ନୂଆଦିଲ୍ଲୀ,୦୬/୦୫: ଆଜି ଅପରେସନ ସିନ୍ଦୂରର ପ୍ରଥମ ବାର୍ଷିକୀ। ୨୨ ଏପ୍ରିଲ୍, ୨୦୨୫ରେ ପହଲଗାମ୍ ଆକ୍ରମଣର ଜବାବରେ, ଭାରତ ୭ ମଇ ମଧ୍ୟରାତ୍ରୀରେ ପାକ୍ ଅଧିକୃତ କାଶ୍ମୀରର ଆତଙ୍କବାଦୀ ଭିତ୍ତିଭୂମି ଉପରେ ଏକ ବଡ଼ ବିମାନ ଆକ୍ରମଣ କରିଥିଲା। ଏହି ଅଭିଯାନ ଏତେ ସଠିକ୍, ଦ୍ରୁତ ଏବଂ ସୁଚିନ୍ତିତ ଥିଲା ଯେ ଶତ୍ରୁ ମଧ୍ୟ ଏହାର ଟେର୍ ପାଇନଥିଲା। ମାତ୍ର ୨୩ ମିନିଟ୍ ମଧ୍ୟରେ, ବାହାବଲପୁରରେ ଜୈଶ-ଏ-ମହମ୍ମଦର ଆତଙ୍କବାଦୀ ଶିବିର ଏବଂ ମୁରିଦକେରେ ଲସ୍କର-ଏ-ତୈବା ଆତଙ୍କବାଦୀ ଶିବିର ଧ୍ୱଂସ ହୋଇଯାଇଥିଲା। ଯେତେବେଳେ ପାକିସ୍ତାନ ପ୍ରତିଶୋଧ ନେବାକୁ ଚେଷ୍ଟା କରିଥିଲା, ଭାରତୀୟ ଲଢ଼ୁଆ ବିମାନଗୁଡ଼ିକ କ୍ଷେପଣାସ୍ତ୍ର ଆକ୍ରମଣରେ ନୁର ଖାନ ଏବଂ ସରଗୋଧା ସମେତ ଏହାର ୧୧ଟି ବାୟୁସେନା ଘାଟିକୁ ଧ୍ୱଂସ କରିଦେଇଥିଲା, ଯାହା ପାକିସ୍ତାନକୁ ଆତ୍ମସମର୍ପଣ କରିବାକୁ ବାଧ୍ୟ କରିଥିଲା। ମାତ୍ର ୮୮ ଘଣ୍ଟା ମଧ୍ୟରେ, ପାକିସ୍ତାନ ଯୁଦ୍ଧବିରତି ପ୍ରସ୍ତାବ ଦେଇଥିଲା।
ରୁଷ-ୟୁକ୍ରେନ ଯୁଦ୍ଧ ଏବଂ ଇରାନ-ଆମେରିକା ମଧ୍ୟରେ ଲମ୍ବି ଚାଲିଛି ବିବାଦ:
ରୁଷ-ୟୁକ୍ରେନ ଯୁଦ୍ଧ ଏବଂ ଇରାନ-ଆମେରିକା ବିବାଦ ଏକ ଅନ୍ତହୀନ ଦିଗରେ ବଢ଼ିବାରେ ଲାଗିଛି, ଯାହା ବିଶ୍ୱ ଅର୍ଥନୀତିକୁ ପଙ୍ଗୁ କରିଦେଉଛି। ତଥାପି, ଅପରେସନ ସିନ୍ଦୁର ଏକ ଉଦାହରଣ ଭାବରେ ଉଭା ହୋଇଛି, ଯାହା ଅଳ୍ପ ସମୟ ମଧ୍ୟରେ ଶତ୍ରୁର ହୃଦୟରେ ଏକ ତୀକ୍ଷ୍ଣ, ସଠିକ୍ ଆଘାତ ଦେଇଛି, ଯାହାର ଯନ୍ତ୍ରଣା ସବୁଦିନ ପାଇଁ ଅନୁଭବ କରିବ ଆତଙ୍କାବାଦୀଙ୍କ ପୃଷ୍ଠପୋଷକ ପାକିସ୍ତାନ। ଅପରେସନ ସିନ୍ଦୁର ଚାଲୁ ରହିବା ସହିତ, ଭାରତ ପାକିସ୍ତାନକୁ ଏକ ଚେତାବନୀ ସଙ୍କେତ ଦେଇଛି ଯେ ପାକିସ୍ତାନ କିମ୍ବା ଏହାର ସମର୍ଥିତ ଆତଙ୍କବାଦୀ ସଂଗଠନଗୁଡ଼ିକର ଯେକୌଣସି ଦୁଃସାହସିକ କାର୍ଯ୍ୟର ଉପଯୁକ୍ତ ଜବାବ ଦିଆଯିବ। ଏହା ପାକିସ୍ତାନ-ପ୍ରାୟୋଜିତ ପ୍ରକ୍ସି ଯୁଦ୍ଧ ବିରୁଦ୍ଧରେ ଭାରତର ପ୍ରଭାବଶାଳୀ ପ୍ରତିରୋଧକ ଭାବରେ ଉଭା ହୋଇଛି।
ଅଧିକ ପଢ଼ନ୍ତୁ: ବିଶ୍ୱ ସାମ୍ବାଦିକତାର ‘ଅସ୍କାର’ ଜିତିଲେ ଭାରତୀୟ, ପୁଲିଜର ପୁରସ୍କାରରେ ସମ୍ମାନିତ ହେଲେ ଆନନ୍ଦ ଆର୍କେ ଏବଂ ସୁପର୍ଣ୍ଣା ଶର୍ମା
ଅପରେସନ ସିନ୍ଦୂର ଭଳି ଶିକ୍ଷାକୁ କେବେ ଭୁଲିବେନି ଶତ୍ରୁ:
* ୭ ମଇରେ ୯ଟି ଆତଙ୍କବାଦୀ ଲକ୍ଷ୍ୟସ୍ଥଳକୁ ଟାର୍ଗେଟ କରାଯାଇଥିଲା।
* ଏହି ଆକ୍ରମଣରେ ୧୦୦ ରୁ ଅଧିକ ଆତଙ୍କବାଦୀ ନିହତ ହୋଇଥିଲେ।
* ୮୮ ଘଣ୍ଟା ମଧ୍ୟରେ ପାକିସ୍ତାନ ଆତ୍ମସମର୍ପଣ କରିବାକୁ ବାଧ୍ୟ ହୋଇଥିଲା।
* ବିମାନ ଆକ୍ରମଣରେ ୧୧ଟି ପାକିସ୍ତାନୀ ସାମରିକ ଘାଟି ଧ୍ୱଂସ ପାଇଥିଲା।
* ୬ଟି ପାକିସ୍ତାନୀ ଯୁଦ୍ଧ ବିମାନକୁ ଖସାଇ ଦିଆଯାଇଥିଲା।
ପ୍ରକ୍ସି ଯୁଦ୍ଧ ବିରୁଦ୍ଧରେ ସଠିକ ସାମରିକ କାର୍ଯ୍ୟାନୁଷ୍ଠାନ:
ଯୁଦ୍ଧର ଦୀର୍ଘକାଳୀନ ଫାଶରେ ଫସିବା ପରିବର୍ତ୍ତେ ଅପରେସନ୍ ସିନ୍ଦୁର ଏପରି ପ୍ରକ୍ସି ଯୁଦ୍ଧ ବିରୁଦ୍ଧରେ ପ୍ରତିଶୋଧମୂଳକ ସାମରିକ କାର୍ଯ୍ୟାନୁଷ୍ଠାନର ଏକ ଉଦାହରଣ ସୃଷ୍ଟି କରିଛି। ଉରି ଆକ୍ରମଣ ପରେ ସର୍ଜିକାଲ୍ ଷ୍ଟ୍ରାଇକ୍, ପୁଲୱାମା ଆକ୍ରମଣ ପରେ ବାଲାକୋଟରେ ବିମାନ ଆକ୍ରମଣ ଏବଂ ପହଲଗାମ୍ ଆକ୍ରମଣର ଜବାବରେ ଅପରେସନ୍ ସିନ୍ଦୁର ନିଶ୍ଚିତ ଭାବରେ ପାକିସ୍ତାନର ଶାସକ ଏବଂ ସେନାର ମନରେ ରହିଯାଇଥିବ ଯେ, ଏପରି ଘୃଣ୍ୟ କାମର ପରିଣତି କେତେ ଭୟଙ୍କର ହୋଇପାରେ। କେବଳ ପିଓକେରେ ଆତଙ୍କବାଦୀ ସଂଗଠନ ଆଡ୍ଡା ଉପରେ ଆକ୍ରମଣ କରି, ଭାରତ ଏହାର ଉଦ୍ଦେଶ୍ୟ ସ୍ପଷ୍ଟ କରିଛି: ଏହା କୌଣସି ପଡ଼ୋଶୀ ଦେଶ ବିରୁଦ୍ଧରେ ଉତ୍ତେଜନାମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଚାହୁିନାହିଁ, କିନ୍ତୁ ସେଠାରୁ ପ୍ରାୟୋଜିତ ଏବଂ ସମର୍ଥିତ ଆତଙ୍କବାଦୀ ଆକ୍ରମଣର ଭିତ୍ତିଭୂମି ଉପରେ ଆକ୍ରମଣ କରିବାର ଢ଼େର ଅଧିକାର ରଖିଛି ଭାରତ। ଭାରତ ଦେଶକୁ କୌଣସି କ୍ଷତି ନ ପହଞ୍ଚାଇ ଆତଙ୍କବାଦୀ ସଂଗଠନ ଏବଂ ସେମାନଙ୍କର ସମର୍ଥକମାନଙ୍କୁ ନିପାତ କରିବା ପାଇଁ ମଧ୍ୟ ନିଜର ପ୍ରତିବଦ୍ଧତା ପ୍ରଦର୍ଶନ କରିଛି।
୯ଟି ଆତଙ୍କବାଦୀ ଶିବିର ଟାର୍ଗେଟ, ୧୧ଟି ସାମରିକ ଘାଟି ଧ୍ୱଂସ:
ପହଲଗାମ ଆକ୍ରମଣରେ ଭାରତ ନଅଟି ଲକ୍ଷ୍ୟସ୍ଥଳ ଚୟନ କରିଥିଲା, ଯେଉଁଥିରେ ୧୦୦ରୁ ଅଧିକ ଆତଙ୍କବାଦୀ ନିହତ ହୋଇଥିଲେ। ଜୈଶ-ଏ-ମହମ୍ମଦ ମୁଖ୍ୟ ମାସୁଦ ଆଝାରର ପରିବାରର ଅନେକ ସଦସ୍ୟ ମଧ୍ୟ ନିହତ ହୋଇଥିଲେ। ପାକିସ୍ତାନ ପ୍ରତିଶୋଧ ନେବା ସମୟରେ, ଏହାର ୧୧ଟି ସାମରିକ ଘାଟିକୁ ନଷ୍ଟ କରିସାରିଥିଲା ବ୍ରହ୍ମୋସ ପରି ଘାତକ କ୍ଷେପଣାସ୍ତ୍ର। ମାତ୍ର ୮୮ ଘଣ୍ଟା ମଧ୍ୟରେ ଲକ୍ଷ୍ୟ ପୂରଣ କରି ଶତ୍ରୁକୁ ଶିକ୍ଷା ଦେବା ପରେ, ଶତ୍ରୁ ରାଷ୍ଟ୍ର ଅନୁରୋଧ କଲା ଏବଂ ଭାରତ ଚାରି ଦିନ ମଧ୍ୟରେ ନିଜ ସର୍ତ୍ତରେ ଯୁଦ୍ଧବିରତି ପାଇଁ ରାଜି ହୋଇଥିଲା। ଶତ୍ରୁକୁ ଏତେ ଶୀଘ୍ର ଯୁଦ୍ଧବିରତି କରିବାକୁ ବାଧ୍ୟ କରି, ଭାରତ ଆଧୁନିକ ଇତିହାସରେ ବିରଳ ଦେଖାଯାଇଥିବା ନିୟନ୍ତ୍ରିତ ଯୁଦ୍ଧର ରଣନୀତି ପ୍ରଦର୍ଶନ କରିଥିଲା। ଏହି ଆକ୍ରମଣର ଫଳସ୍ବରୁପ ପାକିସ୍ତାନର ଅର୍ଥନୀତି ୧୨,୫୦୦ କୋଟିରୁ ଅଧିକ କ୍ଷତି ସହିଥିଲା।
ପାକିସ୍ତାନର କେତେ କ୍ଷତି?
