ଝାରସୁଗୁଡ଼ା, ୧୨/୧୧ : କଲର ଟ୍ରେଡିଂ ଗେମ୍ବଲିଂ ଆପ୍ ନେଲା ଜୀବନ। ଟ୍ରେଡିଂ ଆପ୍ରେ ସର୍ବସ୍ଵ ହରାଇବା ପରେ ଜୀବନ ହାରିଲେ ଯୁବକ। କେନ୍ଦ୍ରାପଡ଼ା ଲଙ୍କାପଡ଼ାର ଅଚ୍ୟୁତାନନ୍ଦ ସାହୁ ଆତ୍ମହତ୍ୟା କରିଛନ୍ତି। ଝାରସୁଗୁଡା ରେଳ ଷ୍ଟେସନ ନିକଟ ରେଳ ଧାରଣାରୁ ତାଙ୍କ ମୃତଦେହ ଉଦ୍ଧାର ହୋଇଛି। ମୁତ୍ୟୁ ପୁର୍ବରୁ ସେ ତାଙ୍କ ବାପାଙ୍କୁ ଏକ ମେସେଜ୍ କରିଛନ୍ତି। ଏହି ମେସେଜ୍ରେ ସେ ତାଙ୍କ ମୃତ୍ୟୁର କାରଣ ଉଲ୍ଲେଖ କରିଛନ୍ତି।
ସୂଚନାନୁଯାୟୀ, କେନ୍ଦ୍ରାପଡ଼ା ଲଙ୍କାପଡ଼ାର ଅଚ୍ୟୁତାନନ୍ଦ ସାହୁ ଝାରସୁଗୁଡାର ଏକ ଘରୋଇ ହୋଟେଲରେ କ୍ୟାସିଅର ଭାବରେ କାର୍ଯ୍ୟ କରୁଥିଲେ। ରବିବାର ହୋଟେଲରେ ଡ୍ୟୁଟି ସାରି ସେ ଆଉ ଫେରିନଥିଲେ। ସନ୍ଧ୍ୟାରେ ଝାରସୁଗୁଡ଼ା ରେଳ ଷ୍ଟେସନ ନିକଟରେ ଆତ୍ମହତ୍ୟା କରିଥିଲେ। ରେଳ ଧାରଣାରୁ ତାଙ୍କର ମୃତଦେହ ଉଦ୍ଧାର ହୋଇଥିଲା। ରେଳବାଇ ପୋଲିସ ଶବ ବ୍ୟବଚ୍ଛେଦ କରି ପରିବାରବର୍ଗଙ୍କୁ ହସ୍ତାନ୍ତର କରିଛି।
ମୃତ୍ୟୁ ପୂର୍ବରୁ ଅଚ୍ୟୁତାନନ୍ଦ ତାଙ୍କ ବାପାଙ୍କୁ ଶେଷ ମେସେଜ୍ ପଠାଇଥିଲେ। ଏଥିରେ ସେ ତାଙ୍କର ମୃତ୍ୟୁର କାରଣ ଉଲ୍ଲେଖ କରିଥିଲେ। ଅଚ୍ୟୁତାନନ୍ଦ ଲେଖିଥିଲେ ଯେ, ଗେମ୍ବଲିଂ ଆପ୍ରେ ସବୁ ଟଙ୍କା ହରାଇବସିଲି। ଆଉ ୨୦-୨୫ ଲକ୍ଷର ଋଣ ବି କରି ଦେଇଥିଲି। ଏଥିରୁ ବର୍ତ୍ତିବା ପାଇଁ ପ୍ରୟାସ କରି ସଫଳ ହୋଇ ପାରିଲିନି। ଏତେ ବଡ଼ ଭୁଲ ମୋ ଦ୍ଵାରା କେମିତି ହୋଇଗଲା ସବୁ ଜାଣି ପାରିଲିନି। ଏତେ ପରିମାଣର ଋଣ ବୋଝର ଚାପ ସହିବା ଭଳି ମୋ ପାଖରେ ସେ ସାହାସ ନାହିଁ ନା ଭରସା। ଶେଷ ନିଶ୍ୱାସ ଯାଏଁ ବହୁତ ଚେଷ୍ଟା କଲି। ଆଉ ବିଳମ୍ବ କରିଥିଲେ ଆହୁରି ଅଧିକ ଲୋକ କଷ୍ଟ ପାଇଥାନ୍ତେ ମୋ ପାଇଁ। ଯେଉଁଟା ମୁଁ ସହି ପାରି ନଥାନ୍ତି। ସବୁତକ ପର୍ସନାଲ୍ ଲୋନ୍। ଯେଉଁ ସମୟରେ ବାପା ବୋଉଙ୍କ ସେବା କରିବା କଥା ସେ ସମୟରେ ତାଙ୍କ ମନକୁ ଆଘାତ ଦେଇ ଛାଡ଼ି ଚାଲିଯାଉଛି। ବହୁତ ଭାଗ୍ୟବାନ ଥିଲି ଯେ ଏମିତି ବାପା ବୋଉଙ୍କୁ ପାଇଥିଲି। କିନ୍ତୁ ସେ ସୁଖରୁ ବଞ୍ଚିତ ହେବାକୁ ପଡ଼ିଲା। ଏତିକି ଅନୁରୋଧ ମତେ କ୍ଷମା କରିଦେବ, ମୋ ଭୁଲ ପାଇଁ ମୁଁ ଦାୟୀ"। ଏହା ଥିଲା ମୃତ ଅଚ୍ୟୁତାନନ୍ଦ ତାଙ୍କ ବାପା ମାଁଙ୍କୁ ଶେଷ ମେସେଜ୍ ।
