ଧର୍ମଶାଳା,୧୪/୦୭:ଯୌତୁକ ପାଇଁ ବଧୂ ହତ୍ୟା ଅଭିଯୋଗ। ପ୍ରେମ ବିବାହକୁ ମାସେ ନ ପୁରୁଣୁ ଯାଜପୁର ଜିଲ୍ଲା ଧର୍ମଶାଳା ଥାନା ପଟୁଣିଆ ପଞ୍ଚାୟତ ଗଲଗଲି ଶଙ୍ଖ ଗ୍ରାମରେ ନବବଧୂଙ୍କ ହତ୍ୟା ।  ଯୌତୁକ ଜନିତ ହତ୍ୟା ବୋଲି ବାପଘର ଲୋକ ଥାନାରେ ଅଭିଯୋଗ କରିଛନ୍ତି। ପୁଲିସ ମୃତଦେହ ଜବତ କରି ସ୍ବାମୀକୁ ଥାନାରେ ଅଟକ ରଖିଥିବା ଜଣାଯାଇଛି। 

ଅଭିଯୋଗ ମୁତାବକ,ଧର୍ମଶାଳା  ଥାନା ଅନ୍ତର୍ଗତ ଅଚ୍ୟୁତପୁର ଗ୍ରାମର ହରିହର ବାରିକଙ୍କ ଝିଅ  ଗଲାଗଲି ଶଙ୍ଖ ଗ୍ରାମର ସ୍ୱର୍ଗତ ନରହରି ଜେନାଙ୍କ ପୁଅ ଶ୍ରୀକାନ୍ତ ଜେନାଙ୍କୁ ପ୍ରେମ ବିବାହ କରିଥିଲେ। ଗତ ଜୁନ ୪ ତାରିଖରେ ଚଣ୍ଡିଖୋଲ ମହାବିନାୟକ ପୀଠରେ ଦୁଇ ପରିବାର ଉପସ୍ଥିତିରେ ବିବାହ କାର୍ଯ୍ୟ ସମ୍ପନ୍ନ ହୋଇଥିଲା। ଶ୍ରୀକାନ୍ତ ରାଜମିସ୍ତ୍ରୀ କାମ କରେ।  ମାତ୍ର ବିବାହ ପର ଠାରୁ ତାଙ୍କୁ ଯୌତୁକ ଜନିତ ଶାରୀରିକ ଓ ମାନସିକ ନିର୍ଯ୍ୟାତନା ଦିଆଯାଉଥିବା ପିତା ହରିହର ଏତଲାରେ ଦର୍ଶାଇଛନ୍ତି। ଆଜି ସକାଳୁ ତାଙ୍କୁ ଜ୍ବାଇଁ ଶ୍ରୀକାନ୍ତ ଫୋନ କରି ଝିଅ ଦେହ ଅସୁସ୍ଥ ଅଛି,ଆସି ପହଞ୍ଚିବା ପାଇଁ କହିଥିଲେ। ଏହା ପରେ ହରିହର ଓ ମା ସେଠାରେ ପହଞ୍ଚି ଝିଅ ପଙ୍ଖାରେ ଝୁଲୁଥିବାର ଦେଖିବାକୁ ପାଇଥିଲେ। ତେବେ ସେଠାରେ ପାରିପାର୍ଶ୍ବିକ ଅବସ୍ଥା ଓ ପୂର୍ବ ଅଭିଯୋଗରୁ ତାଙ୍କ ଝିଅକୁ ହତ୍ୟା କରାଯାଇଥିବା ସେମାନେ ଥାନାରେ ଅଭିଯୋଗ କରିଛନ୍ତି। ପୁଲିସ ପହଞ୍ଚି ମୃତଦେହ ଜବତ କରିବା ସହିତ ସ୍ବାମୀ ଶ୍ରୀକାନ୍ତଙ୍କୁ ଥାନାରେ ଅଟକ ରଖି ପଚରଉଚରା କରୁଛି।