ଭୁବନେଶ୍ୱର,୦୩/୧୧: ଆସିଗଲା ନଭେମ୍ବର । କେବେ ଆସିବେ ନବୀନ ? ନବୀନଙ୍କ ବାଟକୁ ଅନେଇ ବସିଛନ୍ତି ବିଜେଡିର ତୃଣମୂଳ କର୍ମୀ ଓ ନେତାମାନେ । ଦଳର ଆଶା, ନବୀନ ଆସିଲେ ବଳ ବଢ଼ିବ । ପୁଣି ଥରେ ପଞ୍ଚାୟତରୁ ରାଜଧାନୀ ପର୍ଯ୍ୟନ୍ତ କର୍ମୀମାନେ ହୁଙ୍କାର ଦେଇ ଆଗକୁ ବଢ଼ିବେ । ମାତ୍ର ଏ ଯାଏଁ ନବୀନଙ୍କ ରାଜ୍ୟ ତମାମ ଗସ୍ତ ନେଇ କିଛି କାର୍ଯ୍ୟକ୍ରମ ଚୂଡ଼ାନ୍ତ ହୋଇପାରିନାହିଁ । ଏପଟେ ଯେତେ ବିଳମ୍ବ ହେଉଛି, ଦଳ ଭିତର କନ୍ଦଳ ସେତେ ପଦାକୁ ଫୁଟି ବାହାରୁଛି ।
ପ୍ରଥମ ପରାଜୟ ପରେ କ୍ଷମତାଚ୍ୟୁତ ହୋଇଛି ବିଜେଡି । ଏଭଳି ଏକ ଅପ୍ରତ୍ୟାଶିତ ଝଟ୍କାରେ ଦୋହଲି ଯାଇଛି ବିଜେଡିର ସଂଗଠନ ଓ ମନୋବଳ । ଦଳ ନା ଆଗକୁ ବଢ଼ିପାରୁଛି ନା ଅଣ୍ଟା ସଳଖିବାକୁ ଏକାଠି ହୋଇପାରୁଛି । ନିୟମିତ ବ୍ୟବଧାନରେ ନେତା ଦଳ ଛାଡ଼ିବା, ପରସ୍ପର ବିରୋଧୀ ବୟାନବାଜି କରିବା ଘଟଣା ବିଜେଡିକୁ ଦୁର୍ବଳ କରୁଛି । ବରିଷ୍ଠ ନେତାମାନେ ପରାଜୟ କାରଣ ନେଇ ଖୋଲାଖୋଲି ନେତୃତ୍ୱଙ୍କ ଆଡ଼କୁ ଆଙ୍ଗୁଠି ଉଠାଉଛନ୍ତି । ଦୁଇ ଜଣ ସାଂସଦ ଦଳ ଛାଡ଼ି ପଦ୍ମ ଧରି ସାରିଲେଣି । ଦଳ ଡେଇଁବା ଧାଡ଼ିରେ ଆହୁରି ଅନେକ ନେତା ଅଛନ୍ତି । ଏବେ ବିଜେଡିକୁ ଚିନ୍ତା, କେମିତି ନିଜ ଘର ସଜାଡ଼ିବା ସହ ଦଳକୁ ମଜଭୁତ କରିବ । ସମସ୍ତଙ୍କ ନଜର ନବୀନଙ୍କ ଉପରେ।
ଗତ ଅଗଷ୍ଟ ମାସରେ ବିଜେଡି ଘୋଷଣା କରିଥିଲା, ବର୍ଷା ଛାଡ଼ିଲା ପରେ ନଭେମ୍ବର ମାସରୁ ବିଜେଡି ସଭାପତି ନବୀନ ପଟ୍ଟନାୟକ ସାରା ଓଡ଼ିଶା ଗସ୍ତରେ ବାହାରିବେ । ସବୁ ଜିଲ୍ଲାକୁ ଯାଇ ତୃଣମୂଳକ ସ୍ତରର ନେତା ଓ କର୍ମୀଙ୍କୁ ଭେଟିବେ । ଦଳକୁ ମଜଭୁତ କରିବାକୁ ପଦକ୍ଷେପ ନେବା ସହ ଲୋକଙ୍କ ସହ ମିଶିବେ । ଏବେ ନଭେମ୍ବର ମାସ ଆରମ୍ଭ ହୋଇଗଲା । ହେଲେ ନବୀନ କେବେଠାରୁ ଜିଲ୍ଲା ଗସ୍ତ କରିବେ, ଜଣାପଡ଼ିନି । ବିଜେଡି ନେତାଙ୍କ କହିବାନୁସାରେ, ଏବେ ସଭ୍ୟ ସଂଗ୍ରହ ଅଭିଯାନ ଚାଲିଛି । ତା’ ଛଡ଼ା ଧାନ କଟା ବି ରହିଛି । ତୃଣମୂଳ ସ୍ତରରେ କର୍ମୀମାନେ ଓ ଲୋକେ ବ୍ୟସ୍ତ ରହିବେ । ତେଣୁ ଏଯାବତ୍ ନବୀନଙ୍କ ଗସ୍ତ ନେଇ କିଛି ଚୂଡ଼ାନ୍ତ ନିଷ୍ପତ୍ତି ହୋଇନାହିଁ । ଭିତିରି ସୂତ୍ର ଅନୁସାରେ ସମ୍ଭବତଃ ନବୀନଙ୍କ ଜିଲ୍ଲା ଗସ୍ତ ବିଳମ୍ବିତ ହୋଇପାରେ । ଅନ୍ୟପକ୍ଷରେ ନଭେମ୍ବର ଶେଷ ସପ୍ତାହରୁ ବିଧାନସଭା ଅଧିବେଶନ ବି ଆରମ୍ଭ ହେବାକୁ ଯାଉଛି ।
ଅନ୍ୟପଟେ ବିଜେଡିର ସଭ୍ୟ ସଂଗ୍ରହ ଅଭିଯାନ ଡିସେମ୍ବର ୯ ଯାଏଁ ଚାଲିବ । ତା’ପରେ ଦଳର ସାଂଗଠନିକ ନିର୍ବାଚନ ପ୍ରକ୍ରିୟା ଆଗେଇବ। ତେଣୁ ନବୀନ କେବେଠାରୁ ଜିଲ୍ଲା ବୁଲିବେ, ଏବେ ସୁଦ୍ଧା କିଛି ଚୂଡ଼ାନ୍ତ ହୋଇନାହିଁ । ଅନ୍ୟପଟେ ବିଭିନ୍ନ ଜିଲ୍ଲାରେ ବିଜେପିର ଅପରେସନ୍ ଲୋଟସ୍ ଭୟ ବିଜେଡିକୁ ଘାରୁଛି । ଦଳରେ ସ୍ଥିତି ଏମିତି, ନବୀନଙ୍କୁ ଛାଡ଼ିଦେଲେ ଆଉ କାହା କଥାକୁ ବିଜେଡି ନେତା କିମ୍ବା କର୍ମୀ କେହି ଭରସା କରୁନାହାନ୍ତି । ରାଜ୍ୟ ସାଂଗଠନିକ ଟିମ୍ ଭଙ୍ଗା ହେବା ପରଠାରୁ ଆଉ କୌଣସି ବଡ଼ ନେତା ସଂଗଠନ କଥାରେ ମୁଣ୍ଡ ପୂରାଉ ନାହାନ୍ତି । ଦଳର ଭବିଷ୍ୟତକୁ ନେଇ ଅନେକଙ୍କ ମନରେ ଆଶଙ୍କା ବସା ବାନ୍ଧିଲାଣି । ଏମିତିରେ ଦଳକୁ ସଂଗଠିତ ରଖିବା ନବୀନଙ୍କ ପାଇଁ ସବୁଠୁ ବଡ଼ ଆହ୍ୱାନ । ନବୀନ ଯେ ପର୍ଯ୍ୟନ୍ତ ମଇଦାନକୁ ଓହ୍ଲାଇ ସିଧାସଳଖ ଦଳୀୟ ନେତା ଓ କର୍ମୀଙ୍କୁ ଭେଟି ନାହାନ୍ତି, ସେ ପର୍ଯ୍ୟନ୍ତ ଦଳର କର୍ମୀ ଓ ନେତାଙ୍କ ଭିତରେ ଉତ୍ସାହ ଆସିବନି ।
ବର୍ତ୍ତମାନ ମୁଖ୍ୟ ବିରୋଧୀ ଦଳ ଭାବେ ବିଜେଡି ସେଭଳି କିଛି କାର୍ଯ୍ୟକ୍ରମ ହାତକୁ ନେଇପାରିନି । ଦରଦାମ, ନାରୀ ନିର୍ଯାତନା ବୃଦ୍ଧି, ଆମ୍ବ ଟାକୁଆ ଖାଇ ମୃତ୍ୟୁ ଭଳି ଅନେକ ପ୍ରସଙ୍ଗ ଥିଲେ ବି ବିଜେଡି ଏହାକୁ ବଡ଼ ପ୍ରସଙ୍ଗ କରିପାରିନାହିଁ । ତେଣୁ ନବୀନଙ୍କ ପଦକ୍ଷେପକୁ ସମସ୍ତେ ଅନେଇ ବସିଛନ୍ତି।
