ନରସିଂହପୁର,୨୬/୦୬: କଟକ ଜିଲ୍ଲା ନରସିଂହପୁର ପଞ୍ଚମୁଖୀ ଛକ ନିକଟରେ ଥିବା ଏକ ଦୋକାନ ସାମ୍ନାରୁ ଜଣେ ମହିଳାଙ୍କ ମୃତଦେହ ଉଦ୍ଧାର କରାଯାଇଛି । ମୃତ ମହିଳା ଜଣକ ଗୁହାଳସାହି ଗାଁୟର ଅଲି ବେହେରା ବୋଲି ଜଣାପଡ଼ିଛି । ମହିଳାଙ୍କ ମୃତ୍ୟୁର କାରଣ ଅସ୍ପଷ୍ଟ ରହିଥିବା ବେଳେ ତାଙ୍କୁ ହତ୍ୟା କରାଯାଇଥିବା ସନ୍ଦେହ କରାଯାଉଛି ।
ସୂଚନା ମୁତାବକ, ଗୁହାଳସାହି ଗ୍ରାମର ଅଲି ବେହେରା ମାନସିକ ଭାରସାମ୍ୟ ହରାଇବା ପରେ ଏଣେତେଣେ ବୁଲାବୁଲି କରନ୍ତି ଏବଂ ରାତିରେ କେଉଁଠି ବି ଶୋଇପଡ଼ନ୍ତି । ତେବେ ଗୁରୁବାର ସକାଳୁ ପଞ୍ଚମୁଖୀ ଛକ ନିକଟରେ ଥିବା ଏକ ଦୋକାନ ସାମ୍ନାରେ ମହିଳାଙ୍କ ମୃତଦେହ ପଡ଼ିଥିବା ଦେଖିବାକୁ ମିଳିଥିଲା । ମହିଳାଙ୍କ ମୁହଁରେ ଗଭୀର ଆଘାତ ଲାଗିଥିବାରୁ ତାଙ୍କୁ ହତ୍ୟା କରାଯାଇଥିବା ସନ୍ଦେହ କରାଯାଉଛି । ଏ ସମ୍ପର୍କରେ ଖବର ପାଇ ନରସିଂହପୁର ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିବା ସହ ଘଟଣାର ପ୍ରାଥମିକ ତଦନ୍ତ ଆରମ୍ଭ କରିଛି । ସେପଟେ ଶବ ବ୍ୟବଚ୍ଛେଦ ରିପୋର୍ଟ ଆସିଲେ ମୃତ୍ୟୁର ପ୍ରକୃତ କାରଣ ଜଣାପଡ଼ିବ ।
