ମୁର୍ଶିଦାବାଦ: ପଦ୍ମଶ୍ରୀ ପୁରସ୍କାର ପ୍ରାପ୍ତ ଭାରତ ସେବାଶ୍ରମ ସଂଘର ସାଧୁ ସ୍ୱାମୀ ପ୍ରଦୀପ୍ତାନନ୍ଦ, ଯିଏ କାର୍ତ୍ତିକ ମହାରାଜ ନାମରେ ଅଧିକ ଜଣାଶୁଣା, ତାଙ୍କ ବିରୁଦ୍ଧରେ ଜଣେ ମହିଳା ଦୁଷ୍କର୍ମ ଅଭିଯୋଗ ଆଣିଛନ୍ତି। ଅଭିଯୋଗକାରୀ ମହିଳା କହିଛନ୍ତି ଯେ, ୨୦୧୨ରେ କାର୍ତ୍ତିକ ମହାରାଜ ତାଙ୍କୁ ମୁର୍ଶିଦାବାଦର ଚଣକ ଆଦିବାସୀ ଆବାସିକ ବାଳିକା ବିଦ୍ୟାଳୟରେ ଶିକ୍ଷୟିତ୍ରୀ ନିଯୁକ୍ତି ଦେବାର ପ୍ରତିଶ୍ରୁତି ଦେଇ ଆଶ୍ରମକୁ ନେଇଥିଲେ। ସେଠାରେ ତାଙ୍କୁ ସେ ଅନେକ ଥର ଦୁଷ୍କର୍ମ କରିଥିବା ନେଇ ସେ ଅଭିଯୋଗ ଆଣିଛନ୍ତି।
ମହିଳାଙ୍କ ଅଭିଯୋଗ ଅନୁଯାୟୀ, ୨୦୧୩ ଜାନୁଆରୀରୁ ଜୁନ ମାସ ମଧ୍ୟରେ କାର୍ତ୍ତିକ ମହାରାଜ ତାଙ୍କ ସହ ଅନୈତିକ ଭାବେ କମ ସେ କମ ୧୨ ଥର ଦୁଷ୍କର୍ମ କରିଥିଲେ। ସେ ଆହୁରି ମଧ୍ୟ କହିଛନ୍ତି ଯେ, ଗର୍ଭବତୀ ହେବା ପରେ ମହାରାଜ ଓ କିଛି ବିଦ୍ୟାଳୟ କର୍ମଚାରୀ ତାଙ୍କୁ ବରହମପୁରର ଏକ ଘରୋଇ ନର୍ସିଂ ହୋମକୁ ନେଇ ଜବରଦସ୍ତି ଗର୍ଭପାତ ମଧ୍ୟ କରାଇଥିଲେ। ମହିଳାଙ୍କ କହିବା ଅନୁଯାୟୀ, ଭୟ ଓ ଅସହାୟତା ହେତୁ ସେ ବର୍ଷ ବର୍ଷ ଧରି ଏହି ଘଟଣା ବିଷୟରେ ଚୁପ ରହିଥିଲେ। ମହାରାଜ ତାଙ୍କୁ ପୁଲିସ ନିକଟକୁ ଗଲେ ହତ୍ୟା କରିବା ପାଇଁ ଧମକ ଦେଇଥିଲେ ବୋଲି ମଧ୍ୟ ସେ ଅଭିଯୋଗ ଆଣିଛନ୍ତି।
ତେବେ ୨୦୨୫ ଜୁନ ୧୨ ତାରିଖରେ ମହିଳା ଜଣକ ପୁନର୍ବାର ମହାରାଜଙ୍କୁ ଯୋଗାଯୋଗ କରିଥିଲେ। ସେ ତାଙ୍କୁ ଜୁନ ୧୩ରେ ବରହମପୁରରେ ଏକ ନିର୍ଦ୍ଦିଷ୍ଟ ସ୍ଥାନରେ ଅପେକ୍ଷା କରିବାକୁ କହିଥିଲେ। ଯେଉଁଠାରେ ଦୁଇ ଜଣ ବ୍ୟକ୍ତି ଆସି ତାଙ୍କୁ ନେଇ ଆସିବେ ବୋଲି ମହାରାଜ ତାଙ୍କୁ ସୂଚନା ଦେଇଥିଲେ। କିନ୍ତୁ ସେହି ବ୍ୟକ୍ତିମାନେ ତାଙ୍କ ନିକଟରେ ପହଞ୍ଚି ତାଙ୍କୁ ଧମକ ଦେଇ ମହାରାଜଙ୍କ ସହ ଆଉ ଯୋଗାଯୋଗ ନ କରିବାକୁ ଚେତାବନୀ ଦେଇଥିଲେ ଏବଂ ତାଙ୍କୁ ଗାଡ଼ିରୁ ଠେଲି ଦେଇଥିଲେ।
