ଭୁବନେଶ୍ୱର,୦୫/୦୫: ଟ୍ରେଡିଂରେ ଟଙ୍କା ବାନ୍ଧିରେ ୩ ମାସରେ ମିଳିବ ୨୦ ପ୍ରତିଶତ ଅଧିକ, ଏମିତି ଲୋଭ ଦେଖାଇ ଠକ ଲୁଟିଥିଲା ୮୦ ଲକ୍ଷ । ଶେଷରେ ବରଗଡ ଭିଏସ୍ଏସ୍ ନଗରର ଦେବଜିତ ତ୍ରିପାଠୀଙ୍କୁ ଆସାମରୁ ବାନ୍ଧିଲା ମାଲକାନଗିରି ପୋଲିସ । ମାଲକାନଗିରି ତଳସାହି ଜିତେନ୍ଦ୍ର ପାତ୍ରଙ୍କ ଠାରୁ ଏହି ଲୁଟ୍ ହୋଇଛି ।
ସୂଚନା ମୁତାବକ, ଗତ ସେପ୍ଟେମ୍ବର ୪ ତାରିଖରେ ମାଲକାନଗିରି ତଳସାହି ବାସିନ୍ଦା ଜିତେନ୍ଦ୍ର ପାତ୍ର ଥାନାର ଦ୍ୱାରସ୍ଥ ହୋଇଥିଲେ । ତାଙ୍କ ଅଭିଯୋଗ ଥିଲା ୨୦୧୭ରେ ବରଗଡ ଜିଲ୍ଲା ଭିଏସ୍ଏସ୍ ନଗର ଗାଁର ଦେବଜିତ ତ୍ରିପାଠୀ ନାମକ ତାଙ୍କ ଦୋକାନକୁ ଆସିଥିଲେ । କଥାବାର୍ତ୍ତା ଆଳରେ ନିଜକୁ କଟକର ଦେବଜିତ ତ୍ରିପାଠୀର ପରିଚୟ ଦେଇ ସଂପର୍କ ବଢାଇଥିଲେ । କିଛି ଦିନ ଏମିତି କଥା ହେବା ପରେ ମାଲକାନଗିରିରେ କମଡିଟି ଟ୍ରେଡିଂ ନାମକ ସଂସ୍ଥା ଖୋଲିଥିବା କହିଥିଲେ । ଟ୍ରେଡିଂରେ ଟଙ୍କା ବାନ୍ଧିଲେ ୩ମାସରେ ୨୦ ପ୍ରତିଶତ ଟଙ୍କା ଅଧିକ ମିଳିବ ବୋଲି ମଧ୍ୟ କହିଥିଲେ । ଦେବଜିତଙ୍କ ବିଶ୍ବାସ କରି କିଛି ଟଙ୍କା ବାନ୍ଧିବା ପରେ ୩ ମାସ ପରେ ୨୦ ପ୍ରତିଶତ ଅଧିକ ଟଙ୍କା ଫେରସ୍ତ ପାଇଥିଲେ। ପରେ ତାଙ୍କ ଉପରେ ବିଶ୍ବାସ କରି ବିଭିନ୍ନ ସମୟରେ ବିଭିନ୍ନ ଆକାଉଣ୍ଟ ମାଧ୍ୟମରେ ୮୦ ଲକ୍ଷ ଟଙ୍କା ବାନ୍ଧିଥିଲେ । ତେବେ ୩ ମାସ ପରେ ଟଙ୍କା ଆଉ ଫେରସ୍ତ ପାଇନଥିଲେ । ପରେ ଏକଥା ପଚାରିବା ପାଇଁ ଖୋଜିଲା ବେଳକୁ ଦେବଜୀତ ମାଲକାନଗିରିରୁ ଫେରାର ହୋଇ ଯାଇଥିଲେ । ଏ ନେଇ ମାଲକାନଗିରି ଥାନାରେ ଏତଲା ଦେଇଥିଲେ ଜିତେନ୍ଦ୍ର । ଅଭିଯୋଗ ଆଧାରରେ ଠକ ଦେବଜୀତକୁ ଧରିବା ପାଇଁ ବିଭିନ୍ନ ସ୍ଥାନରେ ତନାଘନା ଆରମ୍ଭ କରିଥିଲା ମାଲକାନଗିରି ସଦର ପୋଲିସ ପୋଲିସ ।ଶେଷରେ ଆସାମର ସୋନିତପୁର ଜିଲ୍ଲା ଅନ୍ତର୍ଗତ ତେଜପୁର ଗାଁରୁ ଠକ ଦେବଜିତକୁ ଗିରଫ କରିବାରେ ସଫଳ ହୋଇଛି । ଦେବଜିତଙ୍କ ନାଁରେ ମାଲକାନଗିରି ଥାନାରେ ମୋଟ ୫ଟି ମାମଲା ହୋଇଥିବା ବେଳେ ଘଟଣାର ଅଧିକା ତଦନ୍ତ କରି ଅଭିଯୁକ୍ତକୁ କୋର୍ଟ ଚାଲାଣ କରାଯିବ ବୋଲି କହିଛନ୍ତି ମାଲକାନଗିରି ଥାନା ଅଧିକାରୀ ।
