ପାତ୍ରପୁର,୨୭/୦୫: ଗତ ଏପ୍ରିଲ ମାସ ୨୮ ତାରିଖରେ କେ.ନୂଆଗାଁ ଥାନା ଧାନଘର ଫାଣ୍ଡି ଅନ୍ତର୍ଗତ ଧାନଘର ଠାରୁ ମାଁ ବାଳକୁମାରୀ ମନ୍ଦିର ରାସ୍ତା ମଧ୍ୟସ୍ଥ ବମୁଣା ବନ୍ଧ ନିକଟରେ ବଳରାମ ଗୌଡ଼ ନାମକ ଜଣେ ବ୍ୟକ୍ତିଙ୍କୁ ଅତ୍ୟନ୍ତ ନିର୍ମମ ଭାବେ ହତ୍ୟା କରାଯାଇଥିଲା । ଘଟଣାର ମୁଖ୍ୟ ଅଭିଯୁକ୍ତ ଜଣେ ନାବାଳକ ସହ ତାର ଦୁଇ ସହଯୋଗୀ ଶଙ୍କର ପାଇକ ଏବଂ ସନ୍ତୋଷ ଜେନା ଓରଫ ବାଘାକୁ ପୋଲିସ ଗିରଫ କରି ଘଟଣାର ଗୋଟିଏ ଦିନ ପରେ କୋର୍ଟଚାଲାଣ କରିଥିଲା। ଏହି ଘଟଣାରେ ଗିରଫ ହୋଇ ଜେଲରେ ଥିବା ବାଘାକୁ କେ.ନୂଆଗାଁ ପୋଲିସ ଦିନିକିଆ ରିମାଣ୍ଡରେ ଆଣି ମଙ୍ଗଳବାର ଅଧିକ ଜେରା କରିଛି । ହତ୍ୟାକାଣ୍ଡ ପରେ ମୃତକର ମୋବାଇଲକୁ ବାଘା ନେଇଯାଇଥିବା ଖବର ପୋଲିସ ପାଇ ମଙ୍ଗଳବାର ବାଘାକୁ ରିମାଣ୍ଡରେ ଆଣି ହତ୍ୟାକାଣ୍ଡ ସ୍ଥଳକୁ ନେଇ ଅଧିକ ତନାଘନା କରିଥିଲା। ଘଟଣାରେ ଅନ୍ୟ କାହାର ସମ୍ପୃକ୍ତି ନେଇ ପୋଲିସର ବାରମ୍ବାର ପଚାରିବା ସତ୍ତ୍ୱେ ଅଭିଯୁକ୍ତ ବାଘା ଘଟଣାରେ ନାବାଳକ, ଶଙ୍କର ଓ ତାର ହିଁ ସମ୍ପୃକ୍ତି ଥିବା ପୋଲିସକୁ କହିଥିଲା । ବଳରାମ ମହାଙ୍କୁଡ଼ ହତ୍ୟା ପରେ ତାଙ୍କ ପରିବାର ଲୋକେ ଘଟଣା ଆଉ କିଛି ବ୍ୟକ୍ତିଙ୍କ ହାତ ଥିବା ସନ୍ଦେହ କରି ଚିକିଟି ଏସ୍ଡିପିଓ ବିଶ୍ଵାମିତ୍ର ହରପାଲଙ୍କୁ ଭେଟିଥିଲେ ।
ଅଭିଯୋଗ ପରେ ପୋଲିସ ବାଘାକୁ ରିମାଣ୍ଡ ପାଇଁ ତିନିଦିନ ପୂର୍ବେ ଆବେଦନ କରିଥିଲା । ମଙ୍ଗଳବାର ଅଭିଯୁକ୍ତ ସନ୍ତୋଷ ଜେନାକୁ ଜେରା ଓ ହତ୍ୟାକାଣ୍ଡ ସ୍ଥଳକୁ ନେବା ବେଳେ ଚିକିଟି ଏସ୍ଡିପିଓଙ୍କ ସହ କେ.ନୂଆଗାଁ ଆଇଆଇସି କିଶୋର ସାମଲ ଉପସ୍ଥିତ ଥିଲେ । ସାମାନ୍ୟ ଥଟ୍ଟା ମଜାରେ ଘଟିଥିବା ଏହି ହତ୍ୟାକାଣ୍ଡର ମୂଖ୍ୟ ଅଭିଯୁକ୍ତ ଜଣେ ନାବାଳକ ହୋଇଥିବା ବେଳେ ଘଟଣାରେ ହତ୍ୟାକାଣ୍ଡ ବେଳେ ମୃତକକୁ ମାଡ଼ ମାରିଥିବା ଓ ତାର ମୋବାଇଲ ଫିଙ୍ଗିଥିବା ବାଘା ଏବଂ ହତ୍ୟାକାଣ୍ଡ ସ୍ଥଳରେ ପ୍ରଥମେ ମୃତକ ବଲରାମକୁ ପ୍ରଥମେ ପଥରେ ଆକ୍ରମଣ କରିଥିବା ଶଙ୍କର ଏବେ ସମସ୍ତେ ଜେଲରେଥିବା ବେଳେ ମୃତକଙ୍କ ପରିବାର ଏବେବି ଏକ ଅଜଣା ଭୟରେ ରହିଛନ୍ତି ।
