ନୂଆଦିଲ୍ଲୀ, ୭।୭: କୌଣସି ସମୟରେ ହୋଇପାରେ ତୃତୀୟ ବିଶ୍ବଯୁଦ୍ଧ । ମଧ୍ୟପ୍ରାଚ୍ୟ କିମ୍ବା ୟୁରୋପରୁ ପଡ଼ିପାରେ ଏହାର ମୂଳଦୁଆ । ଇସ୍ରାଏଲ-ଇରାନ ଏବଂ ଋଷ୍-ୟୁକ୍ରେନ ଯୁଦ୍ଧରୁ ଏଭଳି ଅନୁମାନ କରାଯାଉଛି । ନାଗପୁରରେ ରବିବାର ଅନୁଷ୍ଠିତ ‘ବିୟଣ୍ଡ ବର୍ଡର୍ସ’ ପୁସ୍ତକର ଉନ୍ମୋଚନ କାର୍ଯ୍ୟକ୍ରମରେ ଯୋଗ ଦେଇ ଏଭଳି କହିଛନ୍ତି କେନ୍ଦ୍ର ମନ୍ତ୍ରୀ ନୀତିନ ଗଡ଼କରୀ । ଏହି କାର୍ଯ୍ୟକ୍ରମ ଅବସରରେ କେନ୍ଦ୍ରମନ୍ତ୍ରୀ ବିଶ୍ୱ ସଂଘର୍ଷ ଏବଂ ମାନବିକ ସଙ୍କଟ ବିଷୟରେ ଗମ୍ଭୀର ଚିନ୍ତା ପ୍ରକଟ କରିଛନ୍ତି । ସେ କହିଛନ୍ତି, ବର୍ତ୍ତମାନ ସମୟରେ ବିଶ୍ୱରେ ଏକାଧିକ ଦେଶ ମଧ୍ୟରେ ସଂଘର୍ଷ ଜାରି ରହିଛି । ଇସ୍ରାଏଲ ଏବଂ ଇରାନ ମଧ୍ୟରେ, ରୁଷିଆ-ୟୁକ୍ରେନ ମଧ୍ୟରେ ଯାହା ଘଟୁଛି ଏହାକୁ ଦେଖି ଅନୁମାନ କରାଯାଉଛି ଯେ, ଯେକୌଣସି ସମୟରେ ବିଶ୍ୱ ଯୁଦ୍ଧ ଆରମ୍ଭ ହୋଇପାରେ । ବର୍ତ୍ତମାନ ଯେଉଁ ଯୁଦ୍ଧ ହେଉଛି ତାହା କେବଳ ସୈନିକଙ୍କ ମଧ୍ୟରେ ସୀମିତ ନୁହେଁ ବରଂ ମିଶାଇଲ, ଡ୍ରୋନ୍ ଏବଂ ଅତ୍ୟାଧୁନିକ ପ୍ରଯୁକ୍ତିବିଦ୍ୟା ମାଧ୍ୟମରେ ସାଧାରଣ ନାଗରିକଙ୍କୁ ସିଧାସଳଖ ଟାର୍ଗେଟ୍ କରାଯାଉଛି ।
ଗଡ଼କରୀ କହିଛନ୍ତି, ସମୟକ୍ରମେ ସମନ୍ୱୟ, ସଦ୍ଭାବ ଏବଂ ପ୍ରେମର ଭାବନା ହ୍ରାସ ପାଉଛି । ସାଧାରଣ ନାଗରିକ ମଧ୍ୟ ଯୁଦ୍ଧର ଟାର୍ଗେଟ୍ ହେଉଛନ୍ତି । ଯାହାଫଳରେ ମାନବତାକୁ ସୁରକ୍ଷା ଦେବା କଷ୍ଟକର ହେଉଛି । ମିଶାଇଲ୍ ଆକ୍ରମଣ ଏବେ ନାଗରିକ ବସତିରେ ପହଞ୍ଚିଛି । ଯୁଦ୍ଧ କେବଳ ସାମରିକ ନୁହେଁ, ଏବେ ନୈତିକ ଏବଂ ସାମାଜିକ ଯୁଦ୍ଧ ମଧ୍ୟ ଲଢ଼ାଯାଉଛି । ମଧ୍ୟପ୍ରାଚ୍ୟରେ ଇସ୍ରାଏଲ, ଇରାନ ଏବଂ ୟୁରୋପରେ ରୁଷିଆ, ୟୁକ୍ରେନ ମଧ୍ୟରେ ଉତ୍ତେଜନା ବୃଦ୍ଧି ପାଉଛି । ଏହି ସମୟରେ ଗଡ଼କରୀଙ୍କ ଏଭଳି ବୟାନ ଦେଇଛନ୍ତି ।
ବିଶ୍ୱ ଯୁଦ୍ଧରେ ଭାରତର ଭୂମିକା କ’ଣ ?
ବିଶ୍ୱରେ ଯୁଦ୍ଧର ବର୍ତ୍ତମାନର ପରିସ୍ଥିତି ଉପରେ, ଗଡ଼କରୀ ଭାରତକୁ ବୁଦ୍ଧଙ୍କ ଭୂମି ଭାବରେ ବର୍ଣ୍ଣନା କରି କହିଛନ୍ତି ଯେ, ଭାରତ ସର୍ବଦା ସତ୍ୟ, ଅହିଂସା ଏବଂ ଶାନ୍ତିର ବାର୍ତ୍ତାବହ ହୋଇଆସିଛି । ଏପରି ପରିସ୍ଥିତିରେ, ଭାରତ ବିଶ୍ୱସ୍ତରୀୟ ମଞ୍ଚରେ ଶାନ୍ତି ଏବଂ ସମନ୍ୱୟ ପାଇଁ ପ୍ରୟାସର ନେତୃତ୍ୱ ନେବା ଆବଶ୍ୟକ । ବିଶ୍ୱସ୍ତରୀୟ ସଂଘର୍ଷର ବର୍ତ୍ତମାନର ପରିସ୍ଥିତିକୁ ଦୃଷ୍ଟିରେ ରଖି, ଭାରତ ଏହାର ରଣନୈତିକ ଆଭିମୁଖ୍ୟ ସମୀକ୍ଷା କରିବା ଉଚିତ୍ । ଅନ୍ତର୍ଜାତୀୟ କୂଟନୀତିରେ ଶାନ୍ତି ପଦକ୍ଷେପକୁ ପ୍ରାଥମିକତା ଦିଆଯିବା ଉଚିତ୍ । ଆମକୁ ବିଚାର କରିବାକୁ ପଡ଼ିବ ଯେ, ଆମର ବୈଦେଶିକ ନୀତି କିପରି ମାନବତାକୁ ସୁରକ୍ଷା ଦେବାରେ ସହାୟକ ହୋଇପାରିବ ।
