ପୁରୀ : ପାରିବାରିକ କଳହର କରୁଣ ଅନ୍ତ ଘଟିଛି । ପତ୍ନୀଙ୍କ ପ୍ରାଣ ନେଇଛି ସ୍ୱାମୀ । ଶୁକ୍ରବାର ରାତିରେ ଏଭଳି ଅଭାବନୀୟ କାଣ୍ଡ ଘଟାଇଥିବା ଯୁବକକୁ ଧରିଛି ତାଳବଣିଆ ଥାନା ପୁଲିସ । ଅଭିଯୁକ୍ତ ଜଣକ ହେଲା ଏହି ଥାନା ଅଧୀନ ସିଦ୍ଧମହାବୀର ଚମାର ସାହିର ପୂର୍ଣ୍ଣଚନ୍ଦ୍ର ବେହେରା ଓରଫ ବାଦଲ (୨୭) । ମୃତା ହେଲେ ପେଣ୍ଠକଟା ମେରାଇନ୍ ଥାନା ଅଧୀନ ନାଗାପାଟଣା ଗ୍ରାମର ଗଗନ ସ୍ୱାଇଁଙ୍କ ଝିଅ ସୌଦାମିନୀ (୨୭)।
ପୁଲିସ ବାଦଲକୁ ଗିରଫ କରିଛି । ରବିବାର ତାକୁ କୋର୍ଟ ଚାଲାଣ କରାଯିବ ବୋଲି କହିଛନ୍ତି ଆଇଆଇସି ଗୀତାଞ୍ଜଳି ନାୟକ । ଶନିବାର ସକାଳେ ଘର ଭିତରେ ପଡ଼ିଥିଲା ସୌଦାମିନୀଙ୍କ ମୃତଦେହ। ପୁଲିସ ପହଞ୍ଚି ଛାନ୍ଭିନ୍ ଆରମ୍ଭ କରିଥିଲା । ବାଦଲକୁ ଧରି ପୁଲିସ ପଚରାଉଚରା କରିବା ପରେ ସୌଦାମିନୀଙ୍କ ବାପଘର ଲୋକଙ୍କୁ ଖବର ଦିଆଯାଇଥିଲା । ବାପଘର ଲୋକେ ପହଞ୍ଚିବା ପରେ ସୌଦାମିନୀଙ୍କ ମା’ ମାମା ସ୍ୱାଇଁ ଏନେଇ ଏତଲା ଦେଇଥିଲେ ।
ମାମା ଅଭିଯୋଗ କରିଛନ୍ତି ଯେ, ୭ ବର୍ଷ ତଳେ ଝିଅ ସୌଦାମିନୀ ଓ ବାଦଲଙ୍କ ବିବାହ ହୋଇଥିଲା । ଏବେ ତାଙ୍କର ୪ ବର୍ଷର ପୁଅଟିଏ ଅଛି । କିନ୍ତୁ ଦୀର୍ଘଦିନ ଧରି ଉଭୟଙ୍କ ମଧ୍ୟରେ କଳହ ଲାଗି ରହୁଥିଲା । ଶୁକ୍ରବାର ରାତିରେ ସୌଦାମିନୀଙ୍କ ଗଳା ଚିପି ହତ୍ୟା କରିଥିଲା ବାଦଲ । ନିସ୍ତୁକ ମାଡ଼ ମାରିବା ସହ ବେକରେ ତାଙ୍କ ଓଢ଼ଣୀକୁ ଗୁଡ଼ାଇ ଏଭଳି ହତ୍ୟା କରିଥିବା ଅଭିଯୋଗ ହୋଇଛି । ଶ୍ରୀଜଗନ୍ନାଥ ମେଡିକାଲ୍ କଲେଜ୍ରେ ସିକ୍ୟୁରିଟି ଗାର୍ଡ ଭାବେ କାର୍ଯ୍ୟ କରୁଥିଲା ବାଦଲ । ସୌଦାମିନୀ ଏକ ନିଶା ନିବାରଣ କେନ୍ଦ୍ରରେ କର୍ମଚାରୀ ଥିଲେ । ବାପଘର ଲୋକେ ପୁଲିସକୁ କହିଛନ୍ତି ଯେ, ସୌଦାମିନୀ ବହୁ ଟଙ୍କା କରଜ କରିଥିଲେ । ଦାମ୍ପତ୍ୟ କଳହ ସମ୍ପର୍କରେ ପୁଲିସକୁ ଅନେକ ତଥ୍ୟ ଦେଇଛି ବାଦଲ ।
