ଉପରାଷ୍ଟ୍ରପତି ହେବେ । ତାଙ୍କ ପୂର୍ବରୁ ଡକ୍ଟର ସର୍ବପଲ୍ଲୀ ରାଧାକୃଷ୍ଣନ ଏବଂ ଆର. ଭେଙ୍କଟରମଣ ଏହି ପଦବୀରେ ରହି ସାରିଛନ୍ତି। ଉଭୟ ପରେ ରାଷ୍ଟ୍ରପତି ହୋଇଥିଲେ । ରାଷ୍ଟ୍ରପତି ଅବଦୁଲ କଲାମ ମଧ୍ୟ ତାମିଲନାଡୁର ଥିଲେ ।
