ଫୁଲବାଣୀ,୨୮/୩ : ସ୍ଥାନୀୟ ପଟାବାଲି ସାହି ସାଲୁଙ୍କୀ  ନଦୀ   ପୋଲରେ ଭାରସାମ୍ୟ ହରାଇ ଦୁର୍ଘଟଣା ଗ୍ରସ୍ତ ହେବାରୁ ଜଣେ ବାଇକ ଚାଳକଙ୍କ ମୃତ୍ୟୁ ହୋଇଛି। ମୃତକ ଜଣକ ସଦର ଥାନା ଅନ୍ତର୍ଗତ ଦଡକି ପଂଚାୟତ   କାଣୀଦଣୀ ଗ୍ରାମର ଶ୍ରିବନ୍ତ ବେହେରା( ୨୬ ) । 

ବୁଧବାର ବିଳମ୍ବିତ ରାତିରେ ଶ୍ରୀବନ୍ତ ବାଇକ ଯୋଗେ ଫୁଲବାଣୀରୁ ନିଜ ଗ୍ରାମକୁ ଫେରୁଥିବା ସମୟରେ  ଭାରସାମ୍ୟ ହରାଇ ପୋଲରେ ବାଡେଇ ହୋଇ ଯାଇଥିଲେ। ଘଟଣା ସ୍ଥଳରେ ସେ ଗୁରୁତର ହୋଇ ପଡିଥିବା ବେଳେ କିଛି ଲୋକ ଦେଖି ଫୁଲବାଣୀ ମୁଖ୍ୟ ଚିକିତ୍ସାଳୟକୁ ନେଇଥିଲେ l ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା। ଖବର ପାଇ ଟାଉନ ଥାନା ପୁଲିସ ମେଡିକାଲରେ ପହଞ୍ଚି ଶବ ଜବତ କରିବା ସହ ବ୍ୟବଚ୍ଛେଦ ପାଇଁ ପଠାଇଥିଲେ। ଅପରପକ୍ଷରେ, ଶ୍ରୀବନ୍ତଙ୍କ ପରିବାର ଲୋକ ତାଙ୍କୁ ହତ୍ୟା କରାଯାଇଥିବା ଅଭିଯୋଗ କରିଛନ୍ତି। ଏ ନେଇ ମୃତକଙ୍କ ବାପା ବାନାମ୍ବର କହଁର ଟାଉନ ଥାନାରେ ଏତଲା ଦେଇଛନ୍ତି।

ଆଜି ପରିବାର ଲୋକଙ୍କ ସମେତ ଗ୍ରାମବାସୀ ଟାଉନ ଥାନାରେ ପହଞ୍ଚି ହୋ ହଲ୍କା କରିବା ସହିତ ଘଟଣାର ତଦନ୍ତ ପାଇଁ ଦାବୀ କରିଥିଲେ। ତେବେ  ପୁଲିସ ଦୁର୍ଘଟଣା ଜନିତ ମୃତ୍ୟୁ ବୋଲି କହିବା ସହ ଏ ନେଇ ଏକ ମାମଲା ରୁଜ୍ଜୁ କରାଯାଇ  ଅଧିକ ତଦନ୍ତ ଜାରୀ ଥିବା ପ୍ରକାଶ କରିଛି।