* ରାୱଲପିଣ୍ଡିର ନୁର ଖାନ ଏୟାରବେସର କୋଠା ଏବଂ ହ୍ୟାଙ୍ଗର ନଷ୍ଟ ହୋଇଥିଲା। ତୁର୍କୀର ବାୟରକ୍ତାର TB-2 ଡ୍ରୋନର ଏକ ଭଣ୍ଡାର ଏବଂ ଏହାର AI ସିଷ୍ଟମ ନଷ୍ଟ ହୋଇଥିଲା।
* ଭୋଲାରି ଏୟାରବେସ (କରାଚି) ରେ, ସ୍ୱିଡିଶ-ଉତ୍ପନ୍ନ AWACS ବିମାନ (୩୦ କୋଟି ଡଲାର ମୂଲ୍ୟ) ଏହାର ହ୍ୟାଙ୍ଗର ସହିତ ସମ୍ପୂର୍ଣ୍ଣ ନଷ୍ଟ ହୋଇଥିଲା।
* ମୁରିଦକେ ଏୟାରବେସ (ଚକୱାଲ) ରେ ପାକିସ୍ତାନର ଡ୍ରୋନ ହବ୍ ନଷ୍ଟ ହୋଇଥିଲା, ୧୦ ରୁ ଅଧିକ ଚୀନ୍ ଡ୍ରୋନ୍ UAV ନଷ୍ଟ ହୋଇଗଲା।
* ଜାକୋବାବାଦ ଏୟାରବେସରେ ତିନୋଟି F-16 ଲଢ଼ୁଆ ବିମାନ ଗୁରୁତର ଭାବରେ କ୍ଷତିଗ୍ରସ୍ତ ହୋଇଥିଲା।
* ରହିମ ୟାର ଖାନ ଏୟାରବେସର ରନୱେ ସର୍ବାଧିକ କ୍ଷତି ସହିଥିଲା।
* ସରଗୋଧା ଏୟାରବେସରେ ସାମରିକ ଭିତ୍ତିଭୂମି ଏବଂ ବିମାନକୁ ଟାର୍ଗେଟ କରାଯାଇଥିଲା।
* ଆରିଫୱାଲା, ଚୁନିଆନ, ପସରୁର ଏବଂ ସୁକୁର ଭଳି ଏୟାରଫିଲ୍ଡରେ ବାୟୁ ପ୍ରତିରକ୍ଷା ରାଡାରଗୁଡ଼ିକୁ ନଷ୍ଟ କରାଯାଇଥିଲା।
ରଣନୈତିକ ଏବଂ କୂଟନୈତିକ ଚାପ:
ସିନ୍ଧୁ ଜଳ ଚୁକ୍ତିନାମା ବାତିଲ କରି ଭାରତ ପାକିସ୍ତାନକୁ ଏକ ବଡ଼ ଆଘାତ ଦେଇଛି। ଏହା ପାକିସ୍ତାନର କୃଷି ଏବଂ ବିଦ୍ୟୁତ୍ ଉତ୍ପାଦନ ପାଇଁ ଏକ ଅସ୍ତିତ୍ୱର ବିପଦ ସୃଷ୍ଟି କରିଛି। ଭାରତ ପାକିସ୍ତାନ ସହିତ ବାଣିଜ୍ୟକୁ ସମ୍ପୂର୍ଣ୍ଣ ଭାବରେ ସ୍ଥଗିତ ରଖିଛି ଏବଂ ପାକିସ୍ତାନୀ କୂଟନୀତିଜ୍ଞମାନଙ୍କୁ ବହିଷ୍କାର କରିଛି। ଆତଙ୍କବାଦର ଆଶ୍ରୟସ୍ଥଳ ଭାବରେ ପାକିସ୍ତାନର ଭୂମିକାକୁ ପ୍ରକାଶ କରିବା ପାଇଁ ଏହା ଏକ କୂଟନୈତିକ ମିଶନ ଅଟେ।
ପ୍ରମେୟ ପୃଷ୍ଠାର ପ୍ରମୁଖ ଖବର: ଶକ୍ତିଶାଳୀ NDAକୁ ନ ବାଛି, କାହିଁକି କଂଗ୍ରେସ ସହ ମେଣ୍ଟ କଲେ ବିଜୟ ?