ଏହି ଅଭିଯୋଗ ଆଧାରରେ, ନବଗ୍ରାମ ପୁଲିସ ଷ୍ଟେସନରେ ଗୁରୁବାର ଦିନ ଭାରତୀୟ ନ୍ୟାୟ ସଂହିତାର ସମ୍ପର୍କିତ ଧାରା ଅନୁଯାୟୀ ଏକ ଏଫଆଇଆର ଦାଖଲ ହୋଇଛି। ମୁର୍ଶିଦାବାଦ ପୁଲିସର ଅତିରିକ୍ତ ଏସପି ରାସପ୍ରୀତ ସିଂହ ତଦନ୍ତ ଚାଲୁ ଥିବା ନେଇ ସୂଚନା ଦେଇଛନ୍ତି। ତେବେ, ଖବର ପ୍ରକାଶ ପାଇବା ସମୟ ପର୍ଯ୍ୟନ୍ତ ମହାରାଜଙ୍କ ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ନିଆଯାଇ ନାହିଁ।
କାର୍ତ୍ତିକ ମହାରାଜ ଏହି ଅଭିଯୋଗକୁ ଖଣ୍ଡନ କରି କହିଛନ୍ତି ଯେ "ମୋ ନାମ ଓ ପ୍ରତିଷ୍ଠାକୁ କଳଙ୍କିତ କରିବାର ଏହା ଏକ ଷଡ଼ଯନ୍ତ୍ର"। ସେ ଆହୁରି ମଧ୍ୟ କହିଛନ୍ତି ଯେ, "ଆମ ଆଶ୍ରମରେ ଅନେକ ମହିଳା କର୍ମଚାରୀ ଓ ଶିଷ୍ୟା ଅଛନ୍ତି। ସେମାନଙ୍କୁ ପଚାରନ୍ତୁ, ସମସ୍ତେ କହିବେ ଆମେ ମହିଳାଙ୍କୁ ମା’ ପରି ସମ୍ମାନ ଦେଉ।" ବେଲଦାଙ୍ଗାରେ ଏକ ଜନସଭାରେ ସେ ନିଜକୁ ନିର୍ଦ୍ଦୋଷ ବୋଲି ଦାବି କରି କହିଛନ୍ତି, "ସନ୍ନ୍ୟାସୀମାନେ ମହିଳା ହଷ୍ଟେଲରେ ରାତି କାଟନ୍ତି ନାହିଁ" ବୋଲି ମଧ୍ୟ କହିଛନ୍ତି।
ଏହି ଘଟଣା ପଶ୍ଚିମବଙ୍ଗରେ ଆଉ ଏକ ରାଜନୈତିକ ବିବାଦକୁ ଆରମ୍ଭ କରିଛି। ତୃଣମୂଳ କଂଗ୍ରେସ (ଟିଏମସି) ଏକ୍ସରେ ଦାବି କରିଛି ଯେ, କାର୍ତ୍ତିକ ମହାରାଜ ବିଜେପିର ଘନିଷ୍ଠ ସହଯୋଗୀ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସୁପାରିଶରେ ପଦ୍ମଶ୍ରୀ ପୁରସ୍କାର ପାଇଛନ୍ତି। ଟିଏମସି ଏହି ମାମଲାରେ ନିରପେକ୍ଷ ତଦନ୍ତ ଓ ଦୋଷୀ ସାବ୍ୟସ୍ତ ହେଲେ କଠୋର ଦଣ୍ଡର ଦାବି କରିଛି। ଅନ୍ୟପକ୍ଷରେ, ବିଜେପି ନେତାମାନେ ଏହାକୁ ଟିଏମସିର ଆଉ ଏକ ରାଜନୈତିକ ଷଡ଼ଯନ୍ତ୍ର ବୋଲି କହିବା ସହ ଏହି ଦାବିକୁ ଖଣ୍ଡନ କରିଛନ୍ତି।
ଏହି ଅଭିଯୋଗ ପଶ୍ଚିମବଙ୍ଗରେ ଅନ୍ୟ ଏକ ହାଇ ପ୍ରୋଫାଇଲ ଦୁଷ୍କର୍ମ ମାମଲା ପରେ ସାମ୍ନାକୁ ଆସିଛି। ଯେଉଁଠାରେ କୋଲକାତାର ଏକ ଲ କଲେଜରେ ଜଣେ ଛାତ୍ରୀଙ୍କ ସହ ଗଣଦୁଷ୍କର୍ମ ହୋଇଥିବା ଅଭିଯୋଗ ହୋଇଛି। ଏହା ରାଜ୍ୟରେ ମହିଳା ସୁରକ୍ଷା ଓ ନ୍ୟାୟ ଉପରେ ଜନସାଧାରଣଙ୍କ ଆଲୋଚନାକୁ ତୀବ୍ର କରିଛି। ପଶ୍ଚିମବଙ୍ଗରୁ ଗୋଟିଏ ପରେ ଗୋଟିଏ ଏହିପରି ଘଟମା ସାମ୍ନାକୁ ଆସୁଥିବାରୁ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
