ଆସିକା,୧୪/୧୧: ପାରିବାରିକ କଳହର କରୁଣ ପରିଣତି । ସ୍ୱାମୀର ଛୁରା ମାଡ଼ରେ ଗୁରୁତର ହେଲା ସ୍ତ୍ରୀ । ଗୁରୁତର ମହିଳା ଜଣକ ଲିଟିଲି ପାଣିଗ୍ରାହୀ (୩୨) ବୋଲି ଜଣାପଡ଼ିଛି । ଗଞ୍ଜାମ ଜିଲ୍ଲା ଧରାକୋଟ ଥାନା ଅନ୍ତର୍ଗତ ଢ଼ଉଗାଁରେ ଏଭଳି ଏକ ଅଭାବନୀୟ ଘଟଣା ଘଟିଛି ।
ସୂଚନା ମୁତାବକ, ବୁଧବାର ବିଳମ୍ୱିତ ରାତିରେ ପାରିବାରିକ କଳହକୁ ନେଇ ଲିଟିଲି ପାଣିଗ୍ରାହୀଙ୍କୁ ତାଙ୍କ ସ୍ଵାମୀ ଛୁଆ ମାଡ କରିଥିଲେ । ଛୁରା ମାଡରେ ଲିଟିଲିଙ୍କ ପେଟ ଓ ହାତକୁ ଆଘତ ଲାଗିଥିଲା । ସ୍ୱାମୀଙ୍କ ଛୁରା ମାଡ଼ରେ ସେ ଗୁରୁତର ହୋଇ ଚିତ୍କାର କରିଥିଲେ । ମହିଳାଙ୍କ ଚିତ୍କାର ଶୁଣି ପଡୋଶୀ ଲୋକେ ଦୌଡି ଆସି ତାଙ୍କୁ ଉଦ୍ଧାର କରିଥିଲେ । ମହିଳାଙ୍କୁ ସେଠାରୁ ଉଦ୍ଧାର କରି ଆସିକା ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରିଥିଲେ । ଏହା ସହ ପୋଲିସକୁ ମଧ୍ୟ ଏହି ଘଟଣା ସମ୍ୱନ୍ଧରେ ଅବଗତ କରାଇଥିଲେ । ଖବର ପାଇ ଘଟଣାସ୍ଥଳରେ ଧରାକୋଟ ପୋଲିସ ପହଞ୍ଚି ଅଭିଯୁକ୍ତ ସ୍ବାମୀଙ୍କୁ ଅଟକ ରଖିଛି । ଏହା ସହ ଘଟଣାର ତଦନ୍ତ ଚଳାଇଛି ।
