ନୂଆଦିଲ୍ଲୀ,୦୪/୦୨: ବିରାଟ କୋହଲି ଆଇପିଏଲରେ ଦୀର୍ଘ ସମୟ ଧରି ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରର ଅଧିନାୟକ ଥିଲେ। ବିରାଟ କୋହଲିଙ୍କ ପରେ, ଫାଫ୍ ଡୁ ପ୍ଲେସିସ୍ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରର ଅଧିନାୟକତ୍ୱ ଗ୍ରହଣ କରିଥିଲେ, କିନ୍ତୁ ଏବେ ଫ୍ରାଞ୍ଚାଇଜ୍ ଦକ୍ଷିଣ ଆଫ୍ରିକୀୟ କିମ୍ବଦନ୍ତୀଙ୍କୁ ଏହି ପଦବୀରୁ ମୁକ୍ତ କରିଛି। ତଥାପି, ଆଇପିଏଲ୍ ୨୦୨୫ ସିଜିନ୍ ଆରମ୍ଭ ହେବା ପୂର୍ବରୁ, ବଡ଼ ପ୍ରଶ୍ନ ହେଉଛି ରୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୋରର ଅଧିନାୟକ କିଏ ହେବ? ବିରାଟ କୋହଲି ପୁଣି ଥରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରର ଅଧିନାୟକତ୍ୱ ଗ୍ରହଣ କରିବେ କି? ଏହି ପ୍ରଶ୍ନ ଉପରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ବଡ଼ ସଙ୍କେତ ଦେଇଛି। ସୂଚନାଥାଉକି, ଆରସିବିର ଉପାଧ୍ୟକ୍ଷ ଏବଂ ମୁଖ୍ୟ ରାଜେଶ ମେନନ ଏକ ସାକ୍ଷାତକାରରେ ଅନେକ ଦିଗ ଉପରେ ପ୍ରତିକ୍ରିୟା ଦେଇଛନ୍ତି।
ସ୍ପୋର୍ଟସ୍ ଟକ୍ ସହିତ ଏକ ସାକ୍ଷାତକାରରେ ରାଜେଶ ମେନନ୍ କହିଛନ୍ତି ଯେ ଆମର ଅଧିନାୟକ କିଏ ହେବ ତାହା ଆମେ ଏପର୍ଯ୍ୟନ୍ତ ନିଷ୍ପତ୍ତି ନେଇନାହୁଁ, କିନ୍ତୁ ଆମ ଦଳରେ ଅନେକ ଅଛନ୍ତି ଯେଉଁମାନେ ଅଧିନାୟକ ହେବାକୁ ସକ୍ଷମ। ଆମ ଦଳକୁ ନେତୃତ୍ୱ ଦେଇପାରିବା ଭଳି ଏପରି ଅତି କମରେ ୪-୫ ଜଣ ଖେଳାଳି ଅଛନ୍ତି। ଆମେ କ’ଣ କରିବା ଆବଶ୍ୟକ ତାହା ଆଲୋଚନା କରିନାହୁଁ, ଆମେ ଆଲୋଚନା କରି ଏକ ନିଷ୍କର୍ଷରେ ପହଞ୍ଚିବୁ। କିନ୍ତୁ ମୁଁ କହିବାକୁ ଚାହେଁ ଯେ ଆମ ଦଳର ସବୁଠାରୁ ସଫଳ ଅଧିନାୟକ ବିରାଟ କୋହଲି ହୋଇଛନ୍ତି, ସେ ୧୪୩ଟି ମ୍ୟାଚ୍ରେ ଆମ ଦଳର ନେତୃତ୍ୱ ନେଇଥିଲେ, ଯେଉଁଥିରେ ଆମେ ୬୬ଟି ମ୍ୟାଚ୍ ଜିତିଥିବା ବେଳେ ୭୦ଟି ମ୍ୟାଚ୍ରେ ଆମକୁ ପରାଜୟର ସମ୍ମୁଖୀନ ହେବାକୁ ପଡ଼ିଥିଲା।
ବର୍ତ୍ତମାନ ଆଇପିଏଲ୍ ମେଗା ନିଲାମରେ, ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଫିଲ୍ ସଲ୍ଟ, ଲିଆମ୍ ଲିଭିଂଷ୍ଟୋନ୍, ଜାକବ୍ ବେଥେଲ୍, ଟିମ୍ ଡେଭିଡ୍, ଭୁବନେଶ୍ୱର କୁମାର, ଜିତେଶ ଶର୍ମା, ଦେବଦତ୍ତ ପାଡିକଲ୍ ଏବଂ ଜୋଶ୍ ହାଜେଲଉଡ୍ ଭଳି ଖେଳାଳିଙ୍କୁ ସାମିଲ କରିଛି। ଏହା ଉପରେ ରାଜେଶ ମେନନ କହିଛନ୍ତି ଯେ, ଆପଣ ଆମର ଖେଳାଳିମାନଙ୍କୁ ଦେଖନ୍ତୁ... ପ୍ରକୃତରେ ଆମେ କେଉଁ ଖେଳାଳିଙ୍କୁ କିଣିବୁ ସେ ବିଷୟରେ ପୂର୍ବରୁ ପ୍ରସ୍ତୁତ ଥିଲୁ। ଆମର ଭାରତୀୟ ଖେଳାଳି କିଏ ହେବେ ଏବଂ ବିଦେଶୀ ଖେଳାଳି କିଏ ହେବେ ସେ ବିଷୟରେ ଆମର ମାନସିକତା ବହୁତ ସ୍ପଷ୍ଟ ଥିଲା।
