ଗୁମ୍ମା, ୯।୬ : ଗଜପତି ଜିଲ୍ଲା ଗୁମ୍ମା ବ୍ଲକ ଅନ୍ତର୍ଗତ ଗାଇବା ଗ୍ରାମର ଓଡ଼ିଆ ସାହିରେ ଘଟିଛି ଏକ ଅଭାବନୀୟ ଘଟଣା। ସ୍ତ୍ରୀର ଚରିତ୍ରକୁ ସନ୍ଦେହ କରି ହତ୍ୟା କରିଛି ସ୍ବାମୀ । ମୃତକ ଜଣକ ହେଲେ ମନିକା ପାଇକ (୨୬)। ହତ୍ୟା କରି ସ୍ବାମୀ ନରେନ୍ଦ୍ର ପାଇକ ଫେରାର ହୋଇ ଯାଇଛି ।
ଗଜପତି ଜିଲ୍ଲା ନୂଆଗଡ ବ୍ଲକ କେରେଡ଼ାଙ୍ଗ ଗ୍ରାମର ନରେନ୍ଦ୍ର ପାଇକ ଗାଇବା ଗ୍ରାମ ଓଡିଆ ସାହିର ମନିକା ପାଇକଙ୍କୁ ଆଜକୁ ୭ ବର୍ଷ ତଳେ ଵିଵାହ କରିଥିଲେ। ଏମାନଙ୍କ ପାଞ୍ଚ ବର୍ଷର ଝିଅ ବି ରହିଛି। ମନିକା ନିଜ ମାଆ ଘରେ ଗାଇବାରେ ଦୋକାନ କରି ରହୁଥିବା ବେଳେ ସ୍ବାମୀ ନରେନ୍ଦ୍ର ହାଇଦ୍ରାବାଦରେ କାମ କରୁଥିଲେ। ହାଇଦ୍ରାବାଦରୁ ଆସିଲେ ସେ ନିଜ ଶାଶୁଘରେ ଗାଇବାରେ ହିଁ ରହୁଥିଲେ। ହେଲେ ସୋମବାର ପାହାନ୍ତିଆ ବେଳେ ମନିକାଙ୍କ ମା’ ଗାଧେଇବାକୁ ବାହାରକୁ ଯାଇଥିଲେ। ଗାଧୋଇକି ଫେରିଲା ପରେ ରକ୍ତ ଜୁଡୁବୁଡୁ ଅବସ୍ଥାରେ ଝିଅ ତଳେ ପଡ଼ିଥିବା ଦେଖିବାକୁ ପାଇଥିଲେ। ପରେ ଅନ୍ୟମାନଙ୍କୁ ଝିଅକୁ ହତ୍ୟା କରାଯାଇଥିବା ଖବର ଦେଇଥିଲା। ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ନିଜ ସ୍ତ୍ରୀର ଅନୈତିକ ସମ୍ପର୍କ ଥିବା ସନ୍ଦେହ କରି ହତ୍ୟା କରିଥିବା ସନ୍ଦେହ କରାଯାଉଛି। ଅନ୍ୟ ପଟେ ତଦନ୍ତ ପରେ ସଠିକ ସୂଚନା ମିଳିବ ବୋଲି ପୋଲିସ କହିଛି।
