ଅହମ୍ମଦାବାଦ: ଆଇପିଏଲର ୩୨ ତମ ମ୍ୟାଚ୍ରେ ସହଜ ବିଜୟ ହାସଲ କରିଛି ଦିଲ୍ଲୀ କ୍ୟାପିଟାଲ୍ସ । ୬୭ଟି ବଲ୍ ବାକି ଥାଇ ଟାର୍ଗେଟ ପୂରଣ କରିଛି ଦିଲ୍ଲୀ । ୮.୫ ଓଭରରେ ୪ ଓ୍ବିକେଟ ବିନିମୟରେ ୯୨ ରନ୍ କରିବା ସହ ଡିସି ବିଜୟୀ ହୋଇଛି । ପ୍ରଥମେ ବ୍ୟାଟିଂ କରି ଗୁଜରାଟ ମାତ୍ର ୮୯ ରନ୍ରେ ଅଲଆଉଟ ହୋଇଥିଲା ।
ଦିଲ୍ଲୀ ଟିମ୍ର ଫ୍ରେସର ମ୍ୟାକଗର୍କ ୨୦ ରନ୍ କରିଥିବା ବେଳେ ରିଷଭ ପନ୍ତ ଅପରାଜିତ ୧୯ ରନ୍ ଏବଂ ସୁମିତ କୁମାର ଅପରାଜିତ ୯ ରନ୍ କରିଛନ୍ତି । ସେହିଭଳି ପୃଥ୍ବୀ ଶ’ (୭), ଅଭିଷେକ ପୋରେଲ୍ (୧୫), ସାଇ ହୋପ (୧୯)ଙ୍କ ବଳରେ ଗୁଜରାଟକୁ ପରାସ୍ତ କରିଛି ଦିଲ୍ଲୀ କ୍ୟାପିଟାଲ୍ସ । ସେପଟେ ଗୁଜରାଟର ସନ୍ଦୀପ ଓ୍ବାରିୟର ସର୍ବାଧିକ ୨ଟି ଓ୍ବିକେଟ ନେଇଛନ୍ତି । ତାଙ୍କ ବ୍ୟତୀତ ରାଶିଦ ଖାନ ଏବଂ ସ୍ପେନ୍ସର ଜନସନ ଗୋଟିଏ ଲେଖାଏଁ ଓ୍ବିକେଟ ନେଇଛନ୍ତି ।
ଚଳିତ ଆଇପିଏଲ ସିଜନର ୩୨ ତମ ମ୍ୟାଚ୍ରେ ସବୁଠୁ କମ୍ ସ୍କୋର ହୋଇଛି । ଗୁଜରାଟ ୮୯ ରନ୍ରେ ଅଲଆଉଟ ହୋଇଥିବା ବେଳେ ଦିଲ୍ଲୀ ୫୩ଟି ବଲ୍ ଖେଳି ବିଜୟ ହାସଲ କରିଛି । ଆଜି ଟସ ହାରି ବ୍ୟାଟିଂ କରିଥିବା ଗୁଜରାଟ ଦିଲ୍ଲୀ କ୍ୟାପିଟାଲ୍ସର ବୋଲରଙ୍କ ସାମ୍ନାରେ ଅସହାୟତା ପ୍ରକାଶ କରିଥିଲା । ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଲଜ୍ଜାଜନକ ସ୍କୋର କରିଥିଲା ଗୁଜରାଟ ଟାଇଟନ୍ସ ।
୧୭.୩ ଓଭର ଖେଳି ୮୯ ରନ୍ରେ ଅଲଆଉଟ୍ ହୋଇଥିଲା ଗୁଜରାଟ । ଆଜିର ମ୍ୟାଚ୍ରେ ରାଶିଦ ଖାନ ୩୧ ରନ୍ କରିଥିବା ବେଳେ ଅନ୍ୟ କୌଣସି ବ୍ୟାଟର ଭଲ ପ୍ରଦର୍ଶନ କରିପାରି ନଥିଲେ ।ସାଇ ସୁଦର୍ଶନ ୧୨ ରନ୍ କରିଥିବା ବେଳେ ରାହୁଲ ତେଓ୍ବତିଆ ୧୦ ରନ୍ କରିଥିଲା । ଅନ୍ୟମାନେ ଦୁଇ ଅଙ୍କ ଛୁଇଁପାରି ନଥିଲେ ।
ସେପଟେ ଦିଲ୍ଲୀର ବୋଲର ମୁକେଶ କୁମାର ୨.୩ ଓଭର ବୋଲିଂ କରିବା ସହ ୩ ଓ୍ବିକେଟ ନେଇଥିଲେ । ସେହିଭଳି ତ୍ରିଷ୍ଟାନ ଷ୍ଟବ୍ସ ଏବଂ ଇଶାନ୍ତ ଶର୍ମା ଦୁଇଟି ଲେଖାଏଁ ଓ୍ବିକେଟ ନେଇଥିବା ବେଳେ ଖଲିଲ ଅହମ୍ମଦ ଓ ଅକ୍ସର ପଟେଲଙ୍କ ଖାତାକୁ ଯାଇଥିଲା ଗୋଟିଏ ଲେଖାଏଁ ଓ୍ବିକେଟ୍ । ସୂଚନାଯୋଗ୍ୟ,ବିଜୟ ସହ ଦିଲ୍ଲୀ ପଏଣ୍ଟ ଟେବୁଲର ଷଷ୍ଠ ସ୍ଥାନକୁ ଉଠିଥିବା ବେଳେ ଗୁଜରାଟ ସପ୍ତମକୁ ଖସି ଆସିଛି।