ନୂଆଦିଲ୍ଲୀ ୦୬/୧୨: ବିଶ୍ୱର ସବୁଠୁ ବୟସ୍କ ପକ୍ଷୀ ୭୪ ବର୍ଷ ବୟସରେ ଅଣ୍ଡା ଦେଇଛି । ଗତ ୪ ବର୍ଷରେ ଏହା ତା’ର ପ୍ରଥମ ଅଣ୍ଡା, ଯାହା ବୈଜ୍ଞାନିକଙ୍କ ଖୁସିକୁ ବହୁଗୁଣିତ କରିଛି । ୱିଜ୍ଡମ୍ ନାମକ ଲେସାନ୍ ଅଲ୍ବାଟ୍ରୋସ୍ ପକ୍ଷୀକୁ ଗତ ସପ୍ତାହ ମିଡ୍ୱେ ଆଟଲ୍ ନ୍ୟାସ୍ନାଲ ୱାଇଲ୍ଡଲାଇ୍ ରିଫ୍ୟୁଜିରେ ନିଜର ନୂଆ ସାଥୀ ଓ ଏକ ଅଣ୍ଡା ସହିତ ଚିହ୍ନଟ କରାଯାଇଥିଲା । ଏହା ଏକ ଦ୍ୱୀପପୁଞ୍ଜ ଅଭୟାରଣ୍ୟ, ଯାହା ହୱାଈ ଉପଦ୍ୱୀପର ସୁଦୂର ଉତ୍ତରରେ ଅବସ୍ଥିତ ।
ୱାଇଲ୍ଡଲାଇଫ୍ ରିଫ୍ୟୁଜିର ବନ୍ୟଜୀବ ବିଜ୍ଞାନୀ ଜନ୍ ପ୍ଲିସ୍ନର କହିଛନ୍ତି, ୱିଜ୍ଡମ୍ ଅଣ୍ଡା ଦେବ ବୋଲି ସେ ଓ ତାଙ୍କ ଟିମ୍ ବେଶ ଆଶାବାଦୀ ଥିଲେ । ସେ ଆଉ ଏକ ଛୁଆ ଜନ୍ମ ପାଇଁ ଫିଟ୍ ହେବ ବୋଲି ସେମାନଙ୍କର ବିଶ୍ୱାସ ଥିଲା । ଏହା ଏକ ସ୍ୱତନ୍ତ୍ର ଖୁସି ଏବଂ ୱିଜ୍ଡମ୍ର ଉପଲବ୍ଧି ବୋଲି ସେ କହିଛନ୍ତି । ବନ୍ୟଜୀବ ଅଭୟାରଣ୍ୟର ଫେସ୍ବୁକ ପେଜ୍ରେ ଏକ ଭିଡିଓ ପୋଷ୍ଟ୍ କରାଯାଇଛି । ଏଥିରେ ନୂଆ ସାଥୀ ଅଣ୍ଡାରୁ ଛୁଆ ଜନ୍ମ ପାଇଁ ତା’ଉପରେ ବସିବା ପୂର୍ବରୁ ୱିଜ୍ଡମ୍ ନିଜ ମୁଣ୍ଡକୁ ତା’ ମୁଣ୍ଡରେ ରଗଡୁଥିବା ଦେଖିବାକୁ ମିଳିଛି ।
SHE DID IT AGAIN!
— USFWS Pacific (@USFWSPacific) December 3, 2024
Wisdom, the world’s oldest known wild bird, is back with a new partner and just laid yet another egg.
At an approximate age of 74, the queen of seabirds returned to Midway Atoll National Wildlife Refuge last week and began interacting with a male. pic.twitter.com/6qomvs0rKL
ଜୀବବିଜ୍ଞାନୀମାନେ ୨୦୦୧ ମସିହାରେ ମିଡ୍ୱେ ଆଟଲ୍ଠାରେ ୱିଜ୍ଡମ୍କୁ ଚିହ୍ନଟ କରିଥିଲେ । ତା’ର ଗୋଡ଼ରେ ଏକ ଲାଲ୍ ରଙ୍ଗର ବ୍ୟାଣ୍ଡ୍ ଥିଲା । ସେମାନେ ପରେ ଜାଣିବାକୁ ପାଇଲେ, ଦିବଂଗତ ପ୍ରସିଦ୍ଧ ଅର୍ନିଥୋଲୋଜିଷ୍ଟ୍ ଚାଣ୍ଡଲର୍ ରବିନ୍ସଙ୍କ ଦ୍ୱାରା ୧୯୫୬ ମସିହାରେ ତାକୁ ସେଠାକୁ ନିଆଯାଇଥିଲା । ବନ୍ୟଜୀବ ଅଭୟାରଣ୍ୟ ଅନୁସାରେ, ୱିଜ୍ଡମ୍ ନିଜ ଜୀବନକାଳ ମଧ୍ୟରେ ୬୦ଟି ଅଣ୍ଡା ଦେଇଛି ଏବଂ ୩୦ ଛୁଆର ମା’ ହୋଇଛି । ଲେସାନ ଅଲ୍ବାଟ୍ରୋସ୍ ପକ୍ଷୀ ୧୨ରୁ ୪୦ ବର୍ଷ ପର୍ଯ୍ୟନ୍ତ ବଞ୍ଚନ୍ତି । ଏମାନଙ୍କ ମଧ୍ୟରୁ ଅନେକ ରଙ୍ଗୀନ୍ ପ୍ଲାଷ୍ଟିକ୍କୁ ସମୁଦ୍ରରେ ଖାଦ୍ୟ ଭାବି ଗିଳି ପ୍ରାଣ ହରାଇଥାନ୍ତି । ତେବେ, ୱିଜ୍ଡମ୍ ନିଜର ଦୀର୍ଘ ଜୀବନ ଓ ଛୁଆ ଜନ୍ମ ଦେବାର ସାମର୍ଥ୍ୟ ପାଇଁ ବୈଜ୍ଞାନିକଙ୍କୁ ଦ୍ୱନ୍ଦ୍ୱରେ ପକାଇଛି । ପ୍ରତି ବର୍ଷ କୋଟି କୋଟି ଅଲ୍ବାଟ୍ରୋସ୍ ବାସସ୍ଥଳୀ ପାଇଁ ଓ ଛୁଆ ଦେବାକୁ ମିଡ୍ୱେ ଆଟଲ୍କୁ ଫେରନ୍ତି ।
